တၢ်ကမၤလီၤဘျၢ SS United States ပီၣ်လဲၣ်ကဘီဖးဒိၣ်တခိၣ်ဆူ ပီၣ်လဲၣ်ထံယိာ်ပူၤအဂီၢ်န့ၣ် ကဘီခိၣ် တ့(မ) မူၣ်လဲ(န) (Tim Mullane) တဂၤ, ဘၣ်ဂုာ်ကျဲးစၢးမၤဝဲဒၣ် လၢာ်ဂံၢ်လၢာ်ဘါန့ၣ်လီၤ. နီၢ်နီၢ်န့ၣ်, အဝဲဘၣ်တၢ်ဒိးလဲအီၤလၢ တၢ်မၤလီၤဘျၢကဘီ ဖးဒိၣ် အတၢ်မၤန့ၣ်လီၤ. ကဘီဖးဒိၣ်တဖၣ် လၢအလဲၤက့ၤဖံးမၤတ့ၢ်တၢ်လၢ ပီၣ်လဲၣ်မိၢ်ပှၢ် တဖၣ်န့ၣ် မူၣ်လဲ(န) စူးကါက့ၤဝဲဒၣ်ဆူ လၢၢ်သိၣ်ကျိၤတဖၣ် (reefs) ခီဖျိလၢတၢ်မၤလီၤဘျၢကွံာ် ပီၣ်လဲၣ်ကဘီဖးဒိၣ်တဖၣ်န့ၣ်လီၤ. ကဘီလၢ ပီၣ်လဲၣ်အခံဒးတဖၣ်အံၤ, ကဲထီၣ်တၢ်လီၢ်တၢ်ကျဲလၢ အထုးန့ၢ် ပှၤယူၤထံဖိတဖၣ်အဂီၢ်, ဒီးဒ်သိးပီၣ်လဲၣ်နံၤတဖၣ် အသုတဟးဂီၤကွံာ်ဝဲအဂီၢ်န့ၣ် ဒီတဒၢဝဲဒၣ်န့ၣ်လီၤ. ပီၣ်လဲၣ်အထံဖံးခိၣ်န့ၣ် ကဘီဖးဒိၣ်တဖၣ်အံၤ, လဲၤက့ၤဖံးမၤတၢ် တသ့ဝဲဘၣ်ဆၣ်, အဝဲသ့ၣ်မ့ၢ်အိၣ်ဝဲဒၣ်လၢ ပီၣ်လဲၣ်ခံဒးအပူၤဒၣ်လဲာ်န့ၣ် ကဲဘျုးကဲဖှိၣ်ဝဲဒိၣ်ဒိၣ်အါအါအဖၢမုၢ်န့ၣ်လီၤ.

စီၤမိၤရှ့ အံးထွဲကွၢ်ထွဲသိ အနီၣ်ထိးဘိန့ၣ် ဘၣ်တၢ်စူးကါက့ၤအီၤ, ဒ်တၢ်လၢ အကဲထီၣ်တၢ်ဘျုးတၢ်ဖှိၣ်ဖးဒိၣ်တမံၤ, လၢပှၤအံၣ်စရ့လးဖိတဖၣ်အဂီၢ်န့ၣ်လီၤ. ကစၢ်ယွၤ သံကွၢ်ဝဲဒၣ် စီၤမိၤရှ့ လၢ “တၢ်အိၣ်လၢနစုပူၤန့ၣ် မ့ၢ်မနုၤတမံၤလဲၣ်,” ဒီး စီၤမိၤရှ့ စံးဆၢဝဲဒၣ် “မ့ၢ်နီၣ်ထိးဘိ” (၂ မိၤ ၄:၂) န့ၣ်လီၤ. စီၤမိၤရှ့ ကွၢ်ထွဲဝဲဒၣ် သိတဖၣ်အနံၣ် ၄၀ (မၤတၢ် ၇:၂၉-၃၀), ဘၣ်ဆၣ်, အနီၣ်ထိးအံၤ ဘၣ်တၢ်စူးကါက့ၤ အီၤလၢ ကနဲၣ်ဆှၢဒုးဟးထီၣ် အပှၤကလုာ်တဖၣ်လၢ ကီၢ် အဲၤကူပတူးအဂီၢ်န့ၣ်လီၤ. နီၣ်ထိးဘိအံၤ မ့ၢ်တၢ်ပနီၣ်တမံၤလၢ ကစၢ်ယွၤ မၤတၢ်, ခီဖျိလၢ စီၤမိၤရှ့, ဒီး စီၤမိၤရှ့ ဒုးနဲၣ်ပာ်ဖျါထီၣ် တၢ်ပနီၣ်လီၤလိၢ်လီၤလးတဖၣ်လၢ အနီၣ်ထိးဘိ (၂ မိၤ ၄:၁၇), ဒီးလီၣ်ဖျါထီၣ် ကစၢ်ယွၤ အစိကမီၤန့ၣ်လီၤ. ဖဲ “စီၤမိၤရှ့ ယူာ်ထီၣ်ဝဲ အနီၣ်ထိးဘိဆူ မူခိၣ်, ဒီးယွၤမၢတၢ်ဟဲစူၤဒီးသူၣ်လၢ ကီၢ်အဲၤကူပတူး အဖီခိၣ်” (၉:၂၃), ဒီးလၢခံန့ၣ် ပှၤအံၣ်စရ့လးဖိတဖၣ် “ကလဲၤလၢခိလၢပီၣ်လဲၣ်အသးကံၢ်ပူၤ” (၁၄:၁၆) န့ၣ်လီၤ.

ဒ်သိးကစၢ်ယွၤ ကမၤလၢပှဲၤ အတၢ်ပညိၣ်တဖၣ်အဂီၢ်န့ၣ် စူးကါက့ၤဝဲ စီၤမိၤရှ့ အနီၣ်ထိးဘိ, ဒီးအမူဒါအလီၢ်အလၤတဖၣ်န့ၣ်လီၤ. ကစၢ်ယွၤ ဟ့ၣ်လီၤပှၤ တၢ်ဟ့ၣ်တဖၣ်, ဒီးတၤလၣ်တဖၣ်န့ၣ် ကစၢ်ယွၤ စူးကါစ့ၢ်ကီးဝဲဒၣ်လၢ ကျိၤကျဲအသီအပူၤတလီၢ်လီၢ်န့ၣ်လီၤ. ဖဲနအိၣ်မူအိၣ်ဂဲၤလၢ ဟီၣ်ခိၣ်ချၢအံၤအကတီၢ်, “နနီၣ်ထိးဘိ” န့ၣ် မ့ၢ်ကစၢ်ယွၤကစူးကါဝဲဒၣ် လၢကျိၤကျဲအသီတမံၤမံၤအပူၤဒ်လဲၣ်.