ဒ်ပှၤခဲလၢာ်လၢအသံဆိ, ဒီးလဲၤပူၤကွံာ် ဟီၣ်ခိၣ်တဖၣ်အသိး. ကၠိ (Joe) အတၢ်သံန့ၣ် ကဲထီၣ်တၢ်ဖုးသံပျီၢ်သံ, ဒီးတၢ်ကမၢကမၣ်လၢ ပှၤသ့ၣ်ညါအီၤတဖၣ်အဂီၢ်န့ၣ်လီၤ. တချုးလၢအသံန့ၣ် အတၢ်ဃုထၢတဖၣ် စးထီၣ်ကမၣ်တ့ၢ်လံန့ၣ်လီၤ. ခဲကနံၣ်အံၤ, ဒ်အမ့ၢ် ဝၤတဂၤ, ပၢ်တဂၤ, ပှၤနဲၣ်လိတၢ်လိာ်ကွဲသရၣ်တဂၤ, ဒီးသးစၢ်ခိၣ်နၢ်တဂၤအံၤ, ပှၤလၢအဘၣ်သန့ၤအသးဒီးအီၤတဖၣ်အဂီၢ်န့ၣ် အဝဲတအိၣ်လၢၤဘၣ်န့ၣ်လီၤ.

ပတၢ်ထံၣ်တဖၣ်န့ၣ် ပမ့ၢ်ပညိၣ်ပာ်ဖှိၣ်ထဲဒၣ် ဖဲတၢ်တယံာ်ဒံးဘၣ်အကတီၢ်ဖိအဂီၢ်, တၢ်လၢ Joe ဃုထၢမၤကမၣ်တၢ်တဖၣ်န့ၣ်ဒီး, ကညီဝဲဒၣ်န့ၣ်လီၤ. ဘၣ်ဆၣ်, ဖဲပှၤပာ်လီၤ Joe ဆူ ဒဲဟီၣ်ခိၣ်အကတီၢ်, အဖိမုၣ် ပာ်ဖျါထီၣ်ဝဲဒၣ်လၢ “အပၢ်န့ၣ်, ဒ်ပှၤအါဂၤမၤကမၣ်တၢ်သ့အသိး, ဟ့ၣ်လီၤအသး, ဒီးမၤတ့ၢ်တၢ်လၢ ကစၢ်ယ့ၣ်ရှူးအဂီၢ်” န့ၣ်လီၤ.

တၢ်မၤအသးဒ်သိးအံၤန့ၣ် ပကထံၣ်ဘၣ်လၢ ယူဒၤအစီၤပၤ ယိၤရှံယၤ အဂ့ၢ်န့ၣ်လီၤ. ဖဲ အဲၤကူပတူးအစီၤပၤ နကိၤ ကဟဲထီၣ်ဒုး ဘၤဘူၤလိၣ်အကတီၢ်, စီၤပၤယိၤရှံယၤ မၤကမၣ်တၢ်ဒီး, “လဲၤထီဒါအီၤ” (၂ ကွဲး ၃၅:၂၀) န့ၣ်လီၤ. စီၤပၤနကိၤ တအဲၣ်ဒိးဒုးတၢ်ဒီး ယူဒၤဘၣ် (:၂၁). ဒီးစီၤပၤယိၤရှံယၤ နုာ်လီၤမၤဘၣ်ထွဲအသးန့ၣ် မ့ၢ်တၢ်တဒိကနၣ် “ကစၢ်ယွၤအကလုၢ်” (:၂၂) အဃိ, ဘၣ်ဟ့ၣ်လီၤဝဲ အသးသမူ (:၂၃-၂၄) န့ၣ်လီၤ.

ဒ်ပှၤအသးတဆးတဂၤအသိး, စီၤပၤ ယိၤရှံယၤ သံတ့ၢ်ဝဲဘၣ်ဆၣ်, ဝံယံးရမံယၤ ကွဲးဝဲဒၣ် “ထါသးသယုၢ်တၢ်လၢ စီၤပၤ ယိၤရှံယၤအဂီၢ်” (:၂၅) န့ၣ်လီၤ. အတၢ်ဂ့ၢ်န့ၣ် ကတၢၢ်ဝဲလၢ “ဒီးတၢ်အိၣ်လီၤတဲာ်ဘၣ်ဃးဒီး စီၤယိၤရှံယၤအတၢ်မၤ, ဒီးအတၢ်ဂ့ၤတၢ်ဝါ ဒ်တၢ်ကွဲးအသးလၢ ယွၤအတၢ်သိၣ်တၢ်သီအပူၤအသိးန့ၣ်, … ကွဲးအသးလၢ အံၣ်စရ့လး ဒီးယူဒၤအစီၤပၤ အလံာ်ပူၤ” (:၂၆-၂၇) န့ၣ်လီၤ. ပှၤလၢအသံဆိ, လဲၤပူၤကွံာ်ဟီၣ်ခိၣ်တဖၣ်အဂီၢ်, အဝဲသ့ၣ် အတၢ်အဲၣ်ထူအဲၣ်ယွၤ အတၢ်မၤတဖၣ်န့ၣ် မ့ၢ်တၢ်သ့ၣ်နီၣ်ပာ်ဖျါတၢ်သွၣ်ခိၣ်လၢၢ်ထူၣ်လၢအဝဲသ့ၣ်အဂီၢ်န့ၣ်လီၤ.

တၢ်ဂ့ၢ်အံၤ ဂ့ၤပကွၢ်ထံဆိကမိၣ် ပှၤတၢ်မၢဖိ စီၤပီလူး အတၢ်ကတိၤ, “ဒီးခဲကနံၣ်အံၤ, ပှၤလၢယ့ၣ်ရှူးခရံာ်အပူၤတဖၣ်န့ၣ်, တၢ်စံၣ်ညီၣ်ဃၣ်တအိၣ်ဘၣ်ဒီးအီၤဘၣ်” (ရိမ့ၤ ၈:၁) န့ၣ်လီၤ. ဖဲပကွၢ်ထံဆိကမိၣ် ပပၢ်အိၣ်လၢမူခိၣ် မ့ၢ်ထံၣ်ပှၤလၢခရံာ်အပူၤ, ကမ့ၢ်တၢ် ဒ်လဲၣ်န့ၣ်ဒီး, ညီဝဲဒၣ်လၢ ပကသ့ၣ်နီၣ်ထီၣ်က့ၤ ယွၤအဖိအလံၤ, လၢအလဲၤပူၤကွံာ် ဟီၣ်ခိၣ်တဖၣ် အတၢ်အဲၣ်ထူအဲၣ်ယွၤ အတၢ်မၤတဖၣ်န့ၣ်လီၤ.