ဖဲယဘၣ်လဲၤသိၣ်လိတၢ်လၢ မီး(စ)ကိၣ် (Moscow) အကတီၢ်, ယပာ်လီၤယသးလၢ ယကလဲၤဒိး ဟီၣ်ခိၣ်လာ်လ့ၣ်မ့ၣ်အူ, ဒီးလဲၤအီၣ် မုၢ်ဆါတၢ်အီၣ်န့ၣ်လီၤ. ဖဲယဆၢထၢၣ်ဒိး လ့ၣ်မ့ၣ်အူအကတီၢ်, ယစးထီၣ်ညိၣ်ကလံၤ, အဂ့ၢ်ဒ်အံၤ, ယမုာ်လၤသးခုဘၣ်ယဲလၢ တဂီၤအံၤ တၢ်သိၣ်လိအပူၤ, ဒီးမုၢ်နံၤအဃံအလၤဖိတနံၤအဃိန့ၣ်လီၤ. ပှၤလဲၤတၢ်ဖိတဖၣ် ကွၢ်စူၣ်ယၤ, ဒ်ယမ့ၢ်ပှၤအသးတထံတဂၤအသိးန့ၣ်လီၤ. ဖဲယက့ၤတုၤဆူ ကၠိန့ၣ်ဒီး, ဝဲၤလီၢ်အပှၤမၤတၢ်ဖိတဖၣ်အကျါတဂၤန့ၣ် ယတဲဘၣ်အီၤလၢ ပှၤကညီတဖၣ် မ့ၢ်လၢ အသူၣ်ဟးဂီၤသးဟးဂီၤ, ဒီးအသူၣ်ကၢ်အသးလီၤဘှါအဃိဧါ, ယတသ့ၣ်ညါလီၤတံၢ်လီၤဆဲးဘၣ်, ဖဲယညိၣ်ကလံၤန့ၣ်ဒီး, အဝဲသ့ၣ်ကွၢ်စူၣ်ယၤန့ၣ်လီၤ. လၢတၢ်ယူးယီၣ်ပးကဲအပူၤန့ၣ် အဝဲဒုးသ့ၣ်ညါယၤလၢ “မ့ၢ်, အဝဲသ့ၣ်အတၢ်အိၣ်မူအိၣ်ဂဲၤတဖၣ်န့ၣ် ကီခဲဝဲဒၣ် ဒိၣ်မးန့ၣ်လီၤ. ဘၣ်ဆၣ်, တမ့ၢ်လၢတၢ်ဂ့ၢ်အံၤအဃိ အဝဲသ့ၣ်ကွၢ်စူၣ်နၤဘၣ်. တၢ်ညိၣ်ကလံၤလၢပှၤကမျၢၢ်အကျါန့ၣ် တမ့ၢ်လုၢ်လၢ်ဆဲးလၤအဂ့ၤတမံၤအဃိ, အဝဲသ့ၣ်ကွၢ်စူၢ်နၤန့ၣ်လီၤ.”

ဖဲပဆိကမိၣ်တယာ် ပှၤဂုၤပှၤဂၤန့ၣ်, ပကွၢ်ထဲဒၣ် တၢ်အက့ၢ်အဂီၤဖျါလၢခိတဖၣ်, တၢ်လၢအတဘၣ်ဃးဒီး, ခ့ခါခဲအံၤ အတၢ်အိၣ်အသးမၤအသးတဖၣ်န့ၣ်ဘၣ်. မ့ၢ်တၢ်ဒုးသ့ၣ်နီၣ်ထီၣ်က့ၤပှၤလၢ ကစၢ်ယွၤ ဃုထၢ စီၤဒၤဝံး, ဒ်အမ့ၢ် ခါဆူညါ ပှၤအံၣ်စရ့လးဖိတဖၣ် အစီပၤတဂၤအဂ့ၢ်န့ၣ်လီၤ. ဖဲ ဝံ ရှမူၤအ့လး ကွၢ်ဝဲဒၣ် စီၤယံးရှဲ အဖိခွါအဒိၣ်ကတၢၢ်တဂၤ, ဒီးစံးဝဲဒၣ်လၢ “မ့ၢ်မးယွၤအပှၤဒိးဖှူအသးတဂၤ အိၣ်ဝဲလၢ ယမဲာ်ညါ” (၁ ရှမူၤ ၁၆:၆) န့ၣ်လီၤ. ဘၣ်ဆၣ်, ကစၢ်ယွၤ စံးဘၣ်တဲဘၣ် စီၤရှမူၤအ့လးလၢ “အမဲာ်အက့ၢ်အဂီၤ, ဒီးအနီၢ်ထီန့ၣ်ကွၢ်တဂ့ၤ. မ့ၢ်ယညိကွံာ်လံအီၤအဂ့ၢ်လီၤ. အဂ့ၢ်ဒ်အံၤ, ယတထံၣ်ဘၣ်တၢ် ဒ်ပှၤကညီ ထံၣ်ဝဲအသိးန့ၣ်ဘၣ်. အဂ့ၢ်ဒ်အံၤ, ပှၤကညီကွၢ်ပှၤအမဲာ်, မ့မ့ၢ် ယွၤကွၢ်ပှၤအသး” (:၇) န့ၣ်လီၤ.

တၢ်စံၣ်ညီၣ်ပဲာ်ဖး အတၢ်သန့ၤထီၣ်အသးန့ၣ် မ့မ့ၢ်တၢ်လၢအဖျါလၢခိတဖၣ်န့ၣ်ဒီး, အကတၢၢ်န့ၣ် ကဆှၢပှၤဆူ တၢ်ထံၣ်ဆိကမိၣ်အကမၣ်န့ၣ်လီၤ. ကစၢ်ယွၤ မ့ၢ်စံၣ်ညီၣ်တၢ်လၢပဂီၢ်န့ၣ်ဒီး, ကမ့ၢ်တၢ်အဂ့ၤကတၢၢ်န့ၣ်လီၤ. တၢ်ပာ်သူၣ်ပာ်သး မ့ၢ်တၢ်အကါဒိၣ်တမံၤန့ၣ် ကစၢ်ယွၤ ထံၣ်သ့ၣ်ညါဝဲဒၣ်န့ၣ်လီၤ.