ဖဲယတံၤသကိးဘူးဘူးတံၢ်တံၢ်တဂၤ ဒိးတ့ဒိးဖျီအသးအကတီၢ်, တၢ်တူၢ်လိာ်မူး တၢ်အီၣ်တၢ်အီ လၢပှၤတမှံၤအဂၤ ခံကယၤအဂီၢ်, ပရဲၣ်လီၤကျဲၤလီၤ စီၢ်နီၤခိၣ်တဖၣ်န့ၣ်လီၤ. လၢတၢ်မုၢ်လၤသးခုအပူၤန့ၣ် ပချံးတၢ်ထွါစုတဖၣ်, ရဲၣ်လီၤကျဲၤလီၤ ဒီဖိ, နီၣ်တၢၤ, နီၣ်ဆဲးတဖၣ်, မၤလိၤမၤဘျ့ စီၢ်နီၤခိၣ်ဒါတဖၣ်, ဒီးတၢ်ရဲၣ်လီၤကျဲၤလီၤဖီတဖၣ်န့ၣ် ယံာ်ဝဲဒၣ် လၢအနၣ်ရံၣ်တဖၣ်န့ၣ်လီၤ. တၢ်သ့ၣ်တဖၣ်န့ၣ် ပဂုာ်ကျဲးစၢးမၤအီၤခဲလၢာ်ဝံၤ, ပခိးကွၢ်လၢ် ပှၤတမှံၤတဖၣ် ကဟဲတုၤ, ဒီးကအီၣ်အီသကိးတၢ်အဂီၢ်န့ၣ်လီၤ. ဘၣ်ဆၣ်, ဖဲပထံၣ်ဘၣ် လီၢ်ဆ့ၣ်နီၤတဖၣ် အိၣ်လီၤဟိဝဲဒၣ်အါဖျၢၣ်အဃိ, ပသူၣ်ဟးဂီၤသးဟးဂီၤဒိၣ်မးန့ၣ်လီၤ.

ဖဲ ကစၢ်ယ့ၣ်ရှူး အီၣ်သကိးအီသကိးတၢ်ဒီးပှၤဖၤရံၤရှဲဖိတဖၣ်အကတီၢ်န့ၣ် နီၤဟ့ၣ်ခီဝဲဒၣ် တၢ်ဂ့ၢ်ဒ်သိးအံၤတယုၢ် (လူၤ ၁၄:၁၅-၂၀) န့ၣ်လီၤ. ပှၤအိၣ်ဝဲဒၣ်တဂၤ, လၢတၢ်အဲၣ်တၢ်သးအိၣ်အပူၤန့ၣ် ကတဲာ်ကတီၤန့ၢ် တၢ်အီၣ်အမူးဖးဒိၣ် လၢပှၤအါဂၤအဂီၢ်ဘၣ်ဆၣ်, ပှၤဟဲတုၤဒၣ် စှၤဂၤဖိ, ဒီးပှၤအါဂၤန့ၣ် ဟ့ၣ်ထီၣ်ဝဲဒၣ် တၢ်ကတိၤပူၤဖျဲးအသး လၢအတလီၤနာ်ဘၣ်န့ၣ်လီၤ. မ့ၢ်လၢအဝဲသ့ၣ် ဂ့ၢ်လိာ်ဝဲအဃိ, မူးကစၢ်န့ၣ် အသးဒိၣ်ထီၣ်ဝဲဒိၣ်မး, ဒီးကွဲမုာ်ဝဲဒၣ် “ပှၤအဖှီၣ်အယာ်, ဒီးပှၤအဂီၤဟးဂီၤ, ဒီးပှၤအခီၣ်ဟးဂီၤ, ဒီးပှၤအမဲာ်ဘျီၣ်သ့ၣ်တဖၣ်” (:၂၁), လၢပှၤတတူၢ်လိာ်, ဘၣ်အိၣ်ဝဲဒၣ်လၢပပှၤတဝၢအချၢတဖၣ်န့ၣ်လီၤ. တၢ်လီၢ်တဖၣ်အိၣ်ဒံးဝဲအဃိ, အခ့အပှၤတဖၣ် လဲၤဃုကိးအါထီၣ်ဝဲ, ဒီး “ဒုးဟဲနုာ်ဆူၣ်” (:၂၃) ဝဲဒၣ်န့ၣ်လီၤ.

ပူဟ့ၣ်ဒိတယုာ်အံၤ ဒုးသ့ၣ်နီၣ်ထီၣ်က့ၤပှၤလၢ ကစၢ်ယ့ၣ်ရှူး မ့ၢ်ဝဲ မ့းရှံအၤ န့ၣ် ကစၢ်ယွၤ အပှၤဃုထၢဖိတဖၣ် တတူၢ်လိာ်, ဒီးစံးကတိၤဒူၣ်ဒွဲၣ် ယွၤအတၢ်ကွဲမုာ်ဆူ အဘီအမုၢ် (ယိၤ ၁:၁၁) အဂ့ၢ်န့ၣ်လီၤ. အပှၤဂီၢ်မုၢ်တဖၣ် တတူၢ်လိာ်ဝဲဘၣ်ဆၣ်, ကစၢ်ယွၤ အတၢ်တိာ်ကျဲၤလၢ ကအုၣ်က့ၤခီၣ်က့ၤ ပှၤဟီၣ်ခိၣ်ဖိတဖၣ် ကမၤအသးဆူညါအဂီၢ်, ကစၢ်ယွၤ အိးထီၣ်အတၢ်ကွဲမုာ်ဆူ ပှၤတခီဘီမုၢ်ဖိတဖၣ်, လၢတမ့ၢ် ပှၤယူဒၤဖိ
တဖၣ်န့ၣ်လီၤ. ပှၤဟီၣ်ခိၣ်ဖိ မ့ၢ်ထံၣ်ဝဲဒၣ် ယွၤကွဲမုာ် ပှၤတခိဘီမုၢ်ဖိန့ၣ် ကြၢးမ့ၢ်ဂ့ၤ, တကြၢးမ့ၢ်ဂ့ၤန့ၣ်, ကယဲၢ်ပှၤလၢ အတူၢ်လိာ် ကစၢ်ယ့ၣ်ရှူး, ဒီးစူၢ်က့ၤနာ်က့ၤအီၤတဖၣ်န့ၣ် ဘၣ်တၢ်တူၢ်လိာ်မုာ်ဝဲဆူ ကစၢ်ယွၤ အဘီအမုၢ်, အတၢ်အီၣ်တၢ်အီအမူးန့ၣ်လီၤ. တၢ်ကွဲမုာ်န့ၣ် အိးထီၣ်အသး, တုၤမုၢ်မဆါတနံၤအံၤအဖၢမုၢ်န့ၣ်လီၤ.