လၢသၢနံၣ်အတီၢ်ပူၤန့ၣ် ရ့ခၠၢၣ်(လ) (Rachel) “လူၤဃုရ့လိာ်သး” ဒီးတၢ်အိၣ်ဖှိၣ်တဖုဘၣ်တဖု, ဒီးထံၣ်န့ၢ်ဝဲ တၢ်မၤလိလံာ်စီဆှံအကရူၢ်တဖု လၢအဒုးသ့ၣ်ညါအီၤ တၢ်ဂ့ၢ်လၢ အတထံၣ်န့ၢ်ဘၣ်ဝဲဒၣ် လၢလုၢ်လၢ်ထူသနူအတၢ်အိၣ်ဖှိၣ်, လၢအမ့ၢ် “ပှၤတဝၢဖိ” အဂ့ၢ်န့ၣ်လီၤ. ရ့ခၠဲၣ်(လ) မ့ၢ် ပှၤလၢအနၢ်တဟူတၢ်တဂၤန့ၣ်လီၤ. ပှၤလၢအနၢ်တအၢတဖၣ် ဘၣ်ကွၢ်ဆၢၣ်မဲာ် တၢ်ဘူၣ်တၢ်ဘါ အတၢ်ကီတၢ်ခဲဒ်သိးအံၤတဖၣ်န့ၣ် အိၣ်ဝဲဒၣ်အါမး, လၢဟီၣ်ခိၣ်ဒီဘ့ၣ်န့ၣ်လီၤ. ပှၤတဝၢဖိ လၢအနၢ်တအၢသ့ၣ်တဖၣ်အံၤ ဘူၣ်သကိးဘါသကိးတၢ်လၢဟံၣ်, ဒီးကဟုကယာ်လုၢ်ဒိၣ်ထီၣ်လိာ်သး ခီဖျိလၢတၢ်ခိးကွၢ် ပှၤနၢ်တအၢသ့ၣ်တဖၣ်အဂီၢ်, တၢ်ဘူၣ်တၢ်ဘါအတၢ်ရဲၣ်တၢ်ကျဲၤလၢ ယူၣ်ကၠူး (Youtube), ဒီးစံးကတိၤနီၤဟ့ၣ်လိာ်သး တၢ်သိၣ်လိနဲၣ်လိတဖၣ်, ဒီးအီၣ်အီသကိးတၢ်န့ၣ်လီၤ. တၢ်အိၣ်ဖှိၣ်ကရူၢ်အဆံးဖိအံၤ မၤလၢထီၣ်ပှဲၤထီၣ် ရ့ခၠဲၣ်(လ) အတၢ်ဆၢမိၣ်န့ၢ်သးလီဝဲ, တၢ်အိၣ်ဖှိၣ်အဒူၣ်ဖိထၢဖိလၢ သးစီဆှံနဲၣ်ဆှၢဝဲဒၣ်န့ၣ်လီၤ.
ပှၤတၢ်မၢဖိ စီၤပီလူး ပာ်ဖျါဆှဲထီၣ် တၢ်လၢအဒုးကဲထီၣ် ခရံာ်တၢ်အိၣ်ဖှိၣ် အပှၤတဝၢ စံးတၢ်န့ၣ် မ့ၢ်သးစီဆှံ အတၢ်ရ့လိာ်မုာ်လိာ်န့ၣ်လီၤ. ဖဲ စီၤပီလူး ဘၣ်အိၣ်ဝဲဒၣ်လၢ ဃိာ်ပူၤအကတီၢ်, တၢ်အိၣ်ဖှိၣ်ဒီးသးစီဆှံ အတၢ်ဘၣ်ထွဲလိာ်သးအဂ့ၢ်န့ၣ် ကွဲးဟ့ၣ်သဆၣ်ထီၣ်ဝဲ ဖံလံးပံၤ အတၢ်အိၣ်ဖှိၣ်န့ၣ်လီၤ. ယွၤအပှၤဂီၢ်မုၢ်လၢ အဒုးအိၣ်ထီၣ်ဝဲ, ဒီးအဲၣ်ဘၣ်ဝဲတဖု, ကအိၣ်ဒီးသူၣ်ဂ့ၢ်သးကျိၤအတၢ်ဃူတၢ်ဖိးအဂီၢ်, မုၢ်လၢ်ဝဲ, ဒီးဟ့ၣ်ဂံၢ်ဟ့ၣ်ဘါဝဲဒၣ်န့ၣ်လီၤ.
စီၤပီလူး သဆၣ်ထီၣ်ဝဲဒၣ် “ဆၢထၢၣ်လၢသုသးတဖျၢၣ်ဃီ, ဒီးလၢသုအိၣ်ဒီးသးတဖျၢၣ်ဃီ” (ဖံ ၁:၂၇) န့ၣ်လီၤ. ဒီးပာ်ဖျါအါထီၣ်ဝဲဆူညါန့ၣ် “တၢ်သဆၣ်ထီၣ်ပခံ မ့ၢ်အိၣ်လၢခရံာ်အပူၤ, တၢ်အမုာ်ဘၣ်ဃးဒီးတၢ်အဲၣ်တၢ်ကွံ မ့ၢ်အိၣ်, သးအတၢ်ရ့လိာ်မ့ၢ်အိၣ်,… ဒီးဆိကမိၣ်တၢ်တမံၤဃီအဃိဒီး, မၤလၢထီၣ်ပှဲၤထီၣ် ယတၢ်သးခုတက့ၢ်” (၂:၁-၂) န့ၣ်လီၤ.
လၢတၢ်န့ၣ်အဃိ, စီၤပီလူး စံးဝဲဒၣ်လၢ “မ်ပှၤပာ်ပှၤဂၤဂ့ၤန့ၢ် အကစၢ်ဒၣ်ဝဲတက့ၢ်. သုတကွၢ်တဂၤလၢအတၢ်ဒၣ်ဝဲ, တဂၤလၢအတၢ်ဒၣ်ဝဲတဂ့ၤ. မ်အကွၢ်တဂၤလၢပှၤဂၤအတၢ်, တဂၤလၢပှၤဂၤအတၢ်စ့ၢ်ကီးတက့ၢ်” (:၃-၄) န့ၣ်လီၤ. တၢ်ကတိၤဟ့ၣ်ကူၣ်တဖၣ်အံၤ နဲၣ်ဆှၢ ကယဲၢ်တၢ်အိၣ်ဖှိၣ်အဒူၣ်ဖိထၢဖိခဲလၢာ်သ့ဝဲဒၣ်န့ၣ်လီၤ. ခီဖျိလၢယွၤအသးစီဆှံအစိအကမီၤန့ၣ်, လၢပရ့လိာ်ဘၣ်ထွဲလိာ်သး, ဒီးပတၢ်အိၣ်ဃူလိာ်ဖိးလိာ်သးအပူၤန့ၣ် ပပှၤတဝၢဖိတဖၣ် ပမၤယွၤအတၢ်မၤ သ့ဝဲန့ၣ်လီၤ.