ယမါသးဘိ စူ (Sue) ဒီးယၤ, ပလဲၤဟးဝံၤတ့ၢ်ဝဲ တၢ်ဟးခီဂာ် မဲးကံၣ်နဲး (Mackinac) အတိၤ, လၢအဒုးဘၣ်ထွဲဘျးစဲဃာ် ကီၢ်စဲၣ် မံၣ်ခၠံၣ်ကၣ်(န) (Michigan) အဟီၣ်ကမျိၤခံတီၤ, ဒီးတၢ်ဒ့ၣ်စၢၤန့ၣ် ကအိၣ်ဝဲယဲၢ်မံးလာ်န့ၣ်လီၤ. စးထီၣ်လၢ ၁၉၅၈ နံၣ်, လၢကီၢ်အမဲရကၤန့ၣ် တနံၣ်တဘျီ, တၢ်ဟးခီဂာ်တိၤတဘိအံၤ ဖဲပှၤမၤတၢ်ဖိအမုၢ်နံၤ (Labour Day) န့ၣ် မ့ၢ်ဝဲဒၣ် ပကီၢ်စဲၣ်အထူသနူတထံၣ်န့ၣ်လီၤ. ပဆ့ၣ်နီၤအိၣ်ဘှံးဖဲ ဖီကရၢၢ်အခးဆ့ၣ်နီၤဖးထီတဖျၢၣ်အလိၤန့ၣ်လီၤ. ဖဲပကပၤန့ၣ် ပှၤပိာ်ခွါတဂၤစ့ၢ်ကီး, ဆ့ၣ်နီၤအိၣ်ဘှံးအိၣ်သါဝဲဒၣ်န့ၣ်လီၤ. တယံာ်ဘၣ်, အမါဒီးအဖိမုၣ်ဒိၣ်တုာ်ခိၣ်ပှဲၤတဂၤ ဟဲတုၤပာ်ဖှိၣ်အသး, ဒီးပသ့ၣ်ညါဘၣ်လၢ အဝဲသ့ၣ် အဟံၣ်ဖိဃီဖိန့ၣ် မ့ၢ်စ့ၢ်ကီး, ပှၤစူၢ်က့ၤနာ်က့ၤ ကစၢ်ယ့ၣ်ရှူးန့ၣ်လီၤ. အဝဲသ့ၣ်စ့ၢ်ကီး, လဲၤခီဖျိတူၢ်ဘၣ်တ့ၢ်ဝဲ အဖိမုၣ် မုၣ်လိၣ်ဘိဖိတဂၤအတၢ်သံ, ဒ်ပလဲၤခီဖျိဘၣ်တ့ၢ်လံလၢ အပူၤကွံာ်အါနံၣ်အါလါအသိးန့ၣ်လီၤ.

ပဟ့ၣ်ခီဟ့ၣ်နီၤလိာ်သး ကစၢ်ယွၤ အတၢ်ကွၢ်ထွဲစိာ်ဆှၢပှၤ လၢနံၣ်သ့ၣ်တဖၣ်အံၤအပူၤ, ဒီးဟ့ၣ်လီၤပှၤ တၢ်ဂံၢ်တၢ်ဘါ, ဒီးတၢ်စူၢ်တၢ်နာ် ဒ်လဲၣ်အဂ့ၢ်န့ၣ်လီၤ. ပမ့ၢ်ဆိကမိၣ်န့ၣ်ဒီး, လၢပှၤဟးကျဲဖိတဖၣ် အဂၤ ၃၃,၀၀၀ အကျါ, ဖဲမုၢ်နံၤအံၤန့ၣ် ပထံၣ်န့ၢ် ဟံၣ်ဖိဃီဖိတဒူၣ်, လၢအနၢ်ပၢၢ် ပတၢ်သူၣ်အုးသးအုးန့ၣ် မ့ၢ်တၢ်လီၤကမၢကမၣ်တမံၤန့ၣ်လီၤ.

ပှၤဂီၢ်မုၢ်အိၣ်ဝဲဒၣ် အါမးအကျါန့ၣ် ဟံၣ်ဖိဃီဖိခံဒူၣ်လၢ အတၢ်လဲၤခီဖျိတဖၣ်လီၤဂာ်လိာ်အသးန့ၣ် ထံၣ်လိာ်အသးလၢ တၢ်လီၢ်တပူၤဃီန့ၣ်လီၤ. တၢ်မၤအသးအံၤ, ဖျါလီၤဂာ် ဒ်ကစၢ်ယွၤစံးဘၣ်တဲဘၣ် စီၤဒၤဝံး လၢထါစံးထီၣ်ပတြၢၤ ၃၂ အပူၤအသိးန့ၣ်လီၤ. ကစၢ်ယွၤ အတၢ်မၤဘံၣ်မၤဘၢအီၤ, ဒီးအတၢ်အုာ်က့ၤခီၣ်က့ၤအီၤအဂီၢ်, စီၤဒၤဝံး ပာ်ဖျါထီၣ် အတၢ်စံးဘျုးစံးဖှိၣ် ကစၢ်ယွၤ ဝံၤန့ၣ်ဒီး, ဒိးန့ၢ်ဝဲဒၣ် ကစၢ်ယွၤ အတၢ်ကတိၤ ဟ့ၣ်ဂံၢ်ဟ့ၣ်ဘါအီၤလၢ “ယကသိၣ်က့ၤသီက့ၤနၤ, ဒီးဒုးနဲၣ်နၤလၢ ကျဲလၢနဘၣ်လဲၤ န့ၣ်လီၤ. ယကဟ့ၣ်ကူၣ်နၤလၢယမဲာ်” (:၈) န့ၣ်လီၤ.

ကစၢ်ယွၤ အံးထွဲကွၢ်ထွဲ အဖိသ့ၣ်တဖၣ်, ဒီးထုးဖှိၣ်ပာ်ဖှိၣ်ဝဲတပူၤဃီ, မ့ၢ်လၢ အဝဲသ့ၣ် ကလိၣ်ဘၣ်ဝဲ တၢ်မၤဂ့ၤမၤစၢၤလိာ်သးကဒဲကဒဲအဃိန့ၣ်လီၤ. တၢ်ဂ့ၢ်အံၤ, မ့ၢ်တၢ်လၢအဒုးနဲၣ်ပာ်ဖျါထီၣ်ဝဲဒၣ် “မ့မ့ၢ်ပှၤလၢအသန့ၤအသးလၢယွၤန့ၣ် တၢ်ဘျုးတၢ်ဖှိၣ်ကအိၣ်ဝးတရံးအီၤ” (:၁၀) န့ၣ်လီၤ.