ပှၤကၠိဖိအသးအိၣ် (၂၇) နံၣ်တဂၤ, လဲၤမၤလိတၢ်လၢကီၢ်ယပၣ်န့ၣ်,လၢတနွံအတီၢ်ပူၤ, ပှၤဘၣ်လဲၤမၤပူၤဖျဲးအသးသမူ ခံဘျီ, လၢကစၢ် Fuji အလိၤန့ၣ်လီၤ. ဖဲအလဲၤထီၣ်ဝဲ ကစၢၢ်အဆိကတၢၢ်တဘျီန့ၣ်, လၢအသးသမူအဂီၢ်, တၢ်ဘၣ်ယိၣ်အလီၢ်အိၣ်ဝဲအဃိ, ပှၤဘၣ်လဲၤမၤပူၤဖျဲး စိာ်ထီၣ်အီၤလၢ ကဘီယူၤဝံၤ, သ့ၣ်နီၣ်ထီၣ်က့ၤဝဲလၢ အလီတဲစိ, ဒီးအတၢ်ပိးတၢ်လီအဂုၤအဂၤတဖၣ် အိၣ်တ့ၢ်လၢ ကစၢၢ်ခိၣ်န့ၣ်လီၤ. လွံၢ်သီအလီၢ်ခံန့ၣ်, လၢတၢ်တကနၣ်ဃုာ်တၢ်ဟ့ၣ်ပလီၢ်တဖၣ်အပူၤန့ၣ် လဲၤကဒါက့ၤဝဲဆူ ကစၢၢ်အလိၤအဃိ, ပှၤဘၣ်လဲၤမၤပူၤဖျဲးက့ၤအီၤ ခံဘျီတဘျီ, ဒီးတၢ်တဘျီအံၤန့ၣ် တူၢ်ဘၣ်ခီၣ်ဘၣ် တၢ်လီၢ်ထီၣ်ထီန့ၢ် ပီၣ်လဲၣ်မဲာ်ဖံးခိၣ်အတၢ်ဆါ (altitude sickness) န့ၣ်လီၤ. အတၢ်ဂ့ၢ်တၢ်ကျိၤန့ၣ် ကဲထီၣ် တၢ်ကစီၣ်အဂ့ၢ်ခိၣ်တီဖးဒိၣ်လၢ တၢ်ပရၢပစၢၢ်အပူၤ, တမ့ၢ်ထဲလၢ တၢ်တညီနုၢ် မၤအသးဒ်သိးအံၤအဃိဘၣ်, မ့မ့ၢ်, လၢအဂီၢ်, အသးသမူတၢ်ဘၣ်ယိၣ်အလီၢ်အိၣ်ဝဲဒၣ်လဲာ်, သ့ၣ်ညါစ့ၢ်ကီးဝဲဘၣ်ဆၣ်, လဲၤထီၣ်ကဒါက့ၤဝဲအဃိန့ၣ်လီၤ.
တၢ်ဂ့ၢ်အံၤ ဒုးထံၣ်ဖျါက့ၤပှၤ သူၣ်ဂ့ၢ်သးကျိၤအတၢ်မ့ၢ်တၢ်နီၢ်နီၢ်, ဒီးအါစုအါဘျီန့ၣ် ပညီနုၢ်ဃာ်ကဒါက့ၤပသးဆူ တၢ်လၢကစၢ်ယွၤ အုၣ်က့ၤခီၣ်က့ၤတ့ၢ်ပှၤန့ၣ်လီၤ. စီၤယူဒၤ ပာ်ဖျါထီၣ် တၢ်လီၤဘၣ်ယိၣ်တမံၤအံၤ လၢအလံာ်ဖုၣ်အပူၤ, ကွဲးဝဲဒၣ်ဆူ တၢ်အိၣ်ဖှိၣ်တဖုလၢ အဘၣ်တၢ်မၤပျံၤမၤဖုး, ခီဖျိလၢဝံဘျၣ်သရၣ်ဘျၣ်တဖၣ်, ဒီးတၢ်ထိၣ်ဃူလဲလိာ် တၢ်အိၣ်မူသကဲာ်ပဝးတဖၣ်အဃိ, ပှၤစူၢ်က့ၤနာ်က့ၤတၢ်ဖိတဖၣ်,ဃုာ်ဒီး,ပှၤဂုၤပှၤဂၤအဂီၢ်စ့ၢ်ကီး, စီၤယူဒၤ သဆၣ်ထီၣ်ဝဲလၢ “ဒ်သိးသုကဂုာ်ကျဲးစၢးဒုးတၢ်လၢတၢ်နာ်” အဂီၢ် (၁:၃) န့ၣ်လီၤ. စီၤယူဒၤ တၤအဝဲသ့ၣ်လၢ ကထုးထီၣ်ကွံာ် ပှၤဂုၤပှၤဂၤတဖၣ်လၢ “မ့ၣ်အူပူၤ” (:၂၃), ဒီးဒီသဒၢပှၤစူၢ်က့ၤနာ်က့ၤတၢ်ဖိတဖၣ် လၢအဘၣ်ဂဲၤလိာ်ဒီးဝံဘျၣ်သရၣ်ဘျၣ်တဖၣ်န့ၣ်လီၤ. ဒ်ပမ့ၢ်, ပှၤစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ်အသိး, တမ့ၢ်လၢ ပကဘၣ်ဃၣ်ကွံာ်ပသး, ဒီးခိးကွၢ်ပှၤလၢအဘၣ်ကီဘၣ်ခဲတဖၣ်ဧိၤန့ၣ်ဘၣ်.
မုၢ်မဆါတနံၤအံၤ, ဒ်သိးပကမၤပူၤမၤဖျဲးပှၤဂုၤပှၤဂၤ, ဒီးပသုတက့ၤဆူ တၢ်လီၢ်လၢ ကစၢ်ယွၤ အုၣ်က့ၤခီၣ်က့ၤပှၤတဂ့ၤအဂီၢ်န့ၣ် ကစၢ်ယွၤကိးပှၤန့ၣ်လီၤ. ကစၢ်ယွၤအဘျုးအဖှိၣ် ကအုၣ်က့ၤခီၣ်က့ၤပှၤန့ၣ် အဘျီကအါန့ၢ်ဒံးတဘျီဘၣ်ဆၣ်, အဲၣ်ဒိးစ့ၢ်ကီးဝဲလၢ ပကဘၣ်အိၣ်မူအိၣ်ဂဲၤ, ဒ်တၢ်အုၣ်က့ၤခီၣ်က့ၤတ့ၢ်လံပှၤအသိးန့ၣ်လီၤ. ခီဖျိလၢ ယွၤအဂံၢ်အဘါန့ၣ် မ်ပကဒုးတၢ် လၢတၢ်စူၢ်တၢ်နာ်အဂီၢ်, ဒီးမၤစၢၤပှၤဂၤ, ဒ်သိးအဝဲသ့ၣ်ကသူၣ်ထီၣ် တၢ်အိၣ်မူလၢ “တၢ်နာ်စီဆှံကတၢၢ်အဖီခိၣ်” (:၂၀) န့ၣ်တက့ၢ်.