မိၣ်တဲရ့ (Monterey) ပီၣ်လဲၣ်က့ၣ်ကျီၤလၢ ကီၢ်စဲၣ် California န့ၣ်, ကဘီအခိၣ်တဂၤ ထံၣ်ဝဲ Pacific ညၣ်တီသွ့ လၢအကပၤဝါတဖၣ် တဆံယဲၢ်ဘ့ၣ်န့ၣ် လဲၤပာ်ဖှိၣ်ထီၣ်အသးဒီးညၣ်တီသွ့ဖှိၣ်ဖးဒိၣ်တဖု, အနီၢ်ဂံၢ်န့ၣ် ကအိၣ်ဝဲဒၣ် အဘ့ၣ် ခံကထိဘျဲၣ်န့ၣ်လီၤ. ညၣ်တီသွ့အါကလုာ်, လၢအသးနံၣ်လါတဒ်သိးလိာ်သးတဖၣ်, ပာ်ဖှိၣ်ထီၣ်အသး, ဒ်ညၣ်ကရူၢ်ဖးဒိၣ်အသိး, လၢတၢ်ဒီတဒၢ ညၣ်လၢအလူၤအီၣ်အဝဲသ့ၣ်တဖၣ်, ဒီးကဃုအီၣ်ဃုအီသကိးတၢ်, ဒီးကရ့လိာ်မုာ်လိာ်သးအဂီၢ်န့ၣ်လီၤ. ပှၤကထံၣ်န့ၢ်ဝဲဒၣ် ညၣ်တီသွ့ အကရူၢ်ဖးဒိၣ်, အါကလုာ်အါမၠိဒ်သိးအံၤန့ၣ် တမ့ၢ်တၢ်အညီဘၣ်န့ၣ်လီၤ.

ပတၢ်စူၢ်တၢ်နာ် အတၢ်စံၣ်စိၤတဲစိၤ အခီၣ်ထံးခီၣ်ဘိ, လၢအမ့ၢ် ပှၤကလုာ်သ့ၣ်တဖၣ် ဟဲပာ်ဖှိၣ်ထီၣ်အသး, တၢ်လၢအတညီနုၢ်မၤအသးအဂ့ၢ်န့ၣ် လံာ်စီဆှံ ကွဲးနီၣ်ပာ်ဖျါဝဲဒၣ် န့ၣ်လီၤ. ဖဲအပျဲၢ်အဘီၣ်သ့ၣ်တဖၣ် မၤဝဲဒၣ် ဘူၣ်ယဲၢ်ဆံအမုၢ်နံၤ, လၢ ဝ့ၢ် ယရူၤရှလ့ၣ်အကတီၢ်န့ၣ် “တၢ်သီၣ်လီၤဝဲသတူၢ်ကလာ်လၢမူခိၣ်, ဒ်ကလံၤမုၢ် ဟဲသီၣ်ဝဲအသိးန့ၣ်, ဒီးမၤပှဲၤထီၣ်ဟံၣ်လၢ အဝဲသ့ၣ် ဆ့ၣ်နီၤအိၣ်ဝဲလၢအပူၤ, ဒီဖျၢၣ်ညါ” (မၤတၢ် ၂:၂) န့ၣ်လီၤ.အဝဲသ့ၣ်တဖၣ်န့ၣ် “လၢထီၣ်ပှဲၤထီၣ်ဒီးသးစီဆှံ, ဒီးကတိၤတၢ်လၢ အပျ့ၤအဂၤတဖၣ်, ဒ်သးန့ၣ် ဒုးကတိၤအီၤအသိး” (:၄) န့ၣ်လီၤ. “ပှၤကိးကလုာ်ဒဲး အိၣ်လၢမူခိၣ်အဖီလာ်” လၢယွၤတ့လီၤအီၤတဖၣ်န့ၣ် ပာ်ဖှိၣ်ထီၣ်စ့ၢ်ကီးအသးလၢဘူၣ်ယဲၢ်ဆံအဂီၢ် (:၅) န့ၣ်လီၤ. ဖဲပှၤဃုသ့ၣ်ညါ တၢ်ကလုၢ်ဖးဒိၣ်န့ၣ်ဒီး, ပှၤတဂၤစုာ်စုာ်န့ၣ် “နၢ်ဟူတဂၤလၢအကလုၢ် ဒၣ်ဝဲ, တဂၤလၢအကလုၢ်ဒၣ်ဝဲ” လၢအပျဲၢ်အဘီၣ်တဖၣ်အအိၣ် (:၆) န့ၣ်လီၤ. ဝံၤန့ၣ်ဒီး, စီၤပ့းတရူး ဘိးဘၣ်သ့ၣ်ညါဝဲဒၣ်လၢ ယ့ၣ်ရှူးမ့ၢ် “ကစၢ်ဒီးခရံာ်” (:၃၆) န့ၣ်လီၤ. ပှၤကညီအဂၤသၢကထိဃၣ်ဃၣ်န့ၣ် စူၢ်က့ၤနာ်က့ၤတၢ်, ဒီးဒိးဘျၢအသး (:၄၁) န့ၣ်လီၤ. ကစၢ်ယွၤအပှၤဂီၢ်မုၢ်တဖၣ် ပာ်ဖှိၣ်ထီၣ်အသးတပူၤဃီ, လၢအပူၤကွံာ်န့ၣ် တၢ်တမၤအသးဒ်သိးအံၤ နီတဘျီဘၣ်အဆၢကတီၢ်, “ပှၤတုၤလၢတၢ်အုၣ်က့ၤခီၣ်က့ၤအီၤတဖၣ်န့ၣ် ယွၤပာ်ဖှိၣ်က့ၤဝဲလၢ တၢ်အိၣ်ဖှိၣ်အပူၤ သ့သ့တနံၤ” (:၄၇) န့ၣ်လီၤ.

ခီဖျိလၢသးစီဆှံအစိအကမီၤန့ၣ်, ယွၤအပှၤဂီၢ်မုၢ်တဖၣ် လၢဟီၣ်ခိၣ်ဒီဘ့ၣ်န့ၣ် ပာ်ဖှိၣ် ထီၣ်အသး, ဒ်သိးကဒိၣ်ထီၣ်အါထီၣ်လၢ ပှၤတဝၢအပူၤ, ဒီးစံၣ်တဲၤတဲလီၤဝဲဒၣ်လၢ ကစၢ်ယ့ၣ်ရှူး, ဒ်အမ့ၢ်ကစၢ်ယွၤန့ၣ်လီၤ. ကစၢ်ယွၤ ကမၤလဲၢ်ထီၣ် အဘီအမုၢ်ဆူညါ ခီဖျိလၢပဝဲနၤယၤတဖၣ်န့ၣ်လီၤ.