ဟဲၣ်လံ(န) (Helene) ဟၢၣ်ရံၣ်က့(န) ကလံၤမုၢ် အထံလုၣ်ဘၢတၢ် ဖဲ ၂၀၂၄ နံၣ်န့ၣ် မၤဟးဂီၤဝဲ ခဲရိၣ်လဲနၣ် ကလံၤစိး အဝ့ၢ်ဖိတဖျၢၣ်ဝံၤ, တၢ်အိၣ်ဖှိၣ်သရၣ်တဂၤ ပာ်သူၣ်ပာ်သးဝဲ တၢ်န့ၢ်ဂံၢ်န့ၢ်ဘါ အက့ၢ်ဂီၤဒိတမံၤန့ၣ်လီၤ. ဒ်အဝဲဘၣ်ဂဲၤလိာ်စံးဆၢ တၢ်သံကွၢ်လၢပှၤသံကွၢ်ဝဲတလီၢ်လီၢ်န့ၣ် “နလိၣ်ဘၣ်တၢ်မနုၤလဲၣ်” န့ၣ်လီၤ. ဖဲအဝဲလိၣ်ဘၣ် ကျိၣ်စ့သပှၢ်တၢၢ်အကတီၢ်, တၢ်ဟ့ၣ်မၤဘူၣ်တဖၣ် ဟဲတုၤဘၣ်ဆၢဘၣ်ကတီၢ်န့ၣ်လီၤ. တၢ်မၤပှဲၤ လီတဲစိ အဂံၢ်အဂီၢ်န့ၣ် လၢတၢ်တဆိကမိၣ်အပူၤန့ၣ် ပှၤတဂၤဟဲစိာ် လီမ့ၣ်အူကဟၣ်, ဒီးဒုးအိၣ်ထီၣ် လီဂံၢ်ထံးအလီၢ်အကျဲတတီၤ, ဖဲတၢ်ဘါသရိာ်န့ၣ်လီၤ. ဖဲအလိၣ်ဘၣ်ဝဲထံအီန့ၣ်ဒီး, တကီၢ်ခါန့ၣ် ထံအီအကိတဖၣ် ဟဲတုၤဝဲအါအါဂီၢ်ဂီၢ်န့ၣ်လီၤ.

တၢ်မၤအသး ဘၣ်ဆၢၣ်ဘၣ်တီၤတမံၤဧါ. တမ့ၢ်တၢ်မၤအသး, လၢအတၢ်ဒၣ်ဝဲဘၣ်. လံာ်စီဆှံ ဒုးနဲၣ်ပှၤလၢ ကစၢ်ယွၤ, “ဒီးကယဲၢ်တၢ်လၢသုန့ၢ်ဘၣ်အီၤ အလီၢ်အိၣ်တဖၣ်, ဒ်အလၤကပီၤ အတၢ်ထူးတၢ်တီၤအသိး, ယကစၢ်ကဟ့ၣ်လီၤသု လၢယ့ၣ်ရှူးခရံာ်အပူၤ” (ဖံလံး ၄:၁၉) န့ၣ်လီၤ. တၢ်အၢၣ်လီၤအံၤ, ဖျါလၢအခီပညီတအိၣ်ဝဲဒၣ် ဖဲ ဝ့ၢ်လၢ အဘၣ်တၢ်မၤဟးဂီၤကွံာ်အီၤ, ခီဖျိလၢထံဟဲထီၣ် အထီ အိၣ်ဝဲသၢဆံခီၣ်ယီၢ်, လၢအသဟီၣ်ဆူၣ်ဒိၣ်မးန့ၣ်လီၤ. ဘၣ်ဆၣ်, ဖဲ စီၤပီလူး ဟ့ၣ်ဂံၢ်ဟ့ၣ်ဘါဝဲ တၢ်ဂ့ၢ်တမံၤအံၤ အဆၢကတီၢ်, အနီၢ်ကစၢ်ဒၣ်ဝဲန့ၣ် ဘၣ်အိၣ်ဝဲလၢဃိာ်ပူၤ, ဒီးဘၣ်ကွၢ်ဆၢၣ်မဲာ် တၢ်ကီတၢ်ခဲန့ၣ်လီၤ.

ဖဲ စီၤပီလူး လိၣ်ဘၣ်ဝဲ ကျိၣ်စ့သပှၢ်တၢၢ် အဆၢကတီၢ်န့ၣ် ဖံလံးပံၤ အတၢ်အိၣ်ဖှိၣ်ဖိတဖၣ် ဟ့ၣ်မၤစၢၤအီၤအဃိ, ကွဲးစံးဘျုးစံးဖှိၣ်အဝဲသ့ၣ်န့ၣ်လီၤ. တၢ်အိၣ်ဖှိၣ်အဂၤတဖၣ် လၢအကနၣ်ဃုာ် စီၤပီလူး, ဒီးဆီၣ်ထွဲဟ့ၣ်မၤဘူၣ်တၢ် လၢအဝဲသ့ၣ်အမဲာ်ညါန့ၣ် တအိၣ်ဝဲဒၣ်နီတဖုဘၣ် (:၁၅). ဘၣ်ဆၣ်, ကစၢ်ယွၤ စူးကါအဝဲသ့ၣ် လၢတၢ်မၤလၢပှဲၤ စီၤပီလူး အတၢ်လိၣ်တဖၣ်န့ၣ်လီၤ. လၢတၢ်န့ၣ်အဃိ, အတၢ်ကတိၤတဖၣ်န့ၣ် ဆဲးကပီၤဖျါကပြုၢ်ကပြီၤလၢ ယွၤအလိၤ, ကစၢ်လၢအဟ့ၣ်လီၤ “အလၤကပီၤ အတၢ်ထူးတၢ်တီၤ,” ပဃုထံၣ်န့ၢ်ဝဲလၢ ပတၢ်အုၣ်က့ၤခီၣ်က့ၤကစၢ်ယ့ၣ်ရှူးအပူၤ, ဒီးလၢခရံာ်အပူၤန့ၣ် ပအိၣ်ဒီး “ကယဲၢ်သးအတၢ်ဆိၣ်ဂ့ၤတဖၣ်” (အ့းဖ့း ၁:၃) န့ၣ်လီၤ. ယွၤ ကတဲာ်ကတီၤ ဟ့ၣ်လီၤပှၤတဖၣ်အကျါပာ်ဃုာ်ဒီး,တၢ်သူၣ်ခုသးခု, တၢ်ဃူတၢ်ဖိး, တၢ်မ့ၢ်တၢ်တီ, ဒီးတၢ်အုၣ်က့ၤခီၣ်က့ၤတဖၣ်န့ၣ်လီၤ. လၢပသးသမူအပူၤ, ပမ့ၢ်လိၣ်ဘၣ် ထံမူန့ၣ်ဒီး, လၢတၢ်သူၣ်ကညီၤသးကညီၤအပူၤန့ၣ် အဝဲကဟ့ၣ်လီၤပှၤစ့ၢ်ကီးန့ၣ်လီၤ. မ့ၢ် ကစၢ်ယွၤ လၢအလီၤအဲၣ်လီၤကွံ, ဒီးအသူၣ်အိၣ်သးအိၣ် ဟ့ၣ်လီၤတၢ်တဂၤန့ၣ်လီၤ.