ပှၤဃုထံသ့ၣ်ညါတၢ်တဖၣ် ထံၣ်န့ၢ်ဝဲလၢ အနိလံၣ် (Anole) ခွံၣ်ထံဖိတဖၣ် အိၣ်ဝဲလၢထံကျါ, ဒီးမ့ၢ်တသါနုာ်လီၤဘၣ် ကလံၤဆှံ အမံးနံးခံဆံအတီၢ်ပူၤန့ၣ် လၢအဝဲသ့ၣ်အဂီၢ်, တၢ်ဂ့ၢ်ကီတအိၣ်ဘၣ်န့ၣ်လီၤ. ခွံၣ်ထံ အဆံးဖိတကလုာ်အံၤ အဖံးဘ့ၣ်န့ၣ် သုးစီကွံာ်ထံသ့ဝဲဒၣ်, ဒီးဖဲအဝဲသ့ၣ်ယူၤလီၤဆူ ထံယိာ်န့ၣ်ဒီး, သါဖျိးထီၣ်ကလံၤစံၣ်ပိလိဖိတဖၣ် အိၣ်စဲထီဃာ်အသး, ဖဲအနါဒ့ကပၤန့ၣ်လီၤ. ဆၣ်ဖိကီၢ်ဖိလၢ အကူၣ်သ့ကူၣ်ဘၣ်တကလုာ်အံၤ သါနုာ်လီၤက့ၤ ကလံၤဖျၢၣ်ဖိတဖၣ်တဘျီဘၣ်တဘျီ, ဒီးပှၤစဲအ့ၣ်ဖိတဖၣ် နာ်ဝဲလၢ အဝဲသ့ၣ်စူးကါကဒါက့ၤ ကလံၤလၢ အအိၣ်စဲထီဃာ်အသးတဖၣ်န့ၣ်လီၤ. ခွံၣ်ထံတဖၣ် အတၢ်လီၤဆီဒ်သိးအံၤ, မ့ၢ်အိၣ်ဝဲဘၣ်ဆၣ်, ဒ်သိးကအိၣ်မူအိၣ်ဂဲၤဝဲအဂီၢ်, ဘၣ်သါနုာ်လီၤဝဲကလံၤ, ဒ်ဆၣ်ဖိကီၢ်ဖိအဂုၤအဂၤတဖၣ်အသိးန့ၣ်လီၤ.

ဖဲ ၁ မိၤရှ့ ၂ န့ၣ် ပဖးဘၣ်လၢ ကစၢ်ယွၤ “အူသဖှိနုၢ်တၢ်မူအသါဆူ အနါဒ့ပူၤ, ဒီးပှၤကညီၤကဲထီၣ်ပှၤအသးသမူတဂၤ” (:၇) အဂ့ၢ်န့ၣ်လီၤ. ကယဲၢ်တၢ်ခဲလၢာ်လၢ “မူခိၣ်ဒီးဟီၣ်ခိၣ်” (:၄) န့ၣ် ကစၢ်ယွၤ တ့လီၤဝဲအသိး, တ့လီၤစ့ၢ်ကီးဝဲ ပှၤကညီလၢ “ဟီၣ်ခိၣ်အကမူၣ်” (:၇) န့ၣ်လီၤ. ဘၣ်ဆၣ်, ဒ်သိးအတၢ်ဘၣ်တ့ ကမူထီၣ်ဂဲၤထီၣ်လၢလၢပှဲၤပှဲၤအဂီၢ်န့ၣ် လိၣ်ဘၣ်ဝဲ ကစၢ်ယွၤ အတၢ်အူသဖှိနုာ်တၢ်မူန့ၣ်လီၤ. ကစၢ်ယွၤ ပျိာ်လဲလိာ် ပှၤကညီအဆိကတၢၢ်တဂၤဆူ ပှၤလၢအအိၣ်ဒီးအသးသမူတဂၤ, သးလၢအမူဝဲတမံၤန့ၣ်လီၤ. လၢခံန့ၣ် ကစၢ်ယွၤ တ့လီၤဝဲ နီၢ်အံၣ်အု, လၢစီၤအၤဒၣ် အဂုာ်ဃံ (:၂၂) န့ၣ်လီၤ. ဒ်ပမ့ၢ် ပှၤကညီသ့ၣ်တဖၣ်လၢ ပနီၢ်သးမူဝဲလၢပပူၤအသိးန့ၣ် ခီဖျိလၢပစူၢ်က့ၤနာ်က့ၤကစၢ်ယ့ၣ်ရှူးခရံာ်အဃိ, ပမုာ်လၤသးခုရ့လိာ်သးဒီးကစၢ်ယွၤ သ့ဝဲဒၣ်န့ၣ်လီၤ. ကစၢ်ယ့ၣ်ရှူး “သါသဖှိထီၣ်လၢ (အပျဲၢ်အဘီၣ်တဖၣ်) အလိၤ,” ဒီးစံးဝဲဒၣ်, “ဒိးန့ၢ်သးစီဆှံတက့ၢ်” (ယိၤ ၂၀:၂၂) န့ၣ်လီၤ. ပှၤကွဲးလံာ်စီဆှံအခီပညီတဂၤ, ကွဲးပာ်ဖျါဝဲလၢ “ဒ်သိးပှၤကညီသ့ၣ်တဖၣ် ကရ့လိာ်သးဒီးကစၢ်ယွၤအဂီၢ်, တၢ်သါသဖှိနုာ်လီၤသးစီဆှံန့ၣ်
အကါဒိၣ်ဝဲ, ဒီးမ့ၢ်တအိၣ်ဘၣ်ဒီးတသ့ဘၣ်န့ၣ်လီၤ.”

ပသါထီၣ်သါလီၤတဘျီစုာ်စုာ်န့ၣ် မ့ၢ်ကစၢ်ယွၤ အတၢ်ဟ့ၣ်, လၢပနီၢ်ခိအတၢ်မူတၢ်ဂဲၤအဂီၢ်န့ၣ်လီၤ. ဒ်ပမ့ၢ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, ကစၢ်ယွၤအတၢ်သါနုာ်လီၤတၢ်မူန့ၣ် ပာ်ဖျါထီၣ်က့ၤဝဲ ပသးသမူအထူအယိာ်, ဒီးယွၤအသးလၢ အဟ့ၣ်လီၤပှၤတၢ်မူန့ၣ် အိၣ်ဆိးလၢပနီၢ်ခိအပူၤ (ရိမ့ၤ ၈:၁၁) အဂ့ၢ်န့ၣ်လီၤ.