စံၣ်အံအိၣ် (CEO) ဝဲၤလီၢ်ခိၣ်နၢ် အခိၣ်ကျၢၢ်တဂၤ မၤဘၣ်ဒိဆါ ပှၤမၤတၢ်ဖိတဖၣ် အသးနးနးကျံးကျံး, လၢအတၢ်ကတိၤတဖၣ်န့ၣ်လီၤ. ပှၤထီဒါအီၤတအိၣ်ဝဲဒၣ် နီတဂၤဘၣ်. ပှၤကိးဂၤဒဲးဃုာ်ဒီး, ကၠံ(န) ဘၣ်ပျံၤအီၤန့ၣ်လီၤ. ဘၣ်ဖဲမုၢ်တနံၤ, ပှၤမၤတၢ်ဖိအသီတဂၤန့ၣ် CEO ဒူအီၤဃါအီၤ ဒိၣ်ဒိၣ်မုၢ်မုၢ်အဃိ, အမဲာ်ထံလီၤဝဲဒၣ်န့ၣ်လီၤ. ကၠံ(န) ထံၣ်ဝဲဒၣ် ပှၤအိၣ်လၢဒၢးပူၤ ကိးဂၤဒဲးန့ၣ် တသီၣ်တသဲနီၤတဂၤဘၣ်အဃိ, ကၠံ(န) နုာ်လီၤစံးကတိၤထီဒါဝဲ CEO န့ၣ်လီၤ.
ကၠံ(န) ပာ်ဖျါထီၣ်က့ၤဝဲလၢ, “ယစံးဘၣ်တဲဘၣ်အီၤန့ၣ် တၢ်ကတိၤလၢအဝဲစံးကတိၤရ့လိာ်သးဒီးပှၤကညီတဖၣ်န့ၣ် တမ့ၢ်ကျိၤကျဲအဂ့ၤအဘၣ်ဘၣ်န့ၣ်လီၤ. ပှၤတဂၤစံးကတိၤထီဒါအီၤန့ၣ် မ့ၢ်တၢ်အဆိကတၢၢ်တဘျီအဃိ, ကဲထီၣ် တၢ်ကမၢကမၣ်လၢအဂီၢ်န့ၣ်လီၤ. အတၢ်အိၣ်မူန့ၣ် တဆီတလဲဝဲဘၣ်ဆၣ်, မ့ၢ်လၢယစံးဘၣ်တဲဘၣ်အီၤ ဒ်သိးအံၤအဃိ, ယသးခုဘၣ်ယဲန့ၣ်လီၤ.”
လံာ်စီဆှံ ပာ်ဖျါထီၣ်ဝဲဒၣ် ပှၤတဂၤ, ဂဲၤဆၢထၢၣ်ထီဒါ တၢ်တၤ, လၢပှၤအါဂၤ ပျံၤဝဲဒၣ်န့ၣ်လီၤ. စီၤရှးမၤ, လၢအမ့ၢ် စီၤဒၤဝံး အပှၤသုးဖိတဂၤ, လၢတၢ်အိၣ်အသးကီကီခဲခဲတဖၣ်အပူၤန့ၣ် ဟဲဝဲဒၣ်ဆူ ခါဆူညါ, ပှၤအံၣ်စရ့လးအစီၤပၤအအိၣ် (ကွၢ် ၁ ရှမူၤ ၂၃:၁၁-၁၂), ဒ်သိးကမၤနၢၤ ပှၤဖလ့ရှသးဖိတဖၣ်အဂီၢ်, ကစၢ်ယွၤ စူးကါအီၤန့ၣ်လီၤ. “ပှၤဖလ့ရှသးဖိ အိၣ်ဖှိၣ်ရိဖှိၣ်တဖု ဖဲဟီၣ်ခိၣ်အကဝီၤပှဲၤဒီးပထိးအမုၢ်, ဒီးပှၤဂီၢ်မုၢ်ဃ့ၢ်လၢ ပှၤဖလ့ရှသးဖိအမဲာ်ညါ” (၂ ရှမူၤ ၂၃:၁၁) န့ၣ်လီၤ. ထဲဒၣ် စီၤရှးမၤတဂၤ, အိၣ်ဒီးတၢ်သးဒူလၢ ကဒီဒၣ် ပှၤအံၣ်စရ့လးဖိတဖၣ် အတၢ်အီၣ်န့ၣ်လီၤ. တၢ်ဆၢထၢၣ်ထီဒါ ပှၤဖလ့ရှသးဖိတဖၣ် ထဲတဂၤဧိၤန့ၣ် မ့ၢ်တၢ်တူၢ်သံအသးဘၣ်ဆၣ်, စီၤရှးမၤ “ပာ်ဆၢထၢၣ်အသးလၢဟီၣ်ခိၣ် အကဝီၤအသးကံၢ်ပူၤ, ဒီးမၤပူၤဖျဲးတၢ်” (:၁၂) န့ၣ်လီၤ.
ယွၤ မၤစၢၤဝဲဒၣ် စီၤရှးမၤ, ဒ်သိးကမၤနၢၤဝဲ ပှၤဖလ့ရှသးဖိတဖၣ် (:၁၂) န့ၣ်လီၤ. စီၤရှးမၤ ကမ့ၢ်ဝဲဒၣ်ထဲ ပှၤအံၣ်စရ့လးဖိထဲတဂၤဧိၤ, အိၣ်ဝဲဒၣ်လၢပျီပူၤဘၣ်ဆၣ်, တမ့ၢ်ဝဲထဲတဂၤဧိၤဘၣ်. ကစၢ်ယွၤ အိၣ်ဒီးအီၤ, ဒီးယွၤဟ့ၣ်လီၤအီၤ တၢ်မၤနၢၤဖးဒိၣ်, ဖဲမုၢ်တနံၤအံၤန့ၣ်လီၤ. အကတီၢ်ကအိၣ်ဝဲဒၣ် ဖဲပကဘၣ်ဂဲၤဆၢထၢၣ်ထီဒါ တၢ်တၤ, လၢပှၤဂုၤပှၤဂၤ ပဒ့ၣ်ဟးဆှဲးဝဲန့ၣ်လီၤ. ဒ် စီၤရှးမၤ အသိး, မ်ပဟံးန့ၢ်ပလီၢ် လၢတၢ်နာ်သန့ၤ ကစၢ်ယွၤ အတၢ်အိၣ်ဒီးပှၤ, ဒီးအတၢ်မၤစၢၤပှၤန့ၣ်တက့ၢ်.