ဖဲအဝဲသ့ၣ် အိၣ်ခိးဝဲဒၣ် ပှၤကဟဲဆှၢတၢ်အီၣ်တၢ်အီအကတီၢ်, လၢစီၢ်နီၤခိၣ်ကပၤန့ၣ်ဒီး, အဒီဖိပၢ်ခံဂၤ လိာ်ကွဲ တၢ်ဃုထံၣ် ပှၤအိၣ်ခူသူၣ်တၢ်တဂၤ (hide and seek), ဒီးအဖိမုၣ် ကရ့း(စ) အိၣ်ခူသူၣ်ဝဲလၢ တၢ်အီၣ်စရီအလံာ်က့ချၢအဃိ, မဲးကၢၣ် (Michael) တဂၤ, နံၤတကဲလၢၤဘၣ်န့ၣ်လီၤ. အဖိမုၣ် ပှၤယဲၢ်နံၣ်ဖိတဂၤအံၤ, မ့ၢ်တထံၣ်ဘၣ်အပၢ်န့ၣ်ဒီး, ဆိကမိၣ်ဝဲဒၣ်လၢ အပၢ်န့ၣ် တမ့ၢ်ကထံၣ်အီၤဘၣ်န့ၣ်လီၤ. တၢ်အကတီၢ်ဖိန့ၣ် ဖျါဝဲဒ်တၢ်အခီပညီတအိၣ်တမံၤဘၣ်ဆၣ်, လၢခံန့ၣ် မဲးကၢၣ် ဆိကမိၣ်ထီၣ်က့ၤ တၢ်မၤအသးအံၤန့ၣ်ဒီး, သ့ၣ်ညါဝဲဒၣ်လၢ တၢ်လဲၤခီဖျိဖိအံၤ, အိၣ်ပှဲၤဝဲဒီးတၢ်မၤလိလုၢ်ဒိၣ်ပှ့ၤဒိၣ်န့ၣ်လီၤ. ပနာ်လၢ ပပာ်ခူသူၣ် ပတၢ်ဒဲးဘး, လၢယွၤအမဲာ်ညါန့ၣ် ဘၣ်ကသ့ဧါ. ပဆိကမိၣ်လၢ ပမ့ၢ်တထံၣ်အီၤဘၣ်န့ၣ်ဒီး, ကစၢ်ယွၤ တထံၣ်ပှၤလၢၤဘၣ်န့ၣ်ဧါ.
လံာ်ဧၤမိၣ် ၉ အပူၤန့ၣ် ကစၢ်ယွၤ ဟ့ၣ်ပလီၢ်ဝဲဒၣ် ပှၤအံၣ်စရ့လးဖိတဖၣ်လၢ အတၢ်ဒဲးဘးအဃိ, မ်အသုတဆိကမိၣ်လၢ ကပူၤဖျဲးဒီးယွၤအတၢ်စံၣ်ညီၣ်တဂ့ၤန့ၣ်လီၤ. ခီဖျိလၢဝံဧၤမိၣ်န့ၣ် ကစၢ်ယွၤ ပာ်ဖျါထီၣ် တၢ်ဂ့ၢ်အံၤ, “မ့ၢ်ပာ်ခူသူၣ်အသး… ဘၣ်ဆၣ်ဒီး … ယကဃုန့ၢ်ဒီး, ဟံးထီၣ်န့ၢ်အီၤဖဲန့ၣ်…” (:၃-၄) န့ၣ်လီၤ. တၢ်ကပူၤဖျဲးဒီး ကစၢ်ယွၤ, လၢအထံၣ်တၢ်, ဒီးသ့ၣ်ညါတၢ်ခဲလၢာ်တဂၤအံၤန့ၣ် တၢ်တအိၣ်နီၤတမံၤဘၣ်န့ၣ်လီၤ.
ဘၣ်ဆၣ်, တၢ်ဟ့ၣ်ပလီၣ်အံၤ, ဟဲစိာ်ဃုာ်ဒီး, တၢ်မုၢ်လၢ်န့ၣ်လီၤ. ကစၢ်ယွၤ အၢၣ်လီၤ အီလီၤဝဲဒၣ် တၢ်ဘှီဂ့ၤမၤဂ့ၤထီၣ်က့ၤတၢ်, “ယကဝံၣ်ဆၢထၢၣ် စီၤဒၤဝံးအဒဲလၢအလီၤပှီၢ်, ဒီးယကမၤထီၣ်က့ၤ အတၢ်လီၤပှီၢ် ယကတ့ထီၣ်က့ၤအီၤ…” (:၁၁-၁၅) န့ၣ်လီၤ. လၢအတၢ်ဒဲးဘးအဃိ, အဝဲသ့ၣ်တူၢ်ဘၣ်ခီၣ်ဘၣ်တၢ် မ့ၢ်ဝံၤန့ၣ်ဒီး, ယွၤအပှၤဂီၢ်မုၢ်တဖၣ်ကဘၣ်တၢ်မၤဂ့ၤထီၣ်က့ၤ, ဒီးယွၤအတၢ်ဆိၣ်ဂ့ၤတဖၣ် ကပှဲၤလုၣ်ကွံာ်ဝဲဒၣ်န့ၣ်လီၤ.
ဒ် ကစၢ်ယွၤ ထံၣ်ဝဲဒၣ် ပတၢ်လီၤတူၢ်လီၤကာ်တဖၣ်အသိးန့ၣ် ထံၣ်စ့ၢ်ကီးဝဲ ပတၢ်ပီၢ်ယၢ်လီၤက့ၤသးအဃိ, ဒ်သိးကပျၢ်ပတၢ်ဒဲးဘး, ဒီးကမၤဂ့ၤထီၣ်က့ၤပှၤအဂီၢ်, ကစၢ်ယွၤ အိၣ်ကတဲာ်ကတီၤပာ်အသးန့ၣ်လီၤ. တၢ်မၤမုာ်ထီၣ်က့ၤပှၤ ခီဖျိလၢတၢ်မ့ၢ်တၢ်တီအံၤအပူၤန့ၣ် မ်ပကဟံးဃာ်ဂၢၢ်ကျၢၤ ကစၢ်ယွၤ လၢအစီဝဲဆှံဝဲ, ဒီးအတီအလိၤ, လၢအိၣ်ပှဲၤဝဲဒီးတၢ်သးကညီၤ, ဒီးတၢ်ဘျုးတၢ်ဖှိၣ်တဂၤအံၤန့ၣ်တက့ၢ်.