ကၠ့(မ) ဘရဲးဒီး (Jim Braddock) န့ၣ် မ့ၢ် ပှၤလုၢ်အီၣ်အသးသမူလၢ တၢ်ထိလိာ်ကွဲ တမဲးစု (boxer) တဂၤ, ဒီးအတၢ်ထိလိာ်ကွဲတၢ်န့ၣ် တမ့ၢ်လၢအကကဲထီၣ်ပှၤထူးပှၤတီၤအဂီၢ်, ဒီးလၢတၢ်မံၤဟူသၣ်ဖျါအဂီၢ်န့ၣ်ဘၣ်. မ့မ့ၢ်, ကပာ်ဝဲဒၣ် တၢ်အီၣ်တၢ်အီတဖၣ်လၢအစီၢ်နီၤခိၣ်, ဒ်သိးအဟံၣ်ဖိဃီဖိ ကအီၣ်အီဘၣ်အဂီၢ်န့ၣ်လီၤ. တၢ်ဂီၤမူ “စ့(န)ဒရဲလၤ ပိာ်ခွါ” (Cinderella Man) ပာ်ဖျါထီၣ်ဝဲ အတၢ်မၤန့ၢ်က့ၤ တၢ်မၤနၢၤအဂ့ၢ်, ဒ်တၢ်တဲမုာ်နၢ်အသိး, တၢ်လၢအပူၤကွံာ်န့ၣ် အဝဲမၤန့ၢ်မၤနၢၤဝဲ ပှၤထိတၢ်ဖိစဲၣ်နီၤအခိၣ်ဖး လၢအတယၢၢ်ဃၢကတၢၢ် (heavyweight champion) န့ၣ်လီၤ. ဖဲအဝဲဘၣ်ကွၢ်ဆၢၣ်မဲာ်ဒီးတၢ်ဖှီၣ်တၢ်ယာ်အနးကတၢၢ်, ဖဲ ၁၉၃၀, ဟီၣ်ခိၣ်ဒီဘ့ၣ် တၢ်နးတၢ်ဖှီၣ်အတၢ်ဂ့ၢ်ကီဖးဒိၣ် (Great Depression) အကတီၢ်န့ၣ် ဒ်သိးကမၤလၢပှဲၤဝဲ အဖိသ့ၣ်တဖၣ် အတၢ်လိၣ်တဖၣ် အဂီၢ်န့ၣ် ကၠ့(မ) ဘၣ်ဆါလီၤကွံာ်ဝဲ အတၢ်ဂံၢ်ထံးတဖၣ်, အတၢ်အိၣ်ဆူၣ်အိၣ်ချ့, ဒီး အသူးသ့ၣ်အလၤကပီၤတဖၣ် တဘျီဘၣ်တဘျီန့ၣ်လီၤ. ဒ်သိးကအံးထွဲကွၢ်ထွဲဝဲ အဒူၣ်ဖိထၢဖိတဖၣ် ဂ့ၤဂ့ၤဘၣ်ဘၣ်အဂီၢ်, ပှၤလိာ်ကွဲထိသတြီၤတၢ်ဒီးအီၤတဖၣ်န့ၣ် မၤပျံၤမၤဖုးအီၤတန့ၢ်ဘၣ်. အဝဲထိလိာ်ကွဲပြၢတၢ် လၢတၢ်သူၣ်ဒူသးဒူန့ၣ်လီၤ.
တၢ်ဟ့ၣ်သါလၢ ကၠ့(မ) ပာ်လီၤတဲာ်တ့ၢ်ဝဲန့ၣ် မ့ၢ်တၢ်သးဆူၣ်ဒီတဒၢ အဒူၣ်ဖိထၢဖိန့ၣ်လီၤ. ပဝဲနၤယၤစ့ၢ်ကီး, ပအိၣ်ဒီးပှၤလၢအသးဆူၣ်ဒီတဒၢပှၤ, အၢၣ်လီၤတ့ၢ်ပှၤလၢ ကဟံးန့ၢ်ဝဲပလီၢ်, လၢတၢ်ထိလိာ်ကွဲတမဲးစု အပျံၤကဝီၤပူၤန့ၣ်လီၤ. ဖဲပှၤအံၣ်စရ့လးဖိတဖၣ် ပူၤဖျဲးထီၣ်ဝဲလၢ ကီၢ်အဲၤကူပတူး အတၢ်မၢကဲကုၢ်ဝံၤန့ၣ်ဒီး, ဘၣ်ကွၢ်ဆၢၣ်မဲာ်ဒီးဖၤရိၤ အသုးမုၢ်ဖးဒိၣ်အဃိ, အဝဲသ့ၣ် ပျံၤတၢ်ဒိၣ်မး ဒီးကိးထီၣ်ဆူ ကစၢ်ယွၤအအိၣ်, ဒီးစံးကတိၤဝဲ ဒ်ပှၤဟးဂီးဖိတဖၣ်အသိး, “ပမၤပှၤအဲၤကူပတူးဖိအတၢ်န့ၣ် ဂ့ၤန့ၢ်ပသံလၢ ပှၢ်မုၢ်ကနၢအံၤတက့ၢ်” (၂ မိၤ ၁၄:၁၂) န့ၣ်လီၤ. ဘၣ်ဆၣ်, စီၤမိၤရှ့ စံးဆၢဝဲဒၣ်လၢ တၢ်နာ်အဂၢၢ်အကျၢၤ, “ယွၤကဒုးတၢ်လၢသုဂီၢ်ဒီး, သုကဘၣ်အိၣ်ဘှီၣ်ကလာ်” (:၁၄) န့ၣ်လီၤ. ဒီးပှၤအံၣ်စရ့လးဖိ တလိၣ်မၤတၢ်နီၤတမံၤဘၣ်. ယွၤ မၤတၢ်လီၤလး, ဒီးတြူာ်ကွံာ် ဒုၣ်ဒါတဖၣ်လၢပီၣ်လဲၣ်အသးကံၢ်ပူၤ, ဒီးမၤကတၢၢ်ကွံာ်တၢ်ဒုး, တချုးလၢအစးထီၣ်ဒံးဘၣ်န့ၣ်လီၤ.
ဘၣ်တဘျီဘျီ, လၢပသးသမူအပူၤန့ၣ် ပသးကကလၢၢ်ဘၣ် ဒ်ပဘၣ်ကွၢ်ဆၢၣ်မဲာ် တၢ်ဂ့ၢ်ကီ, တၢ်မၤကွၢ်တဖၣ် (မ့) ဒ်ပဒုၣ်ပဒါ မုၢ်ကီၤလံၢ်, အပျၢ်တဖၣ် ကဟဲမၤဟးဂီၤပှၤ (ကွၢ် စံး ၉၁:၅) အသိးန့ၣ်လီၤ. ဘၣ်ဆၣ်, ကစၢ်ယွၤ အိၣ်ဒီးပှၤ (၅ မိၤ ၃၁:၆), ဒီးကဒုးတၢ်လၢပဂီၢ်, ဒီးအလီၢ်အိၣ်ဝဲဒၣ်ထဲ ပကဘၣ်အိၣ်ဃိကလာ်န့ၣ်လီၤ.