တၢ်ဒိပြၢတၢ်ဂီၤတဖၣ် အကတီၢ်တဘျီန့ၣ် ပှၤဒုးနဲၣ်ဝဲဒၣ် တၢ်ဂီၤတဖၣ် လၢအဘၣ်တၢ်တ့ဒုးအိၣ်ထီၣ်အီၤ, ခီဖျိလၢ အ့ၣ်အၣ် (AI- တၢ်ကူၣ်သ့လၢအတမ့ၢ်တၢ်နီၢ်နီၢ်) န့ၣ်လီၤ. ပှၤဟ့ၣ်ထီၣ်တၢ်ဂီၤတဖၣ် လၢဟီၣ်ခိၣ်ဒီဘ့ၣ် လၢအဘၣ်တၢ်တ့ဒုးအိၣ်ထီၣ်အီၤ, ဒ် AI အလံာ်မဲာ်ဖျၢၣ်လၢ ခီၣ်ဖၠူထၢၣ်အပူၤတဖၣ် အတၢ်ဟ့ၣ်ကူၣ်ထိၣ်ဂဲၤထီၣ်ဝဲအသိးန့ၣ်လီၤ. တၢ်ပြၢန့ၣ် ပျဲဝဲဒၣ် တၢ်ဂီၤလၢအဘၣ်တၢ်တ့ဒုးအိၣ်ထီၣ်, ခီဖျိလၢ AI တဖၣ်န့ၣ်လီၤ. တၢ်ဂီၤလၢအဒုးနဲၣ်ဝဲ ထိၣ်ကိးထံ အလွဲၢ်ဂီၤစၢ် (pink flamingo) တဘ့ၣ် ထူတလံးအသးန့ၣ် လီၤဂာ်ဒီးဖျၢၣ်ထူအိၣ်ကဝီၤဃာ်အသးလၢအဆူၣ်တဖၣ်, ဒီးအလီၢ်ခံန့ၣ် အိၣ်ဝဲဒီးမဲးဟီၣ်ကဝီၤ, ဒီးဖျါဝဲဒၣ် ဒ်တၢ်အိၣ်အသးနီၢ်နီၢ်န့ၣ် ဒိးန့ၢ်ဝဲ ခိၣ်ဖးန့ၣ်လီၤ. တၢ်ဂ့ၢ်ကီတမံၤန့ၣ် တၢ်ဂီၤလၢ အမၤနၢၤတၢ်တဘ့ၣ်အံၤ စူးကါဝဲ ထိၣ်ကိးထံ အက့ၢ်ဂီၤနီၢ်နီၢ်န့ၣ်လီၤ. လၢ AI အတၢ်ပြၢန့ၣ် ပှၤဒိတၢ်ဂီၤအံၤ နုာ်လီၤပြၢတၢ်န့ၣ်လီၤ. အတၢ်ဂီၤ “ဖလဲ(န)မ့ဝါ” (Flamingone) န့ၣ် တဖိးမံဒီးတၢ်ဘျၢအဃိ, ဘၣ်တၢ်ထုးထီၣ်ကွံာ်လၢတၢ်ပြၢန့ၣ်လီၤ.
တၢ်စံၣ်ညီၣ်, ဒီးတၢ်ပျၤထီ ကစၢ်ယ့ၣ်ရှူးခရံာ် လၢထူၣ်စုညါအလိၤ, အဂ့ၢ်န့ၣ် ဝံယရှါယၤ ပာ်ဖျါထီၣ်ဝဲဒၣ်ဖျိဖျိဖျါဖျါ, “ဒ်သိဖိလၢပှၤမိၤမၤသံအီၤအသိး” (ယရှါ ၅၃:၇) န့ၣ်လီၤ. မ့ၢ်လၢကစၢ်ယ့ၣ်ရှူးခရံာ် စံးလီၤအသး, ဒ်အမ့ၢ် မ့းရှံအၤ လၢပှၤယူဒၤဖိတဖၣ်အဂီၢ်အဃိ, ဘၣ်တၢ်ဆှၢထီၣ်အီၤဆူ ကွီၢ်ဘျီၣ်န့ၣ်လီၤ. ဘၣ်ဆၣ်, တစံးကတိၤထီဒါတၢ်ဘၣ်. “ဘၣ်တၢ်မၤအၢမၤသီအီၤ, ဘၣ်ဆၣ်ဒီးဆီၣ်လီၤအသး, ဒီးတအဲးထီၣ်အထးခိၣ်ဘၣ်” (:၇) န့ၣ်လီၤ. ဝံယရှါယၤ ပညိၣ်ပာ်ဖျါဝဲဒၣ် တၢ်ဂ့ၢ်လၢအထီဒါလိာ်သး အဒိၣ်အထီကတၢၢ်တမံၤန့ၣ်လၢ “ပှၤကညီမၤအီၤတရီတပါ, ဒီးလဲၤသဒၣ်အီၤ” (:၃) န့ၣ်လီၤ. မ့ၢ်ဝဲဒၣ်န့ၣ်လီၤ. မ့းရှံအၤ အမ့ၢ်အတီ, ကစၢ်ယွၤ အဖိခွါနီၢ်နီၢ်တဂၤန့ၣ် ဘၣ်တၢ်စူးကွံာ်ညိကွံာ်အီၤ ဒ်ပှၤလၢအလီတၢ်ဝ့ၤတၢ်တဂၤအသိးန့ၣ်လီၤ.
နၤဒီးယၤန့ၣ် ကမ့ၢ်ဝဲဒၣ် စံၣ်ညီၣ်ကွီၢ်သ့ၣ်တဖၣ်လၢ ပကဘၣ်စံၣ်ညီၣ်တဲာ်တၢ်, လၢမုၢ်တနံၤအံၤန့ၣ်လီၤ. မ့ၢ်ပကအၢၣ်လီၤတူၢ်လိာ် ကစၢ်ယ့ၣ်ရှူး ဒ်အမ့ၢ် ကစၢ်ယွၤအဖိခွါအမ့ၢ်အတီနီၢ်နီၢ်တဂၤဧါ. မ့တမ့ၢ်ဘၣ်ဒီး, မ့ၢ်ပကစူးကွံာ်ညိကွံာ်အီၤ, ဒ်ပှၤလီတၢ်ဖိတဂၤအသိးန့ၣ်ဧါ. ဘၣ်တဘျီဘျီန့ၣ် ပမ့ၢ်စူၢ်က့ၤနာ်က့ၤအီၤဒၣ်လဲာ်, တနံၤဘၣ်တနံၤ, ပတၢ်အိၣ်မူအိၣ်ဂဲၤတဖၣ်န့ၣ် ကကဲထီၣ် တၢ်စူးကွံာ်ညိကွံာ် ကစၢ်ယ့ၣ်ရှူး အတၢ်မ့ၢ်တၢ်နီၢ်နီၢ်န့ၣ်ဧါ.