လၢကီၢ်အမဲရကၤ ကီၢ်ခိၣ်တဖၣ်အကျါ, ပှၤဒိးတ့ဒိးဖျီအသး, အတၢ်အိၣ်ဂၢၢ်ဆိးကျၢၤအနံၣ်အလါ, အအါကတၢၢ်န့ၣ် မ့ၢ်ဝဲဒၣ် ကၠံၣ်မံၣ် ခါထၢၣ် (Jimmy Carter) န့ၣ်လီၤ. အဝဲဒီးအမါ, ရိစလ့ (Rosalyn) ဆီဟံၣ်ဆီဃီန့ၣ် ကအိၣ်ဝဲ အနံၣ်နွံဆံနွံနံၣ်န့ၣ်လီၤ. ဖဲပှၤသံကွၢ် ခါထၢၣ်, ဘၣ်ဃးဒီးအတၢ်ဆီဟံၣ်ဆီဃီ, လၢတၢ်အါနံၣ်အါလါအတီၢ်ပူၤ, လၢအတဟးဂီၤအတၢ်ဂ့ၢ်ခူသူၣ်န့ၣ်ဒီး, စံးဆၢဝဲဒၣ် “လၢတၢ်ဒိးတ့ဒိးဖျီသးအဂီၢ်, ဃုထၢပှၤလၢအကြၢးအဘၣ်ကတၢၢ်တဂၤန့ၣ်လီၤ.” အါန့ၢ်အန့ၣ်, တၢ်ဆီဟံၣ်ဆီဃီ, အသုတဟးဂီၤအဂီၢ်, အဝဲပာ်ဖျါထီၣ် တၢ်ဂ့ၢ်သၢထံၣ်န့ၣ် မ့ၢ်ဝဲဒၣ်, တၢ်မၤဃူမၤဖိးလိာ်က့ၤတၢ်, တၢ်ဆဲးကျိးရ့လိာ်ဘၣ်ထွဲလိာ်သး, ဒီးတၢ်အဲၣ်ထူအဲၣ်ယွၤန့ၣ်လီၤ.
အ့းဖ့းစူး ၄:၂၆ ပာ်ဖျါဝဲ တၢ်မၤဃူမၤဖိးလိာ်သးအဂ့ၢ်, “လၢသုတၢ်သးဒိၣ်ထီၣ်န့ၣ် သုတဒုးလီၤနုာ်မုၢ်တဂ့ၤ” န့ၣ်လီၤ. ခါထၢၣ် အနီၢ်ဒီမါဝၤခံဂၤ, ဟံးဃာ်ဂၢၢ်ကျၢၤတၢ်ဂ့ၢ်အံၤ ဃံးဃံးန့ၣ်လီၤ. ကၠံၣ်မံၣ် ခါထၢၣ် စံးတ့ၢ်ဝဲတဘျီန့ၣ် “ပတၢ်ဂ့ၢ်လိာ်ဘှီလိာ်သးတဖၣ်, လၢတၢ်ဒီတနံၤအဂီၢ်န့ၣ် ပမၤဘၣ်လိာ်ဘၣ်စးက့ၤဝံၤဝဲဒၣ်ခဲလၢာ်န့ၣ် ပမၤလီၤတံၢ်အီၤလၢ ဟါလီၤခီကိးမုၢ်နံၤဒဲး” န့ၣ်လီၤ. ပထံၣ်ဘၣ်စ့ၢ်ကီး, တၢ်ဂ့ၢ်ခူသူၣ် လၢအလီၤဂာ်ဒီးကစၢ်ခရံာ် ဆဲးကျိးရ့လိာ်ဘၣ်ထွဲလိာ်သးအဂ့ၢ်န့ၣ် စီၤပီလူး ကွဲးပာ်ဖျါဝဲလၢ အ့ဖ့း ၄:၃၂ အပူၤ, “ဒီးဝံသးစူၤလိာ်သုသး, သူၣ်ကညီၤသးကညီလိာ်သုသး, ပျၢ်လိာ်သုတၢ် ဒ်ယွၤအိၣ်လၢခရံာ်အပူၤ ပျၢ်သုတၢ်အသိးန့ၣ်တက့ၢ်” န့ၣ်လီၤ.
ကစၢ်ယွၤ ဆိၣ်ဂ့ၤဝဲ တၢ်ဒိးတ့ဒိးဖျီသး, ဒ်တၢ်မၤအဂ့ၤအသိး, ဘၣ်တၢ်ဒုးအိၣ်ထီၣ်ဝဲဒၣ်လၢ ကစၢ်ယွၤ (၁ မိၤ ၂:၂၄, ဧ့ၤဘြံၤ ၁၃:၄) န့ၣ်လီၤ. ကတိၤဒိ ၁၈:၂၂ ပာ်ဖျါဝဲဒၣ်လၢ တၢ်ဆီဟံၣ်ဆီဃိန့ၣ် မ့ၢ်ယွၤအတၢ်ဆိၣ်ဂ့ၤတမံၤ, “ပှၤလၢအန့ၢ်မါတဂၤန့ၣ် န့ၢ်ဘၣ်တၢ်အဂ့ၤတမံၤ, ဒီးဘၣ်ဘျုးဘၣ်ဖှိၣ်လၢယွၤ” န့ၣ်လီၤ. လၢတၢ်ဒိးတ့ဒိးဖျီသး, ဒီးလၢကယဲၢ်ကစၢ်ခရံာ် အနီၢ်ခိက့ၢ်ဂီၤ, လၢအမ့ၢ်တၢ်အိၣ်ဖှိၣ်အတၢ်ကရၢကရိအပူၤ, ကျိၤကျဲလၢပရ့လိာ်သးကဒဲကဒဲန့ၣ် ကဟ့ၣ်ဂံၢ်ဟ့ၣ်ဘါ, ဒီးကမၤဂ့ၤမၤဘျုးပှၤဂုၤပှၤဂၤတဖၣ်န့ၣ်လီၤ. ပကမ့ၢ်ဒၣ်ဝဲ ပှၤသဘျ့ဂ့ၤ, ပအိၣ်ဒီးဟံၣ်ဖိဃီဖိဂ့ၤ, ပတၢ်ကတိၤ, ဒီးပတၢ်အိၣ်မူအိၣ်ဂဲၤတဖၣ်န့ၣ် ဆဲးကပီၤဖျါထီၣ်က့ၤ ကစၢ်ခရံာ် အတၢ်အဲၣ်, ဒီးအတၢ်သူၣ်အိၣ်သးအိၣ်ပျၢ်တၢ်ဒဲးဘးတဖၣ် သ့ဝဲဒၣ်န့ၣ်လီၤ.