တၢ်အီၣ်ကျးတဖျၢၣ် လၢအတၢ်ကပီၤကဒုကယီၢ်အဖီလာ်န့ၣ် ၦၤကွၢ်ထွဲတၢ်အီၣ်ပိာ်မုၣ်ဖိတဂၤ, တၢ်အီၣ်တၢ်အီလၢ ပမၤလိာ်အီၤတဖၣ်န့ၣ် ဟံးန့ၢ်မၤနီၣ်ဝဲ ကစုဒု,လၢတၢ်သညူးသၦၢ်အပူၤန့ၣ်လီၤ. ဖဲန့ၣ်, ၦၤလၢအဟဲအီၣ်သကိးဒီးယၤန့ၣ် ဟ့ၣ်လီၤအီၤ ထိၣ်ဒံးဘိလၢအအိၣ်ဒီးတၢ်ကပီၤလၢအလိၤ, လၢတၢ်အဲၣ်တၢ်ကွံအပူၤန့ၣ်လီၤ. ဒီးတဲဘၣ်အီၤ, “ဒ်သိးကထံၣ်ဘၣ်ဝဲလၢတၢ်ခံးကျါ” အဂီၢ်န့ၣ်လီၤ.

ပိာ်မုၣ်ဖိ အမဲာ်သၣ်န့ၣ် ကပီၤထီၣ်, ဒီးအတၢ်ပာ်သူၣ်ပာ်သးန့ၣ် ဆီတလဲ အသးဆူ တၢ်သူၣ်ခုသးခုန့ၣ်လီၤ. တၢ်ဂ့ၢ်အံၤ, တၢ်အုၣ်အသးတမံၤလၢ ပိာ်မုၣ်ဖိန့ၣ်အသူၣ်ခုသးခုလၢ တၢ်ဟ့ၣ်အံၤအဃိ, ဘံးလိာ်ကွဲ မၤကပီၤထီၣ်ဝဲ, မၤလီၤပံာ်ဝဲ တဘျီဘၣ်တဘျီန့ၣ်လီၤ. ဖဲအဝဲဟးထီၣ်လၢ ပစီၢ်နီၤခိၣ်န့ၣ်ဒီး, ယတံၤသကိးန့ၣ်နံၤကမှံထီၣ်, ဒီးစံးဘၣ်ယၤကသွံဒံဖိ, “ဖဲယဟ့ၣ်လီၤအီၤထိၣ်ဒံးဘိန့ၣ်ဒီး, ယဆိကမိၣ်လၢ အသူၣ်ဖှံသးဖှံထီၣ်ဝဲဒၣ်န့ၣ်လီၤ. ယမၤသူၣ်ဖှံသးညီအီၤလၢဒီတနံၤအဂီၢ်” န့ၣ်လီၤ.

ကစၢ်ယွၤ အတၢ်ဟ့ၣ်, လၢအမ့ၢ် တၢ်ကပီၤဖိန့ၣ် မၤမုာ်မၤကပီၤထီၣ်ပမုၢ်နံၤမုၢ်သီတဖၣ်သပှၢ်တၢၢ်န့ၣ်လီၤ. ကစၢ်ယွၤ အတၢ်ဟ့ၣ်အဒိၣ်အထီကတၢၢ် တၢ်ကပီၤန့ၣ် မ့ၢ်ဝဲဒၣ် ကစၢ်ယ့ၣ်ၡူး, “တၢ်ကပီၤ ဟဲလီၤဆူဟီၣ်ခိၣ်” ဒ်သိးကအုၣ်က့ၤခီၣ်က့ၤဝဲပှၤဟီၣ်ခိၣ်ဖိတဖၣ် (ယိၤ ၃:၁၆-၁၉) အဂီၢ်န့ၣ်လီၤ. မ့ၢ်လၢ ကစၢ်ယွၤ အဲၣ်ၦၤ, ဒီးအဲၣ်ဒိးရ့လိာ်မုာ်လိာ်ဒီးပှၤအဃိ, ကတဲာ်ကတီၤန့ၢ်ၦၤ တၢ်ဟ့ၣ်အံၤန့ၣ်လီၤ. ဖဲပဒိးန့ၢ် ကစၢ်ခရံာ်, ဒ်ပတၢ်အုၣ်က့ၤခီၣ်က့ၤကစၢ်န့ၣ်ဒီး, ကစၢ်ယွၤ ကပျဲပျၢ်ကွံာ် ပတၢ်ဒဲးဘးတဖၣ်, ဒီးကဒုးအိၣ်ထီၣ် တၢ်ရ့လိာ်မုာ်လိာ်ဒီးအီၤန့ၣ်လီၤ. ကစၢ်ယ့ၣ်ၡူး မၤကပီၤထီၣ် ပတၢ်အိၣ်မူတဖၣ် လီၤထူလီၤယိာ်န့ၣ်လီၤ. ကစၢ်ယ့ၣ်ၡူး စံးဝဲဒၣ် “ယဲဒၣ်အံၤ, ယမ့ၢ်ဟီၣ်ခိၣ်အကပီၤလီၤ. ၦၤလၢအပိာ်ယခံတဖၣ်န့ၣ်, တဟးဘၣ်ဝဲလၢတၢ်ခံးကျါဘၣ်, ဒီးကန့ၢ်ဘၣ်တၢ်မူအတၢ်ကပီၤ” (ယိၤ ၈:၁၂) န့ၣ်လီၤ.

ဒ်ပမ့ၢ်ၦၤစူၢ်က့ၤနာ်က့ၤ ကစၢ်ခရံာ်တဖၣ်အသိးႇ ပမ့ၢ် “ဟီၣ်ခိၣ်အတၢ်ကပီၤ” (မး ၅:၁၄) န့ၣ်လီၤ. ဖဲပဒိးန့ၢ် ကစၢ်ယွၤ အတၢ်ဟ့ၣ်, ကတဲာ်ကတီၤန့ၢ်ပှၤ ခီဖျိလၢကစၢ်ခရံာ်န့ၣ်ဒီး, ပလဲၤတၢ်လၢ အတၢ်ကပီၤအပူၤ, ဒီး “ဒုးကပီၤထီၣ် ပတၢ်ကပီၤန့ၣ်လၢၦၤကညီအမဲာ်ညါ” (:၁၆) သ့ဝဲဒၣ်န့ၣ်လီၤ. ဒ် ကစၢ်ယ့ၣ်ၡူး မ့ၢ်ဝဲ ပတၢ်ကပီၤအဂံၢ်ထံးအသိး, မုၢ်တနံၤအံၤ, မ်ပကဒုးကပီၤထီၣ် ပတၢ်ကပီၤလၢအဂီၢ်န့ၣ်တက့ၢ်.