ဒ်ယမ့ၢ် ၦၤဒိတၢ်ဂီၤဘၣ်ဃးဟီၣ်ခိၣ်က့ၢ်ဂီၤတဂၤအသိးႇ ယဃုထံၣ်န့ၢ်ယဲ တၢ်ဂီၤတဖၣ်လၢအ့ထၢၣ်နဲးန့ၣ် ထုးန့ၢ်ယသူၣ်ယသးဒိၣ်မးန့ၣ်လီၤ. တယံာ်ဒံးဘၣ်န့ၣ် ယထံၣ်ဘၣ် “တၢ်လီၢ်လၢအလီၤကမၢကမၣ်အဒိၣ်ကတၢၢ်, အထံၣ် ၁၀ လၢကီၢ်အမဲရကၤ” န့ၣ်လီၤ. တၢ်ဂီၤလၢ ကစၢၢ်မ့ၣ်အူထံကိၢ် အထံထီၣ်ပၢၢ်န့ၣ် ဖျါဝဲဒၣ် ဒ်သိးသလၢဖးဒိၣ်တဖျၢၣ်လၢအဆဲးကပီၤထီၣ် အလွဲၢ်ဆဲးလၤအါမံၤအသိးန့ၣ်လီၤ. ၦၤဒိန့ၢ်ဝဲ Hoh Rain Forest အတၢ်ဂီၤန့ၣ် ပာ်ဖျါဝဲ သ့ၣ်ၦၢ်လၢအတီၣ်, ဒီးထံဃံၣ်တဖၣ်န့ၣ် ဖျါအိၣ်ဟဲထီၣ်လိၤလိၤလၢ (The Hobbit) တၢ်ဂီၤမူအပူၤအသိးန့ၣ်လီၤ. တၢ်ဂီၤအဃံအလၤ လၢအထုးသူၣ်ထုးသးတဘ့ၣ်န့ၣ် မ့ၢ်ဝဲဒၣ် Monument Valley အိၣ်ဝဲဒၣ်လၢ ကီၢ်စဲၣ် Arizona န့ၣ် လီၤဂာ်ဒီး မူဖျၢၣ် မါ(စ) အက့ၢ်အဂီၤအိၣ်ဖျါဖးလဲၢ်အသိးန့ၣ်လီၤ.

တၢ်ဂီၤလၢအလီၤကဟုကညီၢ်တဖၣ်အံၤ ဒုးဆိကမိၣ်ထီၣ်ယၤလၢ ပကစၢ်ယွၤ, လၢအလီၤကဟုကညီၢ်တဂၤန့ၣ်လီၤ. ထါစံးထီၣ်ပတြၢၤ ၆၈ အပူၤန့ၣ် စီၤဒၤဝံး ပာ်ဖျါထီၣ်ဝဲဒၣ် အတၢ်စံးထီၣ်ပတြၢၤ ကစၢ်ယွၤအတၢ်ကဟုကညီၢ်အဂ့ၢ်လၢ “သးဝံၣ်ထီၣ်ယွၤ……မၤကျဲတဘိလၢ ၦၤလၢအဒိးထီၣ်တၢ် လၢၦၢ်မုၢ်ကနၢတဂၤအဂီၢ်န့ၣ်တက့ၢ်” (:၄) န့ၣ်လီၤ. ၦၤကွဲးထါ ပာ်ဖျါထီၣ် ယွၤအစိကမီၤ, လၢအဒုၣ်အဒါတဖၣ်အဖီခိၣ်အဂ့ၢ်, ဒီးစံးဝဲဒၣ်လၢ “ဒ်မ့ၣ်အူခုၣ်ဘၣ်တၢ်ဟီထီၣ်ကွံာ်အီၤအသိးန့ၣ်, ဟီထီၣ်ကွံာ်” (:၂) အဝဲသ့ၣ်န့ၣ်လီၤ. ဘၣ်ဆၣ်, ယွၤအတၢ်ကဟုကညီၢ်, ဒီးအစိအကမီၤန့ၣ် တဒ်သိးလိာ်အသးဒီးအတၢ်အဲၣ်အဃိ, “မ်ယွၤလၢအဝံ ပတၢ်ဝံတၢ်ယိးတနံၤဘၣ်တနံၤန့ၣ် ဘၣ်တၢ်စံးထီၣ်ပတြၢၤအီၤ တက့ၢ်” (:၁၉) န့ၣ်လီၤ. စီၤဒၤဝံး အထါပှၤဒူပှၤဃိၤဖးထီတယုၢ်အံၤ တုၤဃီၤဝဲဒၣ်ဆူ အပတီၢ်အထီကတၢၢ်, ခီဖျိလၢအတၢ်သးဝံၣ်စံးထီၣ်ပတြၢၤ,“ယွၤဧၢႇ နမ့ၢ်တၢ်ပျံၤအလီၢ်လၢနလီၢ်စီဆှံအပူၤ” (:၃၅) န့ၣ်လီၤ.

ယဃုထံၣ်န့ၢ် တၢ်အဒိၣ်အမုၢ်, ဒီးတၢ်ရ့လိာ်သးတံၢ်နီၢ် ခံမံၤလိာ်, လၢဟီၣ်ခိၣ်က့ၢ်ဂီၤတၢ်ဂီၤတဖၣ်အပူၤန့ၣ်လီၤ. က့ၢ်ဂီၤအဃံအလၤအဒိၣ်အယိာ်, လၢယထံၣ်န့ၢ်တဖၣ်အံၤ ကတိၤလီၤတၢ်ဆူ ယသူၣ်ကံၢ်သးလဲပူၤလိၤလိၤန့ၣ်လီၤ. တၢ်ဂ့ၢ်အံၤ, ဒုးဆိကမိၣ်ယၤလၢ ဟီၣ်ခိၣ်က့ၢ်ဂီၤဃံလၤတဖၣ်န့ၣ် ဒုးထံၣ်တဖျဲးပှၤလၢ ယွၤအနီၢ်ကစၢ်ဒၣ်ဝဲ, လၢအဆဲးကပီၤဖျါထီၣ် အတၢ်ကဟုကညီၢ်ဖးဒိၣ်, ဒီးအတၢ်အဲၣ်လီၤလိၢ်လီၤလးဖးဒိၣ် ခံထံၣ်လိာ်န့ၣ်လီၤ. လၢတၢ်ထံၣ်အံၤအပူၤန့ၣ် ပကလူၤကွၢ်ဃု ကစၢ်အတၢ်ဃံတၢ်လၤ, ဆဲးကပီၤဖျါထီၣ် အသးလၢပခိၣ်ပဃၢၤ, လၢမုၢ်တနံၤအံၤန့ၣ်တက့ၢ်. ပမ့ၢ်ဃုထံၣ်န့ၢ်ဒီး, ပကစံးကတိၤကသွံဒံဖိလၢ “ယွၤဧၢႇ နကဟုကညီၢ်ဒိၣ်နီၢ်မး” န့ၣ်လီၤ.