တၢ်ကိၢ်ခါဒီတကတီၢ်ညါန့ၣ် ဖိသၣ်လၢ ပဟံၣ်လီၢ်ခံတဖၣ် လိာ်ကွဲထိၣ်ဟူးဝးအသးလၢအစုာ်ဘျးလီၤစဲၤသး (swing) အလိၤ, လၢတၢ်ဆၢကတီၢ်အါနၣ်ရံၣ်အပူၤန့ၣ်လီၤ. စုာ်အိၣ်ဘျးလီၤစဲၤလၢအဝဲသ့ၣ် ဒိးလိာ်ကွဲဝဲန့ၣ် အကလုၢ်သီၣ်ဝံသဲကလၤအၢအၢသီသီန့ၣ်လီၤ. ဘၣ်ဖဲမုၢ်နံၤတနီၤနီၤန့ၣ် ဖိသၣ်သ့ၣ်တဖၣ် ဒိးလိာ်ကွဲစုာ်န့ၣ် အကတၢၢ်တအိၣ်ဝဲဒၣ်နီတဘျီလၢၤဘၣ်. စုာ်အကလုၢ် သီၣ်ဝံသဲကလၤန့ၣ် တမၤတံာ်တာ်ဖိသၣ်တဖၣ်န့ၣ်ဘၣ်. လၢတၢ်ကအုကစွါအပူၤန့ၣ် ယတဲဘၣ် ယဝၤသးဘိလၢ ဘၣ်မနုၤအဃိ, အဝဲသ့ၣ်အမိၢ်အပၢ်တဖၣ် တတ့ၢ်နုာ်ဝဲဒၣ်သိလၢ စုာ်ပူၤလဲၣ်န့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် ယဃ့ထုကဖၣ်ယဲ, ဒီးယထံၣ်လၢ တၢ်ဆီတလဲအိၣ်ထီၣ်ဝဲလၢ ယသးကံၢ်ပူၤန့ၣ်လီၤ. ယထံၣ်ဘၣ်ယဲလၢ ဖိသၣ်တဖၣ် အတၢ်နံၤတၢ်အ့, ဒီးအတၢ်သူၣ်ခုသးခုတဖၣ်န့ၣ် အိၣ်ဟဲထီၣ် ခီဖျိလၢတၢ်နာ်န့ၢ် ဟံၣ်ဖိဃီဖိအကရၢၢ်ဖိအံၤ, ဒီးမိၢ်ပၢ်လၢ အအိၣ်ဘူးဒီးအဝဲသ့ၣ်အဃိန့ၣ်လီၤ.
ဖဲ ကစၢ်ယ့ၣ်ၡူး စံးကတိၤဝဲ ဖိသၣ်တဖၣ်အဂ့ၢ်န့ၣ် ပာ်ဖျါထီၣ်ဝဲဒၣ် တၢ်နာ်န့ၢ်တၢ်ဒ်သိးအံၤန့ၣ်လီၤ. ဒ်သိးကစၢ်ယ့ၣ်ၡူး ကဆိၣ်ဂ့ၤ ဖိသၣ်တဖၣ်အဂီၢ်န့ၣ် ၦၤဂီၢ်မုၢ်တဖၣ် ဟဲစိာ်ဝဲဒၣ် အဖိတဖၣ်ဘၣ်ဆၣ်, အပျဲၢ်အဘီၣ်တဖၣ် အသးဘၣ်တံာ်တာ်, ဒီးဒူပှၤလၢအဟဲစိာ် ဖိသၣ်တဖၣ်, ဒီးတြီဝဲဒၣ် မိၢ်ပၢ်သ့ၣ်တဖၣ် (မၢ် ၁ဝ:၁၃) န့ၣ်လီၤ.
ကစၢ်ခရံာ် ထံၣ်ဝဲ တၢ်မၤအသးအံၤန့ၣ်ဒီးႇ “တဘၣ်ဘၣ်အသးဘၣ်” (:၁၄) န့ၣ်လီၤ. ဒီးစံးဘၣ် အပျဲၢ်အဘီၣ်တဖၣ်လၢ “ပျဲဖိသၣ်တဖၣ်န့ၣ် ဟဲဆူယအိၣ်တက့ၢ်. ဒီးတြီအီၤတဂ့ၤ. အဂ့ၢ်ဒ်အံၤႇ ယွၤအဘီဖိမုၢ်ဖိမ့ၢ် ၦၤဒ်န့ၣ်အသိး” န့ၣ်လီၤ. စံးကဒီးဝဲလၢႇ “ဖဲဒၣ်ၦၤလၢအတဒိးန့ၢ်ဘၣ် ယွၤအဘီအမုၢ်ဒ်ဖိသၣ်အသိးတဂၤဂၤန့ၣ်, တနုာ်ဘၣ်လၢအပူၤ လ့ၤတက့ၤဘၣ်” (:၁၄-၁၅) န့ၣ်လီၤ.
တၢ်ဂ့ၢ်အံၤ, ကစၢ်ယ့ၣ်ရှူး သိၣ်လိနဲၣ်လိတ့ၢ်လံ အပျဲၢ်အဘီၣ်တဖၣ် ဖဲ အဝဲသ့ၣ်ဂ့ၢ်လိာ်ဘှီလိာ်အသး, လၢအဝဲသ့ၣ်အကျါ, မ့ၢ်မတၤတဂၤအဒိၣ်ကတၢၢ်လဲၣ်အဂ့ၢ်န့ၣ်လီၤ. လၢတၢ်ဂ့ၢ်အဂၤတမံၤန့ၣ် ကစၢ်ယ့ၣ်ၡူး ဟံးန့ၢ်ဖိသၣ်တဂၤ,….. ဒီးဖိးဃာ်အီၤလၢအစု, ဒီးစံးဘၣ် အပျဲၢ်အဘီၣ်တဖၣ် “ဖဲဒၣ်ၦၤလၢအတူၢ်လိာ်ဖိသၣ်ဒ်အံၤအသိးတဂၤ, လၢယမံၤအဃိန့ၣ်ဒီး, မ့ၢ်အတူၢ်လိာ်ယၤ” (၉:၃၇) န့ၣ်လီၤ. လၢတၢ်ပာ်ဖျါဆှဲထီၣ် တၢ်ထံၣ်တမံၤအံၤအဂီၢ်န့ၣ် ကစၢ်ယ့ၣ်ရှူး “စိာ်ဖိးထီၣ်အီၤ (ဖိသၣ်) လၢအစုဒုၣ်လိၤႇ ဒီးပာ်အစုလၢအလိၤႇ ဒီးဆိၣ်ဂ့ၤအီၤ” (၁ဝ:၁၆) န့ၣ်လီၤ. ပတၢ်နာ်သန့ၤ ကစၢ်ယ့ၣ်ၡူးန့ၣ် ကဘၣ်မ့ၢ်ဝဲ ဒ်ဖိသၣ်အသိးအဂ့ၢ်န့ၣ် လၢပဂီၢ်, မ့ၢ်တၢ်ဒုးသ့ၣ်နီၣ်ပှၤအဃံအလၤတထံၣ်န့ၣ်လီၤ.
