ဘၣ်တဘျီန့ၣ် ၦၤကၠၢမဲ(န)ဖိ ယွၤဂ့ၢ်ပီညါအပှၤကူၣ်သ့ ဒီးသီခါ မဲးစတၣ် အဲးခး (Meister Eckhart) တဂၤ, လၢအထါတယုၢ်အပူၤန့ၣ် ကွဲးပာ်ဖျါဝဲ “တၢ်လီတၢ်ဝ့ၤ မ့ၢ်တၢ်မၤအအၢ အသီတမံၤ,” တၢ်လီတၢ်ဝ့ၤတဖၣ်လၢ အမၤဟးဂီၤကွံာ်, တၢ်ရ့လိာ်ဘၣ်ထွဲလိာ်သးတဖၣ်လၢအဆီလီၤသူၣ်လီၤအသး, လၢတၢ်နာ်န့ၢ်ဘၣ်တမံၤအဖီခိၣ်အဂ့ၢ်န့ၣ်လီၤ. တၢ်စံးကတိၤတၢ်မ့ၢ်တၢ်တီလၢ အလီၤအဲၣ်လီၤကွံတဖၣ်န့ၣ် ပာ်ဖျါထီၣ်ဝဲ ဒ်အမ့ၢ်, “တၢ်နၢမူနၢဆှီလၢအလီၤကမၢကမၣ်တဖၣ် ဃါဃုာ်ပာ်ဖှိၣ်အသးလၢ မုၢ်နံၤမုၢ်သီတဖၣ်အပူၤ” န့ၣ်လီၤ. ဘၣ်ဆၣ်, တၢ်လီ တၢ်ဝ့ၤတဖၣ်န့ၣ် လီၤဂာ်ဒီးဟီၣ်ခိၣ်ဟူးဝးဝဲလၢပသးပူၤ, ဒီးကဲထီၣ်တၢ်စုၣ်တၢ်ပျၢ်လၢနီၢ်သး အဂီၢ်,” ပှၤလၢပအဲၣ်ဘၣ်အီၤတဂၤန့ၣ် မ့ၢ်လၢပနာ်န့ၢ်အီၤတသ့လၢၤဘၣ်အဃိ, တၢ်တဘၣ်လီၢ်ဘၣ်စး အိၣ်ထီၣ်လၢပသးပူၤ, ဒီးခီဖျိလၢပှၤတစံးကတိၤတၢ်တီတီလိၤလိၤတဂၤအဃိ, တၢ်ဟးဂူာ်ဟးဂီၤဒိၣ်ဒိၣ်မုၢ်မုၢ်အံၤ ရၤလီၤအသး” န့ၣ်လီၤ.

တၢ်ကမၤဟးဂီၤတၢ်ဒိၣ်ဒိၣ်မုၢ်မုၢ်အံၤ ရၤလီၤအသး, ခီဖျိလၢတၢ်လီတၢ်ဝ့ၤ အတၢ်ထံၣ်မှံ ဆိကမိၣ်န့ၣ် ကဖျါလီၤဆီဒိၣ်နီၢ်မးန့ၣ်လီၤ. ဘၣ်ဆၣ်, ပတၢ်ကတိၤ မ့ၢ်တၢ်အကါ့ဒိၣ်တမံၤန့ၣ်လံာ်စီဆှံဒီတဘ့ၣ် ပာ်ဖျါထီၣ်ဝဲဒၣ် ပတၢ်ကတိၤတဖၣ်, ဒီးအတၢ်မၤဘၣ်ဒိ, မၤဟးဂီၤတၢ်ဒ်လဲၣ်အဂ့ၢ်န့ၣ်လီၤ. ဖဲစီၤပီလူး ဒုးသ့ၣ်ညါဝဲ ၦၤစူၢ်က့ၤနာ်က့ၤတၢ်အသီတဖၣ်, အပူၤကွံာ်တၢ်အိၣ်မူ, ဒီးတၢ်အိၣ်မူအသီလၢ ကစၢ်ယ့ၣ်ၡူးအပူၤ, တၢ်ခံပတီၢ်အတၢ်လီၤဆီအဂ့ၢ်န့ၣ်, တၢ်စံးတၢ်ကတိၤတဖၣ်န့ၣ် မ့ၢ်တၢ်ဂ့ၢ်အကါဒိၣ်တမံၤန့ၣ်လီၤ. ပှၤကပာ်သူၣ်ပာ်သးအါထီၣ်ဝဲအဂီၢ်, ၦၤတၢ်မၢဖိ စံးဝဲဒၣ် “ကတိၤလိာ်သုသးလၢ တၢ်ကတိၤကဘျံးကဘျၣ်တဂ့ၤ. အဂ့ၢ်ဒ်အံၤႇ ၦၤလီၢ်လံၤဒီး အတၢ်မၤတဖၣ်န့ၣ် သုဘ့ၣ်လီၤကွံာ်လံ. ဒီးသုကူထီၣ်သိးထီၣ်က့ၤလံၦၤသီလၢတၢ်မၤက့ၤအီၤအသီဆူတၢ်သ့ၣ်ညါႇ ဒ်ၦၤတ့အီၤတဂၤအက့ၢ်အဂီၤအသိးန့ၣ်လံ.” (ကလီး ၃:၉-၁ဝ).

ဒ်သိးပကလီတၢ် (မ့) ပကမၤဟးဂီၤ တၢ်မ့ၢ်တၢ်တီအဂီၢ်, တၢ်ဂ့ၢ်တၢ်ကျိၤတဖၣ်လၢကလ့ပစီၦၤန့ၣ် အိၣ်ဝဲအါမးန့ၣ်လီၤ. လၢတၢ်ဒီတဒၢလီၤပသး (မ့) လၢတၢ်ဒီတဒၢပှၤဂုၤပှၤဂၤအဂီၢ်, ဘၣ်တဘျီဘျီန့ၣ် ပကဆိကမိၣ်သ့ၣ်သ့ၣ်လၢ တၢ်လီတၢ်ဝ့ၤန့ၣ် ကမ့ၢ်ဝဲဒၣ် ကျိၤကျဲအဂ့ၢ်ကတၢၢ်န့ၣ်လီၤ. ဘၣ်ဆၣ်, ခီဖျိလၢကစၢ်ခရံာ် အတၢ်အဲၣ်, ဒီးအသးစီဆှံ မၤတၢ်လၢ ပသးကံၢ်ပူၤန့ၣ်ဒီး, ပကမၤလိန့ၢ် ကျဲလီၤဆီတဘိ- တၢ်ဆီတလဲ ခီဖျိ “တၢ်သးကညီၤႇ တၢ်မၤဂ့ၤတၢ်, တၢ်ဆီၣ်လီၤသးႇ တၢ်သးစူၤႇ တၢ်ဝံသးစူၤ” (၃:၁၂) အပူၤန့ၣ်လီၤ. ဒီးပကမၤလိန့ၢ်ဝဲဒၣ် တၢ်ပျၢ်ပှၤဂၤအတၢ်ကမၣ်, ဒီးတၢ်အဲၣ်တၢ်ကွံန့ၣ် ကဒုးအိၣ်ထီၣ်ဝဲ တၢ်နာ်န့ၢ်ပှၤဂၤ, ဒီးတၢ်ဃူတၢ်ဖိးလၢကမၤမုာ်ထီၣ်က့ၤပသး (:၁၅) န့ၣ်လီၤ.