ကလဲရဲး(စ) (Clarence) မ့ၢ်ဝဲဒၣ် ပိာ်ခွါသးစၢ်လၢ ယနဲၣ်ကျဲဟ့ၣ်ကူၣ်ဟ့ၣ်ဖးတဂၤ, ဒီးယသံကွၢ်အီၤလၢ “ဖဲနဆိကမိၣ်ထီၣ်နဲ နဖိခွါအဂ့ၢ်န့ၣ်ဒီး, တၢ်လၢအမၤဖှံသူၣ်ဖှံသးနၤန့ၣ် ကမ့ၢ်တၢ်မနုၤတမံၤလဲၣ်” န့ၣ်လီၤ. လၢတၢ်ပာ်သးကဖၢလၢအပူၤန့ၣ် ပၢ်တဂၤအံၤ, စးထီၣ်တဲဝဲဒၣ် အဖိခွါ, ပှၤလွံၢ်နံၣ်ဖိတဂၤ အတၢ်မၤန့ၢ်မၤနၢၤတၢ်တဖၣ်အဂ့ၢ်န့ၣ်လီၤ. လီၤဆီဒၣ်တၢ်, တၢ်ဂ့ၢ်အိၣ်ဝဲတမံၤ, လၢအမၤမုာ်ယသးန့ၣ်လီၤ. အဖိခွါဖိအမံၤအခီၣ်ထံး, ဒီးအလီၢ်ခံန့ၣ် ဒ်သိးလိာ်အသးဒီးအပၢ်အမံၤ, အါန့ၢ်အန့ၣ်, အမဲာ်သၣ်စ့ၢ်ကီး, လီၤဂာ်ဒီးအပၢ်ဒိၣ်မးအဃိ, အပၢ်အကွဲၤဒီနၢ်ဒၣ်လဲာ်, အိးထီၣ်ဝဲလၢ အမဲာ်သၣ်အက့ၢ်အဂီၤန့ၢ်ဝဲဒၣ်န့ၣ်လီၤ.

ကစၢ်ယ့ၣ်ရှူး မ့ၢ်တၢ်တမံၤဃီဒီးအပၢ်အဂ့ၢ်န့ၣ် အဝဲပာ်ဖျါထီၣ်ဝဲဒၣ် ဖျိဖျိဖျါဖျါ, ဖဲလံာ်ယိၤဟၣ် ၁၄ အပူၤန့ၣ်လီၤ. ဖဲ စီၤဖံလံးပူး, လၢအသံကွၢ်တၢ်ဆူၣ်တဂၤန့ၣ် ဃ့ကညးအီၤလၢ, “ကစၢ်ဧၢ, ဒုးနဲၣ်ပှၤလၢပၢ်” (:၈) န့ၣ်ဒီး, ကစၢ်ယ့ၣ်ရှူးစံးဆၢက့ၤအီၤ, “စီၤဖံလံးပူၤဧၢ, ယအိၣ်တ့ၢ်ဒီးသုယံာ်ထဲအံၤဒီး, နတသ့ၣ်ညါယၤဘၣ်ဧါ. ပှၤလၢအထံၣ်ယၤန့ၣ်, မ့ၢ်အထံၣ်လံပၢ်” (:၉) န့ၣ်လီၤ. မ့ၢ်ပၢ်ကစၢ်ယွၤတဂၤ ကလီၣ်ဖျါထီၣ်အသး, လၢအဖိခွါဒ်လဲၣ်. ခီဖျိလၢကစၢ်ယ့ၣ်ရှူး “အတၢ်ကတိၤ” (:၁၀), ဒီး “အတၢ်မၤတဖၣ်” (:၁၁), လၢအဒုးနဲၣ်ဖျါထီၣ် ကစၢ်ယွၤအတၢ်အဲၣ်,
အတၢ်သူၣ်ကညီၤသးကညီၤ, အဘျုးအဖှိၣ်, ဒီးအတၢ်မၤလီၤလးတဖၣ်န့ၣ်လီၤ.

ခီဖျိလၢကစၢ်ယွၤ အသးမုာ်စီဆှံ အတၢ်ဟ့ၣ်စိဟ့ၣ်ကမီၤအပူၤန့ၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ဒိးန့ၢ်ဝဲဒၣ် ခွဲးယာ်လီၤဆီလၢ ကနီၤဟ့ၣ်ခီ တၢ်အိၣ်မူကံၢ်စီ, လၢအလီၤဂာ်ဒ်ကစၢ်ယွၤ အဟံၣ်ဒူၣ်ဃီထၢအသိးန့ၣ်လီၤ. ကစၢ်ယွၤလၢ ပထံၣ်အီၤတန့ၢ်တသ့တဂၤအံၤ, ခီဖျိလၢအဖိတဖၣ်န့ၣ် ပထံၣ်ဘၣ်အီၤသ့ဝဲန့ၣ်လီၤ. ကစၢ်ခရံာ်အတၢ်အဲၣ်အဂ့ၢ်န့ၣ် စီၤယိၤဟၣ် ဒုးသ့ၣ်နီၣ်ထီၣ်က့ၤပှၤလၢ, “ပှၤတထံၣ်ဘၣ်ယွၤနီတခီၣ်နီတဂၤဘၣ်, ပမ့ၢ်အဲၣ်လိာ်ကွံလိာ်ပသးဒီး, ဒီးယွၤအိၣ်ဝဲဆိးဝဲလၢပပူၤ, ဒီးအတၢ်အဲၣ်တၢ်ကွံလၢထီၣ်ပှဲၤထီၣ်လၢပပူၤ” (၁ ယိၤ ၄:၁၂) န့ၣ်လီၤ.