ဖဲအပၢ် ဘူးထီၣ်ကသံဝဲအကတီၢ်န့ၣ် မံးရှဲ(လ) (Michele) အသးတူၢ်ဘၣ်ခီၣ်ဘၣ် တၢ်သးသဘံၣ်ဘုၣ်န့ၣ်လီၤ. ဖဲအပၢ်စံးဘၣ်အီၤလၢ “ဖိမုၢ်ဧၢ, ဖဲနဒိးတ့ဒိးဖျီသး အကတီၢ်န့ၣ် တမ့ၢ်လၢယကအိၣ်မူအိၣ်ဂဲၤ, ဒီးဆှၢထီၣ်နၤလၢၤဘၣ်” န့ၣ်ဒီး, မံးရှဲ(လ)တဂၤ အသူၣ်အုးသးအုးဝဲဒၣ်န့ၣ်လီၤ. ဒ်အဃုထံၣ်န့ၢ်ဝဲ တၢ်မုၢ်လၢ်လၢ လံာ်ဧ့ၤဘြံၤ ၁၁ အပူၤအသိး, လၢတၢ်မၤဂၢၢ်မၤကျၢၤအတၢ်အဲၣ်, လၢအပၢ်အဂီၢ်, မံးရှဲ(လ) စံးဘၣ်တဲဘၣ်အပၢ်လၢ “နကလဲၤဆူ ထံကီၢ်လၢမူခိၣ်, ထံကီၢ်လၢ အဂ့ၤဒိၣ်န့ၢ်အန့ၣ်တက့ၢ်” န့ၣ်လီၤ. ဖဲအပၢ်သံလဲၤပူၤကွံာ်ဟီၣ်ခိၣ်ဝံၤန့ၣ်ဒီး, မံးရှဲ(လ) နာ်ဝဲဒၣ်လၢ အပၢ်န့ၣ် ကအိၣ်ဆိးဒီးကစၢ်ယွၤလီၤစိၤန့ၣ်လီၤ. ဒီးမံးရှဲ(လ) န့ၣ် ကွၢ်ထံဆိကမိၣ်က့ၤဝဲလၢ “မူခိၣ်ဘီမုၢ်န့ၣ် မ့ၢ်တၢ်လီၢ်အဂ့ၤကတၢၢ်” န့ၣ်လီၤ.
လံာ်ဧ့ၤဘြံၤန့ၣ် ပညိၣ်ဝဲဒၣ်ဆူ ပှၤယူဒၤဖိလၢအစူၢ်က့ၤနာ်က့ၤ ကစၢ်ခရံာ်တဖၣ်, ဖဲအဘၣ်ကွၢ်ဆၢၣ်မဲာ် တၢ်မၤသံ, တၢ်မၤအၢမၤနးတဖၣ် လၢထံကီၢ်တၢ်ပၢတၢ်ပြး, ဒီးတၢ်ဘူၣ်တၢ်ဘါလၢ အထီဒါပှၤခရံာ်ဖိတဖၣ်န့ၣ်လီၤ. လံာ်ဧ့ၤဘြံၤန့ၣ် ဘၣ်တၢ်ကွဲးအီၤ, တချုးတၢ်မၤဟးဂီၤ ယွၤအတၢ်လုၢ်ဟံၣ်, ဖဲ ချး.ခ.န ၇၀ အတီၢ်ပူၤ, ဒီးဝ့ၢ်ယရူၤရှလ့ၣ် လီၤဝဲဆူ ရိမ့ၤအတၢ်ပၢတၢ်ပြးန့ၣ် ကပိာ်ထွဲထီၣ်အခံသ့ၣ်သ့ၣ်န့ၣ်လီၤ. လၢတၢ်လီၤပျံၤလီၤဖုးဒိၣ်ဒိၣ်ကလဲာ်ဒ်သိးအံၤအပူၤန့ၣ် ဒ်သိးပှၤစူၢ်က့ၤနာ်က့ၤတၢ်ဖိတဖၣ် ကဟံးဃာ်ဂၢၢ်ကျၢၤ အတၢ်စူၢ်တၢ်နာ်အဂီၢ်, ပှၤကွဲးလံာ် ပာ်ဖျါမၤလီၤတံၢ်ဝဲဒၣ် “ပှၤအုၣ်အသးဂီၢ်မုၢ်ပှဲၤန့ၣ် အိၣ်ဝးတရံးပှၤသတး” (ဧ့ၤ ၁၂:၁) ဒီးဟ့ၣ်ဂံၢ်ဟ့ၣ်ဘါဝဲဒၣ်န့ၣ်လီၤ. “အဝဲသ့ၣ်ခဲလၢာ်န့ၣ် တန့ၢ်ဘၣ် တၢ်စံးပာ်ဘၣ်, မ့ၢ်အထံၣ်သကွ့ၤတၢ်တဖၣ်န့ၣ်, ဒီးဖိးဝဲ” (ဧ့ၤ ၁၁:၁၃) န့ၣ်လီၤ. အဝဲသ့ၣ်တဖၣ် အိၣ်မူဝဲလၢ တၢ်နာ်, “ဆၢန့ၢ်တၢ်လၢအဂ့ၤန့ၢ်အန့ၣ်တက့ၢ်. တၢ်ဘၣ်ဃးဒီးမူခိၣ်” န့ၣ်လီၤ. “မၤသးဒ်န့ၣ်ဒီး, ပှၤကိးယွၤလၢ အဝဲသ့ၣ်အကစၢ်န့ၣ်, ယွၤအမဲာ်တဆှးဘၣ်, အဂ့ၢ်ဒ်အံၤ, ကတဲာ်ကတီၤတ့ၢ် ဝ့ၢ်
တဖျၢၣ်လၢအဂီၢ်” (ဧ့ၤ ၁၁:၁၆) န့ၣ်လီၤ.
ဖဲအပၢ်သံဝဲအကတီၢ်န့ၣ် မံးရှဲ(လ) အသူၣ်အုးသးအုး, အသးဘၣ်ဒိဆါ ဘၣ်ဆၣ်, ဟံးဃာ်ဖိးဃာ်ဝဲ အပၢ်အိၣ်လၢမူခိၣ်တဂၤ, အတၢ်အၢၣ်လီၤအီလီၤန့ၣ်လီၤ. လၢတၢ်နာ်သန့ၤကစၢ်ယွၤအပူၤန့ၣ် ပဝဲနၤယၤစ့ၢ်ကီး, “ပထံၣ်သကွ့ၤ” ယွၤအတၢ်အၢၣ်လီၤတမံၤဃီ ဒ်သိးအံၤတဖၣ် (ဧ့ၤ ၁၁:၁၃) သ့ဝဲဒၣ်န့ၣ်လီၤ.
