ဖဲယကွၢ်ထံကွၢ်စူၣ် ခရံာ်ဒီးပှၤရှၤမရံမုၣ်ဖိ (Christ and the Woman of Samaria) အတၢ်ဂီၤခဲၣ်, ဘၣ်တၢ်တ့ခဲၣ်အီၤလၢ ပှၤဒး(ခၠ)ဖိ (Dutch) ရဲ(မ)ဘြဲးထ် (Rembrandt) န့ၣ်ဒီး, ယထံၣ်န့ၢ်ယဲ က့ၢ်ဂီၤလီၤတံၢ်လီၤဆဲးခံထံၣ်, လၢအထုးန့ၢ်ယသူၣ်ယသးန့ၣ်လီၤ. တၢ်အခီၣ်ထံးတထံၣ်, မ့ၢ်ဝဲဒၣ် ကစၢ်ခရံာ် အက့ၢ်ဂီၤန့ၣ် အိၣ်ပှဲၤဝဲဒီးတၢ်ဆီၣ်လီၤသးန့ၣ်လီၤ. ဖဲကစၢ်ယ့ၣ်ရှူး စံးကတိၤတၢ်ဒီးပှၤရှၤမရံမုၣ်အကတီၢ်န့ၣ် သကူးလီၤအသး, ဒီးပာ်အစုလၢ အသးနါပှၢ်အလိၤန့ၣ်လီၤ. မ့ၢ်လၢပှၤယူဒၤဖိတဖၣ်, ဒီးပှၤရှၤမရံဖိတဖၣ် ဂ့ၢ်လိာ်ထီဒါလိာ်သးဆူၣ်ဆူၣ်ကလဲာ်န့ၣ် ယံာ်တ့ၢ်ဝဲဒၣ်, နံၣ်လၢအကယၤတဖၣ်အဃိ, ပှၤယူဒၤဖိတဖၣ်န့ၣ် “တရ့လိာ်အသးဒီးပှၤရှၤမရံဖိတဖၣ်ဘၣ်” (ယိၤ ၄:၉) န့ၣ်လီၤ. ဘၣ်ဆၣ်, ကစၢ်ယ့ၣ်ရှူး ရ့လိာ်အသးဒီးပိာ်မုၣ်လၢပှၤထံၣ်ဆံးလဲၤကပာ်အီၤတဂၤအံၤ လၢတၢ်ယူးယီၣ်ပးကဲ, ဒီးဒ်ပှၤအိၣ်ဒီးအသူးသ့ၣ်လၤကပီၤတဂၤ (:၁၇-၁၈) န့ၣ်လီၤ.

ပိာ်မုၣ်တဂၤအံၤ အိၣ်ဒီးအတၢ်ဂ့ၢ်ကီတဖၣ်န့ၣ် ကစၢ်ယ့ၣ်ရှူး သ့ၣ်ညါဝဲဒၣ်အဃိ, ဒ်သိးကမၤလၢပှဲၤ တၢ်လၢပိာ်မုၣ်လိၣ်ဘၣ်ဝဲအဒိၣ်ကတၢၢ်တမံၤအဂီၢ်န့ၣ် ဟ့ၣ်လီၤဝဲဒၣ် “ထံမူ” (:၁၀) န့ၣ်လီၤ. တၢ်ဟ့ၣ်, လၢအမၤကဆှီထီၣ်က့ၤတၢ်, ဒီးယွၤအဘျုးအဖှိၣ်လၢ အဟ့ၣ်လီၤသးသမူန့ၣ် ပဒိးန့ၢ်အီၤသ့ဝဲဒၣ် ခီဖျိလၢတၢ်မၤဂ့ၤထီၣ်က့ၤ ပတၢ်ရ့လိာ်ဘၣ်ထွဲလိာ်သးဒီးကစၢ်ယွၤန့ၣ်လီၤ.

တၢ်ခံထံၣ်တထံၣ် လၢအထုးန့ၢ်ယသူၣ်ယသးန့ၣ် မ့ၢ်ဝဲဒၣ် တၢ်ကဒုခံးသူလၢအကးဘၢ ပိာ်မုၣ်တဂၤအံၤအမဲာ်သၣ်န့ၣ်လီၤ. က့ၢ်ဂီၤလၢအဟ့ၣ်ဒိဝဲဒၣ် ကစၢ်ယ့ၣ်ရှူးန့ၣ် မ့ၢ် မ့းရှံအၤ, (မ့) တၢ်အၢၣ်လီၤအီလီၤဘၣ်ဃးဒီးပှၤကအုၣ်က့ၤခီၣ်က့ၤ ပှၤအံၣ်စရ့လးဖိတဖၣ်န့ၣ် ဒ်သိးပိာ်မုၣ်တဂၤအံၤ ကသ့ၣ်ညါဝဲအဂီၢ်, လၢသီန့ၣ် ဘၣ်ဂုာ်ဂဲၤလိာ်ဝဲန့ၣ်လီၤ. ဖဲလၢပိာ်မုၣ်န့ၣ် စံးဘၣ် ကစၢ်ယ့ၣ်ရှူးလၢ, “ယသ့ၣ်ညါလၢမ့းၡံအၤဟဲဝဲ” (:၂၅) န့ၣ်ဒီး, ကစၢ်ယ့ၣ်ရှူး စံးဆၢက့ၤဝဲလၢ, “ယၤအံၤ, မ့ၢ်အဝဲဒၣ်” (:၂၆) န့ၣ်လီၤ. ဖဲန့ၣ်, အမဲာ်ချံ, ဒီးအသးတၢ်သ့ၣ်ညါန့ၣ် အိးထီၣ်အသး (:၂၉) န့ၣ်လီၤ.

ကစၢ်ယ့ၣ်ရှူး အတၢ်ဟ့ၣ်ဒိအံၤ ဒုးသ့ၣ်နီၣ်ထီၣ်ယၤလၢ ဖဲပထံၣ်လိာ်သးဒီးပှၤလၢတၢ်သူအသး လၢသူၣ်ဂ့ၢ်သးကျိၤတဖၣ်အကတီၢ်, ပကစံးကတိၤတၢ်ဒီးအဝဲသ့ၣ်, လၢတၢ်ဆီၣ်လီၤသး, ဒီးလၢတၢ်အဲၣ်တၢ်ကွံအပူၤ, ဒ်သိးယွၤကထုးစီကွံာ် တၢ်ကဒုလၢ “အမၤဘျီၣ်ပှၤလၢတစူၢ်တနာ်တၢ်တဖၣ်အမဲာ်” (၂ ကရံၣ် ၄:၄) အဂီၢ်, ပကဃ့ထုကဖၣ်, ဒီးဒ်သိးအဝဲသ့ၣ်တဖၣ် ကသ့ၣ်ညါနၢ်ပၢၢ်ဝဲဒၣ် ကစၢ်ခရံာ် အတၢ်ဟ့ၣ် လၢအမ့ၢ်, ထံမူလၢ ကဆီတလဲ-သးသမူန့ၣ်လီၤ.