အဲၤကူပတူး အစီၤပၤဖၤရိၤ ရၤမစံ(စ) ခံဂၤတဂၤ (Ramesses II) မ့ၢ်ပှၤပာ်ထီၣ်ထီအသးတဂၤ, ဒီးလၢတၢ်မၤလၤကပီၤက့ၤ အနီၢ်ကစၢ်အသးအဂီၢ်, တ့သူၣ်ထီၣ်ဝဲ တၢ်သူၣ်ထီၣ်တဖၣ်အါမးအကျါ, ပာ်ဃုာ်ဒီးတၢ်ဂီၤစိးပျၤတဖၣ် လၢအပာ်ဖျါအနီၢ်ကစၢ်က့ၢ်ဂီၤန့ၣ်လီၤ. တၢ်သ့ၣ်နီၣ်အတၢ်သူၣ်ထီၣ်တဖၣ်အကျါ, အနီၢ်ကစၢ်က့ၢ်ဂီၤဖးဒိၣ်န့ၣ် ဘၣ်တၢ်တ့စိးပျၤအီၤလၢ လၢၢ်လ့အလွဲၢ်ဂီၤဃံဃံလၤလၤ, ဒီးအကစီၤအထီန့ၣ် ကအိၣ်ဝဲ ၃၆ ခီၣ်ယီၢ်, ဒီး အတယၢၢ်အဃၢ ကအိၣ်ဝဲ ၈၃ တၣ်(န) (tons) န့ၣ်လီၤ. ဘၣ်ဆၣ်, သးအနံၣ်အလါန့ၣ် တသးကညီၤဝဲဒၣ် ပှၤပၢတၢ်လၢအပာ်ထီၣ်ထီသးတဂၤဘၣ်. ဖဲအသံဝဲဒၣ် အကတီၢ်န့ၣ်တူၢ်ဘၣ်ခီၣ်ဘၣ်ဝဲ မဲအတၢ်ဆါ, စုဆၢခီၣ်ဆၢညိးအတၢ်ဆါ, ဒီးသးဖျၢၣ်အတၢ်ဆါလၢအယံာ်န့ၣ်လီၤ. အတၢ်သ့ၣ်နီၣ်တၢ်သူၣ်ထီၣ်တနီၤန့ၣ် ကအိၣ်ဆိးဝဲဒၣ်တစိၢ်တလီၢ်ဖိဘၣ်ဆၣ်, ဒ်ပှၤဟီၣ်ခိၣ်ဖိအသိး, ဖၤရိၤအနီၢ်ကစၢ်ဒၣ်ဝဲ ဘၣ်သံဝဲဒၣ်န့ၣ်လီၤ.
စီၤပၤစီၤဒၤဝံး အဖိခွါ, စီၤအးဘရှလိၣ် “ပာ်ထူၣ်ကလာ်လၢအဂီၢ်ဒၣ်ဝဲ” (၂ ရှမူၤ ၁၈:၁၈) န့ၣ်လီၤ. လၢအပူၤကွံာ်, တၢ်သူၣ်အုးသးအုးအဂ့ၢ်, လၢအမၤကိၢ်ကဲၤထီၣ်အသး (ကွၢ် ၂ ရှမူၤ ၁၃), ဒီးအတၢ်အဲၣ်ဒိး ဒိၣ်စိဒိၣ်ကမီၤ, အတၢ်အဲၣ်လီၤက့ၤအသးဒၣ်ဝဲအဃိ, ပှၤသးစၢ်တဂၤအံၤ, ဟံးန့ၢ် “ဟုၣ်န့ၢ်ပှၤအံၣ်စရ့လးအပှၤကညီအသး” (၂ ရှမူၤ ၁၅:၆), လၢအပၢ်စီၤဒၤဝံးအအိၣ်န့ၣ်လီၤ. ဘၣ်ဆၣ်, ဖဲ စီၤအးဘရှလိၣ် ဂဲၤလိာ်ဟံးန့ၢ်ဆူၣ်ဝဲ စီၤပၤအလီၢ်အလၤန့ၣ်ဒီး, ကစၢ်ယွၤ တပျဲအီၤလၢ အကမၤနၢၤ စီၤဒၤဝံး, လၢအဃုထၢတ့ၢ်ဝဲတဂၤ (၁ ရှမူၤ ၁၆:၁၂-၁၃), ဃုာ်ဒီးစီၤဒၤဝံးအပှၤသူးဖိတဖၣ် (၂ ရှမူၤ ၁၈:၆) န့ၣ်လီၤ. အကတၢၢ်န့ၣ် မ့ၢ်လၢအတၢ်ပာ်သး, ဒီးအတၢ်မၤ တတီတလိၤဝဲအဃိ, စီၤအးဘရှလိၣ်န့ၣ် ဘၣ်တၢ်မၤသံအီၤန့ၣ်လီၤ. စီၤအးဘရှလိၣ် ပာ်ထူၣ်ကလာ်လၢအဂီၢ်ဒၣ်ဝဲဘၣ်ဆၣ်, ဘၣ်သံဝဲလၢ တၢ်လၤတၢ်ကပီၤတအိၣ်အပူၤ, ဒီးဘၣ်တၢ်မၤနၢၤအီၤ (:၁၈) န့ၣ်လီၤ.
လၢတၢ်ပာ်သးကဖၢလၢအပူၤ, တၢ်တ့ဘှီ တၢ်သ့ၣ်နီၣ်ထီၣ်အပနီၣ်တဖၣ်လၢပဂီၢ်, ဒီးတၢ်မၤန့ၢ်မၤလၢပှဲၤ ပတၢ်သးကွံတဖၣ်န့ၣ် အကျဲကတၢၢ်ဝဲဒၣ်လၢ တၢ်တဃံတလၤအပူၤန့ၣ်လီၤ. ဘၣ်ဆၣ်, ဖဲပမၤယွၤအတၢ်မၤ, လၢတၢ်ဆီၣ်လီၤသးအပူၤ, ဒီးပမ့ၢ်အဲၣ်ကစၢ်ယွၤ လၢသူၣ်ကံၢ်သးလဲ (ဖံလံး ၂:၃-၈) န့ၣ်ဒီး, ပကဃုထံၣ်န့ၢ် တၢ်အိၣ်မူအခီပညီ, ဒီးသးအတၢ်လၢတၢ်ပှဲၤအမ့ၢ်အတီန့ၣ်လီၤ.