လၢ ဝ့ၢ်ဘီးစတၢၣ် (Boston), အိ(လ) နီး(သ) ခၠဲး (Old North Church) တၢ်ဘါသရိာ် အဒူၣ်လိၤန့ၣ် ပှၤတ့ခဲၣ်မၤဃံမၤလၤ မူခိၣ်ကလူးသ့ၣ်တဖၣ် ကွၢ်လီၤတၢ် လၢထးလၢတၢ်ဖးဖီ အတၢ်ဂီၤန့ၣ် အိၣ်ဆိးဝဲဒၣ်ဖဲန့ၣ် ယံာ်တ့ၢ်လံဘၣ်ဆၣ်, ပှၤလၢအအိၣ်မူအိၣ်ဂဲၤတဖၣ်န့ၣ် တထံၣ်ဘၣ်ဝဲဒၣ် နီတဂၤဘၣ်. မ့ၢ်လၢတၢ်ဂီၤတဖၣ် ဘၣ်တၢ်မၤဘၢအီၤလၢ ကသံၣ်ဖှူ အကထြၢတဖၣ်အကထြၢ, အါန့ၢ်နံၣ်လၢအပူၤကွံာ်တကယၤဘျဲၣ်န့ၣ်လီၤ. တၢ်အိၣ်ဖှိၣ်အတၢ်ကွဲးနီၣ် ပာ်ဖျါဝဲဒၣ်လၢ တၢ်တ့သူၣ်ထီၣ် တၢ်ဘါသရိာ် ဖဲ ၁၇၃ဝ နံၣ်န့ၣ် တၢ်အိၣ်ဖှိၣ်ဖိတဂၤ မၤဝဲလံာ်စၢတၢ်အၢၣ်လီၤ (contract) လၢကဖှူဝဲဒၣ် ကသံၣ်လၢတၢ်ဘါသရိာ်အဂီၢ်န့ၣ်လီၤ. မ့ၢ်လၢတၢ်ဘှီဂ့ၤထီၣ်က့ၤ တၢ်ဘါသရိာ်အတၢ်ဖံးတၢ်မၤအဃိ, ဖဲ ၂ဝ၁၇ နံၣ်, တၢ်တယံာ်ဒံးဘၣ်န့ၣ် ပှၤထံၣ်န့ၢ်က့ၤ မူခိၣ်ကလူးတဖၣ်န့ၣ်လီၤ.

လံာ်စီဆှံ ပာ်ဖျါဝဲ က့ၢ်ဂီၤမူတဖၣ် လၢအလဲၤတလၢကွံာ် န့ဆၢၣ်အတၢ်အိၣ်အသးတဖၣ် (supernatural beings) ဒ်တၢ်အမ့ၢ်အတီ, ဒီးတမ့ၢ်တၢ်တ့ခဲၣ် ဒုးအိၣ်ထီၣ်လၢၦၤကညီအတၢ်ဆိကမိၣ်အပူၤဘၣ်. တၢ်သ့ၣ်တဖၣ်အံၤအိၣ်ဝဲနီၢ်နီၣ်, ဒီးၦၤကညီ အဂၤတဖၣ် တပာ်သူၣ်ပာ်သးဝဲဒၣ်ဘၣ်န့ၣ်လီၤ. တၢ်မၤအသးတဘျီလၢ, ဝံအလံၤၡါဘၣ်တၢ်ကဝီၤဃာ်အီၤလၢ စူၤရံစီၤပၤအသုးမုၢ်န့ၣ်လီၤ. ဖဲစီၤအလံၤၡါ အခ့အၦၤ ထံၣ်ဝဲဒၣ် သုးမုၢ်လၢ အဟဲထီဒါအဝဲသ့ၣ်န့ၣ်ဒီး, ကိးထီၣ်ဝဲ “အၣ်လါႇ ယကစၢ်ဧၢႇ ပကမၤဒ်လဲၣ်” (၂စီၤ ၆:၁၅) န့ၣ်လီၤ. ဝံ စံးဆၢက့ၤအီၤလၢ “ပျံၤတၢ်တဂ့ၤႇ ၦၤအိၣ်ဒီးၦၤအံၤအါန့ၢ် ၦၤအိၣ်ဒီးအီၤတက့ၢ်” (:၁၆) န့ၣ်လီၤ. ဒ်သိးယွၤကအိးထီၣ် အခ့အၦၤအမဲာ်အဂီၢ်, ဝံအလံၤၡါ ဃ့ဘါထုကဖၣ်ဝဲ, ဒီးအခ့အၦၤန့ၣ် “ထံၣ်တၢ်ဒီးကွၢ်ကွၢ်, ကစၢၢ်ကလိၦဲၤဝဲဒီးကသ့ၣ်မ့ၣ်အူႇ ဒီးလ့ၣ်ကဟၣ် မ့ၣ်အူအိၣ်ဝးတရံးဝံအလံၤၡါ” (:၁၇) န့ၣ်လီၤ.

မူခိၣ်ကလူးတဖၣ်န့ၣ် မ့ၢ် “သးလၢအဒိးမၢအသး ဒ်သိးအကမၤ တၢ်အခ့အၦၤအတၢ်လၢ ၦၤလၢအကန့ၢ်ဘၣ်သါတၢ်အုၣ်က့ၤခီၣ်က့ၤတဖၣ်အဂီၢ်” (ဧ့ၤဘြံၤ ၁:၁၄), ဒီးဒ်သိးကမၤစၢၤၦၤအဂီၢ်, မ့ၢ်ၦၤစိာ်တၢ်ကစီၣ်တဖၣ်လၢ ကစၢ်ယွၤဆှၢလီၤဝဲဒၣ်န့ၣ်လီၤ. ပထံၣ်ဘၣ်ဂ့ၤ, ပတထံၣ်ဂ့ၤန့ၣ် မူခိၣ်ကလူးတဖၣ် အိၣ်ဝဲဒၣ်ဖဲန့ၣ်, ဒ်သိးကစၢ်ယွၤ ကအိၣ်ခိးကွၢ်လီၤၦၤအဂီၢ်န့ၣ် အဝဲအိၣ်ဒီးကျိၤကျဲအါမံၤ, အါန့ၢ်ဒံးပဆိကမိၣ်သ့ဝဲဒၣ်န့ၣ်လီၤ. ဒီးမ့ၢ်လၢတၢ်ဂ့ၢ်တထံၣ်အံၤအဃိ, ဒ်မူခိၣ်ကလူးတဖၣ် မၤဝဲအသိး, ကြၢးလၢ ပကစံးထီၣ်ပတြၢၤအီၤန့ၣ်လီၤ.