တၣ်(န)စတဲ(န) (Tungsten) န့ၣ် မ့ၢ်ဂာ်စီလၢ အိၣ်ဒီးအကံၢ်အစီထီဒါလိာ်သး တကလုာ်န့ၣ်လီၤ. ဂာ်စီလၢအကဆှီတဖၣ် (pure element) အကျါ, တၣ်(န)စတဲ(န)န့ၣ်
တၢ်ထဲးယူာ်ထီၣ်အီၤန့ၢ်ဝဲဒၣ်အအါကတၢၢ်န့ၣ်လီၤ. လၢတၢ်န့ၣ်အဃိ, ပှၤကထုးတဲာ်မၤတဲာ်အီၤအဂီၢ်န့ၣ် ကီဝဲခဲဝဲဒိၣ်မးန့ၣ်လီၤ. ဘၣ်ဆၣ်, (Mead Metal website) ပာ်ဖျါဝဲဒၣ် “မ့မ့ၢ်လၢတၢ်ဒိတီၢ်အီၤတကပၤန့ၣ် ဂာ်တကလုာ်အံၤ တူၢ်ဝဲတန့ၣ်ဘၣ်. ကၠီးဒိၣ်မးအဃိ, တၢ်မ့ၢ်ဒိတီၢ်အီၤန့ၣ်ဒီး, ကၢ်ဟးဂီၤညီ” ဝဲဒၣ်န့ၣ်လီၤ. တၢ်လၢအမၤသးစဲပှၤန့ၣ် တၣ်(န)စတဲ(န) န့ၣ် မ့ၢ်ဂာ်စီတကလုာ် လၢအကျၢၤကတၢၢ်ဘၣ်ဆၣ်, အိၣ်ဒီးအတၢ်ဂံၢ်စၢ်ဘါစၢ်တဖၣ် လၢအကၠီးဒိၣ်မးအဃိ, တၢ်မ့ၢ်ဒိတီၢ်အီၤန့ၣ်ဒီး, ဟးဂီၤညီဝဲဒၣ်န့ၣ်လီၤ.
ပှၤဟီၣ်ခိၣ်ဖိတဖၣ် ပာ်ဖျါထီၣ်ဝဲ အက့ၢ်အဂီၤအသူးအသ့ၣ် ဒ်သိးအံၤတဖၣ်န့ၣ်လီၤ. ပမ့ၢ်အိၣ်ဒီးတၢ်ဂံၢ်ဆူၣ်ဘါဆူၣ်လၢ နီၢ်ခိနီၢ်သးခံကပၤလိာ်အပူၤဘၣ်ဆၣ်, ဟီၣ်ခိၣ်လၢ အဟးဂီၤတဖျၢၣ်အံၤ အတၢ်ဝံဃၢအဖီလာ်န့ၣ် ပဟးဂီၤကၢ်ဘျဲးဝဲဒၣ်ညီညီဖိန့ၣ်လီၤ. စီၤပီလူး အနီၢ်ကစၢ်ဒၣ်ဝဲန့ၣ် လဲၤခီဖျိဘၣ်တၢ်ဒ်သိးအံၤန့ၣ်လီၤ. ဖဲလံာ် ၂ ကရံၣ်သူး အဆၢဒိၣ်တဆံတၢအပူၤန့ၣ် ပာ်ဖျါထီၣ် အတၢ်လဲၤခီဖျိလၢ အမၤလီၤဘှံးလီၤဘှါအီၤတဖၣ် (:၂၃-၂၉) န့ၣ်လီၤ. ဘၣ်ဆၣ်, ကစၢ်ယွၤ ဟ့ၣ်ဂံၢ်ဟ့ၣ်ဘါအီၤလၢ “ယဘျုးယဖှိၣ် အါလံလၢနဂီၢ်လံ, အဂ့ၢ်ဒ်အံၤ, ယစိယကမီၤ လၢထီၣ်ပှဲၤထီၣ်လၢ တၢ်အဂံၢ်စၢ်အဘါစၢ်အပူၤ” န့ၣ်လီၤ. စီၤပီလူး ပာ်လီၤအသးကျၢၤမုဆှု, ဒီးစံးဝဲဒၣ်လၢ “ဒ်သိးခရံာ်အစိအကမီၤ ကအိၣ်ကဆိးလၢယလိၤဒီး, ယသးခုဒီး, ယကပာ်ယသးကဖၢလၢ လၢယဂံၢ်စၢ်ဘါစၢ်အဃိ” (၂ ကရံၣ် ၁၂:၉) န့ၣ်လီၤ.
ဖဲလံာ် ၂ ကရံၣ်သူး အပူၤ, တၢ်မဲာ်ညါန့ၣ် စီၤပီလူး ပာ်ဖျါတ့ၢ်ဝဲလၢ “တၢ်မၤတံာ်တာ်ပှၤလၢ တၢ်ကိးမံၤဒဲးဘၣ်ဆၣ်ဒီး, တၢ်ဆီၣ်အံၣ်လီၤပတၢ်တမ့ၢ်ဘၣ်” (၄:၈) န့ၣ်လီၤ. ဟီၣ်ခိၣ်ချၢအံၤ, လၢပဂီၢ်ကီခဲဝဲဒၣ်ဒိၣ်မးန့ၣ် ကစၢ်ယွၤ အဖိလၢ အဂံၢ်ဘါဆူၣ်ကတၢၢ်တဖၣ်ဒၣ်လဲာ်, သ့ၣ်ညါဝဲဂ့ၤဂ့ၤဘၣ်ဘၣ်န့ၣ်လီၤ. ဘၣ်ဆၣ်, တၢ်မုၢ်လၢ် အိၣ်ဝဲဒၣ်န့ၣ်လီၤ. ဒ်သိးပတူၢ်တၢ်ကန့ၢ်အဂီၢ်, ပသန့ၤလီၤပသးလၢ ယွၤအဘျုးအဖှိၣ်အစိအကမီၤ, လၢတၢ်သူၣ်ခုသးခုအပူၤန့ၣ်လီၤ. ဒ်စီၤပီလူးအသိး, ဒ်သိးကစၢ်ယွၤအစိအကမီၤ ကစိာ်ဆှၢပှၤအဂီၢ်, မ်ပကတူၢ်လိာ်ဟံးဃာ် ပတၢ်ဂံၢ်စၢ်ဘါစၢ်တဖၣ်န့ၣ်တက့ၢ်.