ပှၤတ့ဒုးအိၣ်ထီၣ် ဟီၣ်ခိၣ်မဲာ်သၣ်က့ၢ်ဂီၤ စဲၣ်နီၤ ပံယဲး အူဒီး (Piet Oudolf) ပာ်ဖျါဝဲလၢ “ဖီသ့ၣ်တဖၣ် အတၢ်ဃံတၢ်လၤန့ၣ် တမ့ၢ်လၢဖီထီၣ်ဖးထီၣ်မး” ဘၣ်န့ၣ်လီၤ. ဖဲတၢ်ဂိၢ်ခါ တၢ်ခုၣ်အနးကတၢၢ်အကတီၢ်ဒၣ်လဲာ်, ပှၤဒးခၠ (Dutch) ဖိလၢအကွၢ် တၤသၣ်လီၢ်တဂၤ တ့ဒုးအိၣ်ထီၣ်က့ၢ်ဂီၤဒိ  လၢအဒိးန့ၢ်တၢ်လၤကပီၤတဖၣ်န့ၣ် ဖျါဃံဖျါလၤထုးန့ၢ်သူၣ်န့ၢ်ဒိၣ်မးန့ၣ်လီၤ. အူဒီး စံးဝဲလၢ “တၢ်လၢနတဆိကမိၣ်တဖၣ် အပူၤန့ၣ် တၢ်ဃံတၢ်လၤအိၣ်ဝဲဒၣ်ဘၣ်ဆၣ်, ပှၤတနီၤန့ၣ် တတူၢ်လိာ်ဝဲဒၣ်ဘၣ်. ဖဲ နစံးကတိၤပာ်ဖျါထီၣ် ယအဲၣ်တၢ်အမုၢ်ဖိလၢ အသံ, အတဒိၣ်ထီၣ်တဖၣ်န့ၣ်ဒီး, မ့ၢ်လၢပှၤကညီတဖၣ်တအဲၣ်ဒိးဝဲဒၣ် တၢ်မုၢ်တၢ်ဘိလၢအသံတဖၣ်အဃိ, ကဲထီၣ်တၢ်ဂ့ၢ်ကီ” န့ၣ်လီၤ.

အူဒီး ပာ်လုၢ်ပာ်ပှ့ၤဝဲ သ့ၣ်မုၢ်ဝၣ်ဘိတဖၣ် အတၢ်မူလဲၤတရံးအသးအံၤ ဒ်သိးလိာ်အသးဒီးသူၣ်ဂ့ၢ်သးကျိၤ အတၢ်ဘျၢမိၢ်ပှၢ်, လၢအမ့ၢ် ပသံလၢတၢ်ဒဲးဘးအပူၤဒၣ်လဲာ်, ကစၢ်ယွၤ အဲၣ်ပှၤအဖၢမုၢ်န့ၣ်လီၤ. ပှၤတၢ်မၢဖိစီၤပီလူး ပာ်ဖျါဆှဲထီၣ်ဝဲလၢ, “ဖဲအမုၢ် အလါဘၣ်ဒီး ဖဲပဂံၢ်စၢ်ဘါစၢ်, ခရံာ်ဒိးသံအသးလၢ ပှၤတယူးတယီၣ်ဘၣ်ယွၤတဖၣ်အဂီၢ်” (ရိမ့ၤ ၅:၆), အတၢ်ဂ့ၢ်အံၤ မ့ၢ် “နသ့ၣ်ညါနဲဧါ.”  စီၤပီလူး စံးကဒီးဝဲဒၣ်လၢ, “မ့မ့ၢ်ဖဲပမ့ၢ်ပှၤတၢ်ဒဲးဘးဖိအဖၢမုၢ်ဒီး, ခရံာ်ဒိးသံအသးလၢပဂီၢ်သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤ” (:၈) န့ၣ်လီၤ.

ကစၢ်ယ့ၣ်ရှူး ဃုထၢအပျဲၢ်အဘီၣ် လၢအဂံၢ်စၢ်ဘါစၢ်တဖၣ်န့ၣ်လီၤ. အဝဲအီၣ်သကိးအီသကိးတၢ်ဒီး ပှၤတၢ်ဒဲးဘးဖိတဖၣ်န့ၣ်လီၤ.  အဝဲယါဘျါ ပှၤသ့ၣ်တဖၣ်လၢ အတဘၣ်တၢ်တတူၢ်လိာ်အီၤတဖၣ်န့ၣ်လီၤ. ဒ်န့ၣ်အသိး, အူဒီး “အဲၣ်ဝဲဒၣ် တၢ်မုၢ်တၢ်ဘိတဖၣ်န့ၣ် တမ့ၢ်ထဲလၢ အဖီတဖၣ်န့ၣ်ဘၣ်. မ့မ့ၢ် တၢ်မုၢ်တၢ်ဘိတဖၣ် အတၢ်မ့ၢ်တၢ်,”န့ၣ်လီၤ.လၢအခီာ်ထံး တၢ်လၢအဖျါတဂ့ၤတဝါတဖၣ်အပူၤ အဝဲဃုထံၣ်ဝဲဒၣ်တၢ်ဃံတၢ်လၤန့ၣ်လီၤ.

ပဘၣ်တၢ်တ့လီၤပှၤ ဒ်ယွၤအက့ၢ်အဂီၤအသိး, မ့ၢ်ဒၣ် ပပာ်ဖျါထီၣ် ကစၢ်ယွၤဆူ ပှၤဟီၣ်ခိၣ်ဖိသ့ၣ်တဖၣ်လၢ ပဘၣ်ထွဲဒီးကစၢ်ယွၤ,ဃုာ်ဒီးပတၢ်ဘၣ်ထွဲလိာ်သးဒီးပှၤဂုၤပှၤဂၤဒ်လဲၣ်အဂ့ၢ်န့ၣ်လီၤ. ကစၢ်ယွၤ သူၣ်လီၤပှၤ လၢအတၢ်အဲၣ်အပူၤ, ဒ်သိးပကဖီထီၣ်ဖးထီၣ်ကဒီး အသီတဘျီ, ပပၢ်ကစၢ်ယွၤ ဖၠူပှၤလၢသိ, ဒီးတဘျီန့ၣ် ပမ့ၢ်ပှၤတၢ်ဒဲးဘးဖိလၢအသံတ့ၢ်ဝဲတဖၣ်န့ၣ် ကပာ်ဖျါထီၣ် ယွၤအတၢ်ဃံတၢ်လၤဆူ ပှၤဟီၣ်ခိၣ်ဖိတဖၣ်လၢအိၣ်ခိးကွၢ်ဆၢမုၢ်လၢ် ကစၢ်ယွၤန့ၣ်လီၤ.