လၢ မံၣ်ရှံၣ်ကၣ် (Michigan) ကီၢ်စဲၣ်, အဝ့ၢ် ခၠဲၣ်စံ (Chelsea) န့ၣ် စဲရဲ(န)ဒ့းပထံၣ် (Serendipity) လံာ်လဲၢ်ကျးန့ၣ် မ့ၢ်တၢ်လီၢ်တတီၤလၢ ပှၤအါဂၤဘၣ်သူၣ်ဘၣ်သး, ဒီးအလီၢ်အိၣ်ဝဲလၢ တၢ်ကမၤလဲၢ်ထီၣ်အီၤန့ၣ်လီၤ. တၢ်သူၣ်ထီၣ်လၢ အဒိၣ်န့ၢ်လဲၢ်န့ၢ်ဒံး အခီၣ်ထံးတဖျၢၣ်ခံစးန့ၣ် လံာ်လဲၢ်ကျး အကစၢ် ဃုထံၣ်န့ၢ်ဝဲဒၣ် ဖဲတၢ်သူၣ်ထီၣ်တဖၣ် (block) အဘးခီကျဲခိၣ်န့ၣ်လီၤ. လၢတၢ်အါနံၤအါသီအပူၤ, တၢ်ကကးတံာ်ဃးလံာ်လဲၢ်အကျး, ဒီးထၢဖှိၣ်ဘိၣ်ဘံထီၣ် လံာ်လဲၢ်တဖၣ်ခဲလၢာ်အလီၢ်န့ၣ် လံာ်လဲၢ်ကျး အကစၢ်န့ၣ် အဲၣ်ဒိးဝဲလၢ တၢ်ကသုးစိာ်ဆှၢ လံာ်လဲၢ်တဖၣ်အဆိအချ့န့ၣ်လီၤ. လၢတၢ်န့ၣ်အဃိ, အဝဲဃ့တၢ်မၤစၢၤလၢ ပှၤတဝၢတဖၣ်အအိၣ်န့ၣ်လီၤ. ပှၤဟဲမၤစၢၤတၢ်တဖၣ် အါန့ၢ်အဂၤသၢကယၤန့ၣ်လီၤ. အဝဲသ့ၣ် ဆၢထၢၣ်သဃဲၤလိာ်သးအဖံဘၣ်ခိၣ်, ဒုးကဲထီၣ် ပှၤကညီစိာ်ဆှၢတၢ်အကျိၤ, ဒီးခီဖျိလၢပှၤတဂၤဘၣ်တဂၤန့ၣ် မၤဝံၤတၢ်စိာ်ဆှၢခီ လံာ်လဲၢ် အဘ့ၣ် ၉၁၀၀, လၢခံနၣ်ရံၣ် အတီၢ်ပူၤန့ၣ်လီၤ. လံာ်လဲၢ်ကျးအကစၢ် စံးဝဲဒၣ်လၢ “လံာ်လဲၢ်အကျးတဖျၢၣ်အံၤ မ့ၢ်ဝဲဒၣ် ပှၤအိၣ်ဆိးဖဲလီၢ်ကဝီၤပူၤတဖၣ် အတၢ်နီၢ်နီၢ်, ဒီးပှၤသ့ၣ်တဖၣ်န့ၣ် ပာ်ဝဲဒၣ် လံာ်လဲၢ်သ့ၣ်တဖၣ် ဒ်အမ့ၢ်အတၢ်ဒၣ်ဝဲအသိး” န့ၣ်လီၤ. လၢတၢ်သူၣ်ဆူၣ် သးဆူၣ်အပူၤန့ၣ် အဝဲသ့ၣ် ဖံးသကိးမၤသကိးတၢ်န့ၣ်လီၤ.
စီၤနဃ့မယၤ, မ့ၢ်ပှၤယူဒၤဖိလၢတၢ်နာ်န့ၢ်အီၤ, ဒီးစိာ်လီခီလၢ ပၤရၣ်အစီၤပၤအဂီၢ်တဂၤ, ဖဲအနၢ်ဟူဝဲ ဝ့ၢ်ယရူၤရှလ့ၣ် အဝ့ၢ်ခိၣ်ဒူတဖၣ် ဟးဂီၤလီၤပှီၢ်ကွံာ်ဝဲဒၣ်အဂ့ၢ်န့ၣ်ဒီး, ကိးပသူထီၣ်ဆူ ကစၢ်ယွၤ, လၢအတၢ်နဲၣ်ကျဲအဂီၢ် (နဃ့ ၁:၃-၁၁) န့ၣ်လီၤ. ဖဲ ချး.ခ.န. ၅၈၇ နံၣ် အတီၢ်ပူၤန့ၣ် ပှၤဘၤဘူၤလိၣ်ဖိတဖၣ် မၤဟးဂီၤကွံာ် ဝ့ၢ်အခိၣ်ဒူတဖၣ်န့ၣ်လီၤ. ဖဲ စီၤနဃ့မယၤ ဃိထံဃုသ့ၣ်ညါတၢ်ဝံၤန့ၣ်ဒီး, ဃ့တၢ်မၤစၢၤ လၢလီၢ်ကဝီၤအပူၤန့ၣ်လီၤ. အဝဲစံးဘၣ် ပှၤယူဒၤဖိ အခိၣ်အနၢ်တဖၣ်လၢ “သုထံၣ်တၢ်ကိၢ်တၢ်ဂီၤလၢပအိၣ်လၢ
အပူၤလီၤ. ယရူၤရှလ့ၣ် အိၣ်သယုၢ်လံ…… ဟဲ, မၤထီၣ်သကိး ယရူၤရှလ့ၣ် အခိၣ်ဒူ,…… န့ၣ်တက့ၢ် ” (၂:၁၇). အဆၢဒိၣ် ၃ ပာ်ဖျါထီၣ်ဝဲ ခိၣ်နၢ်ဒီးပှၤဝ့ၢ်ဖိတဖၣ်န့ၣ် ဝ့ၢ်ခိၣ်ဒူအကူာ်လၢအမဲာ်ညါစုာ်စုာ်တဖၣ်န့ၣ် ဘှီဂ့ၤထီၣ်က့ၤဝဲ လၢတၢ်သူၣ်ဆူၣ်သးဆူၣ်အပူၤန့ၣ်လီၤ. အဝဲသ့ၣ် ဖံးသကိးမၤသကိးတၢ်န့ၣ်လီၤ.
ခီဖျိတၢ်ဖံးသကိးမၤသကိးတၢ် လၢကစၢ်ယွၤအတၢ်နဲၣ်ကျဲ, ဒီးလၢကစၢ်ယွၤအဂံၢ်အဘါအဖီလာ်န့ၣ် ပမၤဂ့ၤမၤဘျုး ပပှၤတဝၢ သ့ဝဲဒၣ်စ့ၢ်ကီးန့ၣ်လီၤ.