တၢ်ဂီၤမူအလီၢ်လံၤ လၢအလီၤနံၤအပူၤန့ၣ် ပှၤကွဲး ခီၣ်ဖၠူထၢၣ်အတၢ်ရဲၣ်တၢ်ကျဲၤ (Programmer) စဲၣ်နီၤ, လၢအမၤကမၣ်တၢ်ထီဘိတဂၤ, ဘၣ်တၢ်ဃုထၢအီၤ ဒ်ပှၤကညီအဆိကတၢၢ်တဂၤအသိး, ကဘၣ်လဲၤဆူ မူဖျၢၣ် မါ(စ) (Mars) န့ၣ်လီၤ. ဒ်ပှၤအသးတဆးတဂၤအသိး, ပှၤတဂၤအံၤ မၤကမၣ်တၢ်ထီဘိ, ဒီးညီနုာ်စံးဝဲဒၣ် “တမ့ၢ်ယမၤဘၣ်” န့ၣ်လီၤ. ဖဲပှၤလဲၤတၢ်ဖိတဖၣ် ကစံၣ်လီၤဝဲဒၣ်ဆူ မူဖျၢၣ် မါ(စ) န့ၣ်ဒီး, တချုးလၢ အတံၤသကိး ကစံၣ်လီၤဆိဝဲဒၣ်န့ၣ် ပှၤတဂၤအံၤ အခီၣ်တလံာ်, လီၤတဲာ်ဆူ မူဖျၢၣ် မါ(စ) အလိၤန့ၣ်လီၤ. တၢ်ကတိၤအဆိကတၢၢ်တထံၣ် လၢမူဖျၢၣ် မါ(စ)အလိၤ, ဘၣ်တၢ်ကတိၤအီၤန့ၣ် မ့ၢ်ဝဲဒၣ် “တမ့ၢ်ယမၤဘၣ်” န့ၣ်လီၤ.

တၢ်ဂ့ၢ်ဖိအံၤ, မ့ၢ်တၢ်လၢအလီၤနံၤဘၣ်ဆၣ်, ပှၤကွဲးခီၣ်ဖၠူထၢၣ်အတၢ်ရဲၣ်တၢ်ကျဲၤတဂၤအံၤ အတၢ်ကတိၤန့ၣ် ကဲထီၣ်တၢ်မၤတံာ်တာ်ပှၤအသးနီၢ်နီၢ်န့ၣ်လီၤ. ဖဲလၢ ပှၤပာ်ဒ့ၣ်ပာ်ကမၣ်ပှၤတဘျီလၢ်လၢ်, အါတက့ၢ်, ပတၢ်စံးဆၢတဖၣ်န့ၣ် ကမ့ၢ်ဝဲဒၣ် “တမ့ၢ်ယမၤဘၣ်” န့ၣ်လီၤ.

ကစၢ်ယွၤ အဲၣ်ဒိးဝဲလၢ ပကဒိကနၣ်အီၤန့ၣ်လီၤ. ဘၣ်ဆၣ်, ပတမ့ၢ်ပှၤလၢ အဒိကနၣ်အီၤဘၣ်န့ၣ် ယွၤသ့ၣ်ညါဝဲစ့ၢ်ကီးန့ၣ်လီၤ. ၃ မိၤရှ့ ၂၆:၁-၁၃ အပူၤန့ၣ် ကစၢ်ယွၤ ပာ်ဖျါထီၣ် အတၢ်တိာ်ကျဲၤလၢ ပှၤအံၣ်စရ့လးဖိတဖၣ်အဂီၢ်န့ၣ်လီၤ. အပှၤဂီၢ်မုၢ် မ့ၢ်ဒိကနၣ် အတၢ်မၤလိာ်တဖၣ်န့ၣ်ဒီး, ယွၤစံးဝဲဒၣ်, “ယကကွၢ်မဲာ်သု, ဒီးယကဒုးသၣ်ထီၣ်သု, ဒီးမၤအါထီၣ်သု” (:၉) န့ၣ်လီၤ. ဘၣ်ဆၣ်, ဒ်သိးအပှၤဂီၢ်မုၢ်တဖၣ် ကပီၢ်ယၢ်လီၤက့ၤအသးအဂီၢ်, လုၢ်လၢ်လၢ အတဒိကနၣ်တၢ်န့ၣ် ကဟဲစိာ်တၢ်ဆိၣ်အၢတဖၣ်, ဒီးတၢ်နးတၢ်ဖှီၣ်တဖၣ်န့ၣ်လီၤ. ဝံၤ, ယွၤစံးဘၣ် ပှၤအံၣ်စရ့လးဖိလၢအတဒိကနၣ်တၢ်တဖၣ် မ့ၢ် “အၢၣ်လီၤအတၢ်ဒဲးဘး, ဒီးအပၢ်တဖၣ်အတၢ်ဒဲးဘး” (:၄၀) န့ၣ်ဒီး, ယွၤကသ့ၣ်နီၣ်ထီၣ်က့ၤ အတၢ်အၢၣ်လီၤအီၤလီၤဒီးအဝဲသ့ၣ်န့ၣ်လီၤ.

တၢ်မၤဂ့ၤမၤဘၣ်က့ၤ ပတၢ်ရ့လိာ်သးဒီးယွၤအဂီၢ်, တၢ်အကါဒိၣ်ကတၢၢ် မ့ၢ်ဝဲဒၣ် ပကအၢၣ်လီၤအီလီၤ တၢ်လၢပမၤကမၣ်ဘၣ်တဖၣ်န့ၣ်လီၤ. တၢ်ပာ်ဒ့ၣ်ပာ်ကမၣ်ပှၤဂၤန့ၣ် ဟံးဃာ်ဖီၣ်ဃာ်ပှၤ လၢတၢ်ဒဲးဘးအကဝီၤပူၤ, ဒီးပကအုၣ်ပသးလၢ ပတၢ်ဒဲးဘးတအိၣ်ဘၣ်န့ၣ် ပဂံၢ်ပဘါတအိၣ်ဘၣ်န့ၣ်လီၤ.

မ့ၢ်နသးကလၢၢ်ဘၣ်နဲလၢ နအိၣ်ယံၤဒီးယွၤဧါ. တၢ်အဂ့ၤကတၢၢ်လၢ နကဘၣ် စးထီၣ်မၤအီၤန့ၣ် ခီဖျိလၢပအၢၣ်လီၤ, “မ့ၢ်ဒၣ်ယမၤ” န့ၣ်လီၤ.