တၢ်ကူစါယါဘျါ နဲစံၣ် (Nancy) အခဲစၢၣ်တၢ်ဆါန့ၣ် ဒုးအိၣ်ထီၣ်ဝဲဒၣ် တၢ်ပူၤလီၢ်တဖၣ် လၢအကိာ်ပူၤ, ဒီးလၢအကိာ်ယူၢ်ပူၤအဃိ, ကအီၣ်ကိၣ်အက့ ဆံးကိာ်ဖိဒၣ်လဲာ်, ယူၢ်လီၤဝဲတန့ၢ်ဘၣ်န့ၣ်လီၤ. ဖဲတၢ်ဆူးတၢ်ဆါအမုၢ်နံၤတဖၣ်အကတီၢ်, ဒ်သိးကမၤပှဲၤအဟၢဖၢအဂီၢ်, ဘၣ်အီဝဲထဲ တၢ်နုၢ်ထံန့ၣ်လီၤ. နဲစံၣ် လၢအသးအိၣ် ဃုဆံတဂၤ, အမဲာ်သၣ် ကနံၤကမှံထီၣ်အဂီၢ်, တၢ်ဂ့ၢ်အိၣ်ဝဲဒၣ်ထဲတမံၤ, ဒီးမ့ၢ်ဝဲဒၣ် တၢ်သ့ၣ်ညါ ကစၢ်ယ့ၣ်ရှူး, ဒီးအလံၤခွါဖိတဖၣ်န့ၣ်လီၤ. ဒ်သိးအသုတဆိကမိၣ်ဝဲဒၣ်ထဲလၢ အတၢ်အိၣ်သးအပူၤအဂီၢ်, အလံၤခွါဖိတဖၣ်ဟဲအိၣ်ဒီးအီၤတနွံဘၣ်တနွံန့ၣ် မၤစၢၤအီၤန့ၣ်လီၤ. နဲစံၣ် တဂၤ စံးဝဲဒၣ် “မ့တမ့ၢ်ဘၣ်လၢ အလံၤခွါဖိသ့ၣ်တဖၣ်အံၤအဃိန့ၣ်ဒီး, ယပျၢ်စုပျၢ်ခီၣ်လံန့ၣ်လီၤ.”
တၢ်မၢဖိ စီၤပီလူး စ့ၢ်ကီး, ဘၣ်လဲၤခီဖျိကွၢ်ဆၢၣ်မဲာ် တၢ်ဂ့ၢ်ကီတဖၣ်ဘၣ်ဆၣ်, ယုထံၣ်န့ၢ် တၢ်သးခုလၢ ကစၢ်ယ့ၣ်ရှူး, ဒီးပှၤဂုၤပှၤဂၤအအိၣ်န့ၣ်လီၤ. အတၢ်သးခုန့ၣ်အိၣ်ဟဲခီဖျိလၢ ကစၢ်ယ့ၣ်ရှူး, ဒီးအိၣ်မူအိၣ်ဂဲၤလၢ ကစၢ်ယ့ၣ်ရှူးအဂီၢ်န့ၣ်လီၤ. အဝဲဘၣ်တၢ်ဒုးဃာ်အီၤလၢ ဃိာ်ပူၤဒၣ်လဲာ် (ဖံ ၁:၁၃), ကဟ့ၣ်ဂံၢ်ဟ့ၣ်ဘါပှၤဂုၤပှၤဂၤအဂီၢ်, ဃုထံၣ်န့ၢ်တၢ်ဂံၢ်တၢ်ဘါန့ၣ်လီၤ. စီၤပီလူး တဲဖျါထီၣ် တၢ်သူၣ်ခုသးခု အိၣ်ဟဲခီဖျိလၢတၢ်မၤသကိးတၢ်လၢ တၢ်စံၣ်တဲၤတဲလီၤ ကစၢ်ခရံာ် အတၢ်သးခုကစီၣ်, ဒီးတၢ်လၢအအိၣ်ခိးပာ်အီၤ လၢတၢ်သံအဝာ်ဘးခီန့ၣ် သ့ၣ်ညါဝဲအဃိ (:၃-၅,၁၈,၂၀) န့ၣ်လီၤ. ဒ်သိး စီပီလူး ကစံးကတိၤဝဲ “အဂ့ၢ်ဒ်အံၤ, လၢယဂီၢ်, ယမူန့ၣ်မ့ၢ်ခရံာ်, ဒီးယသံန့ၣ် မ့ၢ် တၢ်ဘျုးလီၤ” (:၂၁) အဂီၢ်, တၢ်နာ်န့ၢ်လီၤသးတမံၤအံၤ ထိၣ်ဟူးထိၣ်ဂဲၤအီၤန့ၣ်လီၤ.
အဂ့ၢ်ဒ်အံၤ, ကစၢ်ခရံာ် မ့ၢ်အတၢ်အိၣ်မူ, အသးသမူအဃိ, စီၤပီလူး မုာ်လၤသးခုသ့ဝဲဒၣ်န့ၣ်လီၤ. အတၢ်မံသူၣ်မံသး, ဒီးနီၣ်သးအတၢ်ဘံၣ်တၢ်ဘၢန့ၣ် တအိၣ်ဟဲဝဲဒၣ်လၢအတၢ်ထူးတၢ်တီၤ, (မ့) အတၢ်အိၣ်သးတမံၤမံၤအဃိဘၣ်, မ့မ့ၢ်အိၣ်ဟဲခီဖျိလၢ အတၢ်ဘၣ်ထွဲဒီးကစၢ်ခရံာ်န့ၣ် သ့ၣ်ညါဝဲအဃိန့ၣ်လီၤ. လၢတၢ်န့ၣ်အဃိ, လၢတၢ်ဂ့ၢ်ကီ နးနးကျံးကျံးအကတီၢ်အပူၤဒၣ်လဲာ်, လံာ်ပရၢလၢအကွဲးဝဲဒၣ် ဖဲ ဖံလံး ၄:၄ အပူၤန့ၣ်စံးဝဲဒၣ် “သးခုလၢကစၢ်အပူၤတဘိယူၢ်ဃီတက့ၢ်. ယစံးကဒီး, သးခုတက့ၢ်” န့ၣ်လီၤ.
ကစၢ်ယ့ၣ်ရှူး, လၢအအဲၣ်ပှၤ, ကွၢ်ထွဲကဟုကယာ်ပှၤ, ဒီးဒ်သိးပကမုာ်လၤသးခုလၢတၢ်အိၣ်အသးမၤအသး ကိးဆၢကိးကတီၢ်ဒဲးအဂီၢ်, ဟ့ၣ်ဂံၢ်ဟ့ၣ်ဘါပှၤတဂၤအပူၤန့ၣ် မ်ပကဃုထံၣ်န့ၢ် တၢ်သူၣ်ခုသးခုန့ၣ်တက့ၢ်.