ဖဲတၢ်ဂိၢ်ခါအကတီၢ်တဘျီလၢ်လၢ်, ပှၤနီၣ်သိလ့ၣ်တဖၣ်လၢ ဝ့ၢ် အိၣ်ရံၣ်ကိၣ်(န) (Oregon) အမုၢ်နုာ်တကပၤ, လၢကျဲမုၢ်ဒိၣ် နီၢ်ဂံၢ် ၁၈ န့ၣ် ကထံၣ်ဘၣ် တၢ်နံၤကမှံ အမဲာ်သၣ်ဖးဒိၣ်, အိၣ်ဖျါဝဲလၢ ကစၢၢ်ကလိၤလၢ အိၣ်ပှဲၤဒီးသ့ၣ်အမုၢ်တဖၣ်န့ၣ်လီၤ. မဲာ်သၣ်လၢအနံၤကမှံအံၤ ပှၤထံၣ်န့ၢ်အီၤ သ့ဝဲဒၣ်ထဲ တၢ်ဂိၢ်ထီၣ်သီအကတီၢ်, ဖဲ လါ(က) သ့ၣ်ဆှိ (Larch Tree) အလၣ်ထီထီတဖၣ် အလွဲၢ်ဆီတလဲက့ၤဆူအလွဲၢ်အဘီ, လီၤဆီလိာ်အသးဒီး သ့ၣ်ဆှိ ဒီးကလး(စ) (Douglas) လၢအလွဲၢ်လါဟ့ (တၢ်လၢအဒုးကဲထီၣ်အမဲာ်ချံဒီးအကိာ်ပူၤ) န့ၣ်လီၤ. လၢတၢ်မၤပှဲၤက့ၤ သ့ၣ်လၢ အဝဲသ့ၣ်ကူၣ်လီၤဝဲတဖၣ်အလီၢ်န့ၣ် သ့ၣ် အခီပနံာ် တခါသူၣ်လီၤဝဲဒၣ် သ့ၣ်တဖၣ်လၢ အဒုးကဲထီၣ် မဲာ်သၣ်လၢ အကွီၤတူာ် (diamete) န့ၣ် အိၣ်ဝဲဒၣ် ပ့ၣ်သၢကယၤ, ဖဲ ၂၀၁၁ နံၣ်န့ၣ်လီၤ.
ဝံယရှါယၤ ကွဲမုာ်ပှၤ, ဒ်သိးပကသ့ၣ်ညါ ကစၢ်ယွၤ ဒ်အမ့ၢ်ပှၤလၢအဒုးအိၣ်ထီၣ်တၢ်မူ, သးသမူတဖၣ် ဖဲတၢ်အိၣ်သယုၢ်သညိ အလီၢ်အကျဲတဖၣ်န့ၣ်လီၤ. ဖဲကစၢ်ယွၤအပှၤဂီၢ်မုၢ်တဖၣ် ဘၣ်တၢ်စိာ်မၤကဲကုာ်အကတီၢ်, ယွၤ “ကအိးထီၣ်ထံကျိလၢ ကစၢၢ်ပျီအလိၤ,” “ကပာ်ဟီၣ်ခိၣ်ဃ့န့ၣ်လၢ ထံထီၣ်ပၢၤတဖၣ်,” ဒီးကသူၣ်လီၤ သ့ၣ်ဆှိဒီးသ့ၣ်ဆှိတအၤရှူၢ်တဖၣ် လၢပှၢ်မုၢ်ကနၢ (ယရှါ ၄၁:၁၆-၁၉) အဂ့ၢ်န့ၣ် ဝံ ဒုးသ့ၣ်နီၣ်ထီၣ် ပှၤအံၣ်စရ့လးဖိတဖၣ်န့ၣ်လီၤ. ကစၢ်ယွၤမၤ တၢ်သ့ၣ်တဖၣ်အံၤ, တမ့ၢ်ထဲလၢ အနီၢ်ကစၢ်ဒၣ်ဝဲ,ဃုာ်ဒီးပဝဲနၤယၤ ကသးမုာ်သးခုအဂီၢ်ဘၣ်. မ့မ့ၢ်, ယွၤ သူၣ်လီၤဝဲ “သ့ၣ်ဆှိ, သ့ထိးအီၣ်, ဒီးသ့ၣ်ဆှိတအၤရှူၢ်တပူၤဃီ, ဒ်သိးအပှၤဂီၢ်မုၢ်တဖၣ်ကထံၣ်တၢ်, ဒီးသ့ၣ်ညါ” ဝဲဒၣ်လၢ ကစၢ်ယွၤ မ့ၢ်ပှၤလၢအတ့ဒုးအိၣ်ထီၣ်တၢ်, ဒီးတၢ်လီၢ်လၢ အဘၣ်တၢ်ထံၣ်အီၤဒ်မံၤခိၣ်သိၣ်လာ်တဖၣ်ဒၣ်လဲာ် (:၁၉), ကအုၣ်က့ၤခီၣ်က့ၤဝဲဒၣ်ခဲလၢာ်န့ၣ်လီၤ.
လၢကစၢၢ်ကလိၤအဖီခိၣ်န့ၣ် ပမ့ၢ်တထံၣ် မဲာ်သၣ်နံၤကမှံၤဖိဘၣ်ဆၣ်, ကယဲၢ်တၢ်ဘၣ်တ့ခဲလၢာ်န့ၣ် ကဒုးသ့ၣ်နီၣ်က့ၤပှၤ ကစၢ်ယွၤ အုၣ်က့ၤခီၣ်က့ၤတၢ်အစိ အကမီၤ လၢပဟီၣ်ခိၣ်ဖျၢၣ်အံၤ, ဒီးပဝဲတဂၤစုာ်စုာ် အတၢ်အိၣ်အသးတမံၤလၢ်လၢ်, ဖဲလၢပပျံၤတၢ်, ဒီးပသးဟးဂီၤအကတီၢ်အပူၤဒၣ်လဲာ်န့ၣ်လီၤ. ဖဲလၢပဂုာ်ကျဲးစၢး ဂဲၤလိာ်တၢ်သပှၢ်ပှၢ်အပူၤန့ၣ် မ်ပဃုထံၣ်န့ၢ် ကစၢ်ယွၤအမဲာ်, ဒ်အမ့ၢ် ပတၢ်မုၢ်လၢ်, ဒီးပတၢ်သးမုာ်သးခုအဂံၢ်ခီၣ်ထံးအသိးန့ၣ်တက့ၢ်.
