အံၣ်သဲၣ်(လ) (Ethel) ဒီး အဲး(ဒ) (Ed) အိၣ်ဆိးဝဲလၢ ရီးကံၣ် ကစၢၢ်ဒီခိၣ် အပှၢ်မုၢ်ကနၢ အဟီၣ်ကဝီၤန့ၣ်လီၤ. ဖဲပလဲၤဟးအိၣ်သကိးအဝဲသ့ၣ် ဘုၣ်ဆၣ်ဖိကီၢ်ဖိအလီၢ်, အိၣ်ပှဲၤဝဲဒီး တၢ်သ့ၣ်နီၣ်တဖၣ်န့ၣ်ဒီး, ပတၢ်ကတိၤတဖၣ် အခိၣ်လိၤဝဲဒၣ်ဆူ ပနီၢ်ဆံးအခါတၢ်လဲၤခီဖျိတဖၣ် လၢအမ့ၢ် တၢ်ဒိးကသ့ၣ်လၢ နီး ဒၣ်ကိတၣ် (North Dakota) အတပံၢ်ပျီလါဟ့, ဒီးတၢ်လူၤကၠိ ဂီၤဖံးတဖၣ်လၢ မိၣ်တၤနၣ် (Montana) အဂ့ၢ်န့ၣ်လီၤ. ခဲကနံၣ်အံၤ, အဝဲသ့ၣ် အိၣ်ဆိးတ့ၢ်ဝဲဒၣ် ဖဲန့ၣ်အါနံၣ်အါလါလံန့ၣ်လီၤ. ဘၣ်ဆၣ်, အဝဲသ့ၣ် အတၢ်ကတိၤတဖၣ်အပူၤန့ၣ် ဖျါလၢအဝဲသ့ၣ်သးသယုၢ် ဟံၣ်ဃီလၢ အဝဲသ့ၣ် အိၣ်ဆိးတ့ၢ်ဝဲဒၣ်န့ၣ်လီၤ.
ဖဲပှၤအံၣ်စရ့လးဖိတဖၣ် ဘၣ်တၢ်မၤဆူၣ်စိာ်မၢကုၢ်, ဒီးသ့ၣ်နီၣ်ထီၣ်က့ၤ အဟံၣ်အဃီလၢ ဝ့ၢ်ယရူၤရှလ့ၣ်အကတီၢ်, ထါစံးထီၣ်ပတြၢၤ ၁၃၇ ပာ်ဖျါထီၣ်ဝဲ တၢ်သးကလၢၢ်ဘၣ်တၢ်ဒ်သိးအံၤန့ၣ်လီၤ. အဝဲသ့ၣ်စံးဝဲဒၣ်လၢ “ပဆ့ၣ်နီၤလၢ ဘၤဘူၤလိၣ်အထံကျိနံၤတဖၣ်, ဒီးတုၤပသ့ၣ်နီၣ်ထီၣ်စံယိၣ်ဒီး, ပမဲာ်ထံလီၤဖဲန့ၣ်လီၤ.” “ဖဲန့ၣ်ပှၤလၢ အမၢကဲကုၢ်ပှၤတဖၣ် ဃ့ပသးဝံၣ်တၢ်” (:၁-၃) န့ၣ် ထိၣ်ဟူးထိၣ်ဂဲၤထီၣ် ပှၤအံၣ်စရ့လးဖိတဖၣ် ကသံကွၢ်ဝဲဒၣ်, “ပကသးဝံၣ်ယွၤအတၢ်သးဝံၣ်လၢ တခီဘီမုၢ်အပူၤန့ၣ်ဒ်လဲၣ်” (:၄) န့ၣ်လီၤ.
သးအတၢ်ဆၢမိၣ်န့ၢ် တၢ်က့ၤကဒါလၢ တၢ်စိာ်မၢကဲကုၢ်အလီၢ်န့ၣ် မ့ၢ်တၢ်ဂ့ၢ်မိၢ်ပှၢ်လၢလံာ်စီဆှံအလီၢ်လံၤတကတြူၢ် အဝံတဖၣ် ညီနုၢ်စံးကတိၤဝဲန့ၣ်လီၤ. အကတၢၢ်န့ၣ်
ပှၤအံၣ်စရ့လးဖိတဖၣ် ဘၣ်က့ၤကဒါဆူ အထံကီၢ်, ဒီးတ့သူၣ်ထီၣ်က့ၤ ဝ့ၢ်ယရူၤရှလ့ၣ်, ဒီးဘၣ်အိၣ်ဆိးက့ၤဝဲဒၣ်ဖဲန့ၣ်ဘၣ်ဆၣ်, တၢ်အိၣ်အသးတဖၣ် တဒ်သိးလိာ်အသးဒီး
အပူၤကွံာ်လၢၤဘၣ်န့ၣ်လီၤ. ဖဲတၢ်တ့ဘှီထီၣ်က့ၤယွၤအတၢ်လုၢ်ဟံၣ်န့ၣ်ဒီး, တၢ်လုၢ်ဟ့ၣ်အံၤ မ့ၢ်တၢ်အကဒုဖိလၢ တၢ်အခီၣ်ထံးတဖျၢၣ် (ဧ့စြၤ ၃:၁၂) အဃိ, ပှၤလၢအသ့ၣ်နီၣ်ထီၣ် တၢ်လုၢ်ဟံၣ်အခီၣ်ထံးတဖျၢၣ်အလၤကပီၤတဖၣ်န့ၣ် ဟီၣ်ဝဲဒၣ်န့ၣ်လီၤ.
တၢ်ဆၢကတီၢ် ဟဲမၤဘၣ်ဒိဘၣ်ထံး ပတၢ်ဆိကမိၣ်, ဒီးပနီၢ်ကစၢ်သ့ဝဲဒၣ်အဃိ, ပသးကကလၢၢ်ဘၣ်ဝဲလၢ ပသးပှၢ်အကတီၢ် ကဟီထီၣ်ကွံာ်ပှၤလၢ အပူၤကွံာ်ပသးစၢ်အကတီၢ်န့ၣ်လီၤ. ပှၤလၢအသ့ၣ်ညါ ကစၢ်ယ့ၣ်ရှူးတဖၣ်အဂီၢ်, တၢ်သးဆၢမိၣ်န့ၢ်တမံၤအံၤ ကနဲၣ်ဆှၢပှၤဆူ ခါဆူညါပတၢ်အိၣ်မူအဂီၢ်, ဒီးတမ့ၢ်တၢ်လၢအလဲၤပူၤကွံာ်တဖၣ်အဂီၢ်ဘၣ်န့ၣ်လီၤ. တၢ်ဂ့ၢ်အံၤ မ့ၢ်ယတၢ်ကတိၤလၢ အံၣ်သဲၣ်(လ)ဒီးအဲး(ဒ) အဂီၢ်, ဒ်သိးဒီးပသးကဆၢမိၣ်န့ၢ် ခါဆူညါပဟံၣ်ပဃီ, ကယဲၢ်တၢ်ခဲလၢာ်န့ၣ် ကဘၣ်တၢ်မၤဘၣ်လိာ်ဘၣ်စးက့ၤ, ဒီးတၢ်လီၢ်တၢ်ကျဲန့ၣ် ကဂ့ၤန့ၢ်ဒံး ပဆိကမိၣ်တ့ၢ်ဝဲတဖၣ်န့ၣ်လီၤ.
