ဖဲ ၁၉၆၂ နံၣ်န့ၣ် ယိၣ်အါ(န) ရှဲးတလၢၣ် (Joanne Shetler), ဒီး အဲ(န) ဖဲးစၢၢ် (Anne Fetzer) ခံဂၤ, ဒ်သိးကလဲၤစိာ်ရၢလီၤ ခရံာ်အတၢ်သးခုကစီၣ်ဆူ ပှၤတနၢ်ဟူဒံးဘၣ် ကစၢ်ယ့ၣ်ရှူးအဂ့ၢ်တဖၣ်အဂီၢ်, လဲၤဒိးသိလ့ၣ်, ဒီးတၢ်လဲၤလၢခီၣ်ဆူ ဖံးလံးပံ (Philippines) အကစၢၢ်ဒီခိၣ်, ဆူတၢ်လီၢ်အကီအခဲတဖၣ်န့ၣ်လီၤ.
လၢယဲၢ်နံၣ်အတီၢ်ပူၤ, အဝဲသ့ၣ်ကွဲးကျိာ်ထံဝဲ လံာ်စီဆှံဆူ ပှၤအိၣ်ဆိးလၢလီၢ်ကဝီၤတဖၣ်အကျိာ်တၢ်ကတိၤဘၣ်ဆၣ်, ဘလဲကၤအိၣ် (Blangao) အပှၤသဝီဖိတဖၣ်န့ၣ် တတူၢ်လိာ်ဝဲဒၣ်ညီညီဘၣ်. ဘၣ်ဆၣ်, ဒ်သိးတၢ်ကစိာ်ဆှၢ တၢ်ဟ့ၣ်မၤစၢၤအသီတဖၣ်အဂီၢ်, တၢ်တ့ဘှီထီၣ် ကဘီယူၤဖိ ကယူၤထီၣ်, ယူၤလီၤအကျဲန့ၣ် အဝဲသ့ၣ် မၤစၢၤဝဲဒၣ်န့ၣ်လီၤ. ဘၣ်တနံၤန့ၣ် ကဘီယူၤဖိလၢ ပှၤဟီၣ်ကဝီၤဖိတဖၣ် ယုၢ်န့ၢ်ဝဲအမံၤလၢ, “တၢ်မၤကဒါမဲာ် အိၣ်ဟဲလၢတၢ်လီၢ်အဂၤ” န့ၣ် ဟဲတုၤဝဲ, ဒီးပိာ်မုၣ်တဂၤလၢ အိၣ်ဒီးအဟုးအသးတဂၤန့ၣ် လၢအသးသမူအဂီၢ်, တၢ်ဘၣ်ယိၣ်အလီၢ်အိၣ်ဝဲဒၣ်ဒိၣ်မးအဃိ, ပှၤနီၣ်ကဘီယူၤ (Pilot) န့ၣ် နီၣ်ထီၣ်အကဘီယူၤ, ဒီးစိာ်ဆှၢဝဲဒၣ်ဆူ တၢ်ဆါဟံၣ်လၢ တၢ်လီၢ်အယံၤတတီၤန့ၣ်လီၤ. လၢခံ. ကဘီယူၤ ဟဲက့ၤကဒါက့ၤဒီးပိာ်မုၣ်လၢ အအိၣ်ဆူၣ်ထီၣ်က့ၤဝဲ,ဃုာ်ဒီးအဖိလၢ အဆံးစၢ်ဝဲသီသီဖိန့ၣ်ဒီး, ပှၤဟီၣ်ကဝီၤဖိတဖၣ် စးထီၣ်သံကွၢ်ဝဲဒၣ် “ကစၢ်ယွၤ” လၢအဝဲသ့ၣ် နၢ်ဟူတ့ၢ်ဝဲတဂၤအဂ့ၢ်န့ၣ်လီၤ. တယံာ်ဘၣ်, လၢဒူသဝီအပူၤန့ၣ် ပကထံၣ်ဘၣ် တၢ်ဘါသရိာ်, လၢအိၣ်ပှဲၤဒီးပှၤစူၢ်က့ၤနာ်က့ၤကစၢ်ခရံာ်တဖၣ်န့ၣ်လီၤ.
ပှၤမ့ၢ်တဒိကနၣ် ပတၢ်စံၣ်တဲၤတဲလီၤ ကစၢ်ယ့ၣ်ရှူးအဂ့ၢ်န့ၣ်ဒီး, ပဝဲကိးဒံကိးဂၤဒဲး, ပသူၣ်ပသးကဟးဂီၤဝဲဒၣ်န့ၣ်လီၤ. တၢ်မၤအသးသ့ဝဲဒၣ်န့ၣ် ပှၤတၢ်မၢဖိ စီၤပီလူးသ့ၣ်ညါဝဲလီၤ. တၢ်သူၣ်လီၤတၢ်သးခုကစီၣ်, ဒီးတၢ်ကူးဖှိၣ်က့ၤတၢ်အတၢ်မၤ, မ့ၢ်တၢ်အကါဒိၣ် တမံၤန့ၣ် စီၤပီလူး တဲနၢ်ပၢၢ် ပှၤကလၤတံဖိတဖၣ်ဝံၤ, ပှၤဖှံတၢ်ဖိ ကလီၤဘှံးလီၤတီၤဝဲန့ၣ် သ့ၣ်ညါနီၣ်ဝဲဒၣ်န့ၣ်လီၤ. လၢတၢ်န့ၣ်အဃိ, ဒ်သိး “ပမၤတၢ်ဂ့ၤန့ၣ် မ်ပသုတလီၤဘှံးလီၤတီၤ” အဂီၢ်, (ကလၤတံ ၆:၉) တၤဝဲဒၣ် ပှၤဒိကနၣ်တၢ်တဖၣ်န့ၣ်လီၤ.
ယိၣ်အါ(န)ဒီးအဲ(န) မၤတၢ်အခီၣ်ထံးယဲၢ်နံၣ်န့ၣ် မ့ၢ်တၢ်သူၣ်ဟးဂီၤသးဟးဂီၤနီၢ်နီၢ် န့ၣ်လီၤ. ဘၣ်ဆၣ်, အဝဲသ့ၣ် ဖှံလီၤတၢ်သးခုကစီၣ်အချံဆူညါထီဘိ, ဒီးအကတၢၢ်န့ၣ် ကူးဖှိၣ်ဘၣ်ဝဲ အချံအသၣ်တဖၣ်န့ၣ်လီၤ. မ်ပသုတလီၤဘှံးတဂ့ၤ (:၉). တၢ်အုၣ်က့ၤ ခီၣ်က့ၤ အတၢ်ကစီၣ်န့ၣ် “ကကူးဖှိၣ်က့ၤ တၢ်မူအထူအယိာ်” သပှၢ်တၢၢ် (:၈) န့ၣ်လီၤ.