ဖဲယစံၣ်လီၤဆူ ကမါအပူၤန့ၣ်ဒီး, ထံနုာ်လီၤဆူ ယမဲာ်ဒီးလၢအကးတံာ်ဃာ်ထံအပူၤအဃိ, ယတထံၣ်ဘၣ်တၢ်ဂ့ၤဂ့ၤလၢၤဘၣ်. တၢ်ပီၢ်ထံကျိၤကျဲ အတၢ်သိၣ်လိန့ၣ် ယတဒိးန့ၢ်အီၤ ဂ့ၤဂ့ၤဒၣ်လဲာ်, ယနူာ်လီၤပြၢ တၢ်ပီၢ်ထံလၢ တၢ်ပာ်သး စွံကတုၤအပူၤ, ဒီးယမၤကတၢၢ်ဝဲ တၢ်ပီၣ်ထံ အတၢ်လဲၤက့ၤခံပြီၢ်အဂီၢ်န့ၣ်လီၤ. နံၣ်လါတဖၣ်ပူၤကွံာ်ဝံၤ, ယမၤလိန့ၢ်ဝဲဒၣ် ဖဲလၢပပီၢ်ထံအကတီၢ်, ပဘၣ်သါဒ်လဲၣ်, ဒီးတၢ်ပီၢ်ထံအကျိၤအကျဲတဖၣ်အဃိ, ကယဲၢ်တၢ်ပြၢပီၢ်ထံအိၣ်ဝဲဒၣ် လွံၢ်ကလုာ်လိာ်န့ၣ် ယမၤလိန့ၢ်ဝဲဒၣ် လၢတၢ်သးခုအပူၤန့ၣ်လီၤ.
တၢ်မၤလိန့ၢ်, ဒီးတၢ်တမၤလိန့ၢ် တၢ်သိၣ်လိအကျိၤအကျဲဂ့ၤဂ့ၤဘၣ်ဘၣ်န့ၣ် တၢ်လီၤဆီကအိၣ်ဝဲဒၣ် မနုၤတမံၤလဲၣ်. တၢ်ဖးလံာ်စီဆှံစ့ၢ်ကီး, ကမ့ၢ်တၢ်ဒ်သိးအံၤန့ၣ်လီၤ. လံာ်စီဆှံအဆၢ လၢပဖးအီၤ အတၢ်ဂ့ၢ်တၢ်ကျိၤတဖၣ် အတၢ်အိၣ်အသး လၢခံလၢညါ (Context), ဒီးအခီပညီတဖၣ်န့ၣ် ပမ့ၢ်နၢ်ပၢၢ်အီၤန့ၣ်ဒီး, ပတၢ်စူၢ် တၢ်နာ် ကဒိၣ်ထီၣ်အါထီၣ်, ဒီးပစူးကါ, မၤဘၣ်လိာ်ဘၣ်စးအီၤလၢ ပတၢ်အိၣ်မူ အပူၤသ့ဝဲဒၣ်န့ၣ်လီၤ.
စီၤပီလူး အဲၣ်ဒိးဝဲလၢ စီၤတံၤမသ့း ကအိၣ်ဂၢၢ်ဆိးကျၢၤဝဲလၢ အတၢ်စူၢ်တၢ်နာ်အပူၤ, ကပဒ့ၣ်ဟးဆှဲး တၢ်အ့ၣ်လိာ်ဆိးက့, ဒီးဒ်သိးအသုတၢ်တလီန့ၢ်အီၤလၢ သရၣ်သိၣ်ကမၣ်သီကမၣ်တၢ်တဖၣ်အအိၣ်န့ၣ်လီၤ. စီၤပီလူး အလံာ်ပရၢလၢခံ အကတၢၢ်တဘ့ၣ်အပူၤန့ၣ်, ဒ်သိးစီၤတံၤမသ့း ကဖးမၤလိ ကစၢ်ယွၤအကလုၢ်ကထါအဂီၢ်, ဟ့ၣ်သဆၣ်ထီၣ်ဝဲလၢ, “ကျဲးစၢးကဲထီၣ်လၢပှၤဘၣ်ယွၤအသး, ပှၤမၤတၢ်ဖိလၢအမဲာ်ဆှးအလီၢ်တအိၣ်ဘၣ်, ပှၤနီၤဖး တၢ်မ့ၢ်တၢ်တီအကလုၢ်အကထါအဆၢတီတီလိၤလိၤန့ၣ်တက့ၢ်” (၂ တံၤ ၂:၁၅) န့ၣ်လီၤ.
မ့ၢ်လၢယမၤလိန့ၢ် တၢ်ပီၢ်ထံအကျိၤအကျဲ, ဒီးဂဲၤလိအီၤဂ့ၤဂ့ၤဘၣ်ဘၣ်အဃိ, ယပီၢ်ထံန့ၣ် ဂ့ၤဒိၣ်ထီၣ်ဝဲဒၣ်န့ၣ်လီၤ. လၢပသူၣ်ဂ့ၢ်သးကျိၤ အတၢ်လဲၤကျဲအပူၤန့ၣ် ဒ်ပမၤလိ, ဒီးဃုနၢ်ပၢၢ် ကစၢ်ယွၤ အကလုၢ်အကထါ, ဒီးတၢ်ထံၣ်ဆိကမိၣ်တဖၣ်လၢလံာ်စီဆှံအပူၤန့ၣ်ဒီး, ပတၢ်သ့ၣ်ညါ ကစၢ်ယွၤန့ၣ် ကဒိၣ်ထီၣ်အါထီၣ်, ဒီးကမၤစၢၤပှၤ ဒ်သိးပကသ့နီၤဖးတၢ်မ့ၢ်တၢ်တီ, ဒီးတၢ်သိၣ်ကမၣ်သီကမၣ်တၢ်တဖၣ်, ဒီးပကဒိးန့ၢ် တၢ်ကူၣ်သ့အဂီၢ်န့ၣ်လီၤ. ပကဖးမၤလိ ယွၤ အကလုၢ်အကထါ, “ဒီးကအိၣ်ကတဲာ်ကတီၤ အသးလၢလၢပှဲၤပှဲၤ, လၢကယဲၢ်တၢ်မၤဂ့ၤတမံၤလၢ်လၢ်အဂီၢ်” (၃:၁၇) မ်ပဒိၣ်ထီၣ်သကိးဆူညါန့ၣ်တက့ၢ်.
