ကၠိနံၣ် အဲရဲးစၢၣ်(န) တၣ်ဒၣ် (Joni Eareckson Tada) တဂၤ, ဖဲအမိၢ်စူးကွံာ်အသးဝံၤန့ၣ်ဒီး, ဆိကမိၣ်ထီၣ်ဝဲဒၣ်လၢ တၢ်ဂ့ၢ်ဘၣ်ဃးဒီးပနီၢ်ခိအံၤ, လီၤဂာ်ဒီး “သပၢၤဟီၣ်ခိၣ်” လၢအဟံးဃာ်ပၢၤဃာ် တၢ်လုၢ်ဒိၣ်ပှ့ၤဒိၣ်, ဒ်ကစၢ်ခရံာ်အတၢ်အိၣ်ဆိးလီၢ်န့ၣ်လီၤ. ဒ်ခ့ခါစိၤဆၢကတီၢ် အတၢ်ပာ်ဖျါတမံၤအသိး, အဝဲဆိကမိၣ်ဆိကမး ပဝဲဟီၣ်ခိၣ်-အနီၢ်ခိအံၤ, ဒ်စးခိအတလါတီၣ်တီၣ်တဖျၢၣ်အသိးန့ၣ်လီၤ. အဝဲသ့ၣ်ညါလၢ အမိၢ် ဟီၣ်ခိၣ်- အနီၢ်ခိ “တလါဖိ” န့ၣ် မ့ၢ်တၢ်တမံၤလၢအလီၢ်လံၤ, ဒီးဟးဂီၤတ့ၢ်လံ, ဒီးခဲကနံၣ်အံၤ,
အိၣ်လီၤဖျဲၣ်လီၤဟိဝဲဒၣ်လံန့ၣ်လီၤ. ဘၣ်ဆၣ်, အဝဲကွၢ်ထံဆိကမိၣ်ထီၣ်က့ၤဝဲလၢ, အမိၢ် ဟီၣ်ခိၣ်-အနီၢ်ခိ အတလါတဖျၢၣ်အံၤ မ့ၢ် “တၢ်ထူးတၢ်တီၤလၢ ကစၢ်ခရံာ် အသးစီဆှံ အိၣ်ဆိးတၢ်အလီၢ်,” တၢ်လၢအဝဲသ့ၣ် ပာ်လုၢ်ပာ်ပှ့ၤဝဲဒၣ်န့ၣ်လီၤ.

ဒ် ကၠိနံၣ် တိၢ်နီၣ်ဖံးဃာ်ဝဲအသိး, ပှၤပိာ် ကစၢ်ယ့ၣ်ရှူး အခံတဖၣ် ဖဲအသးအနံၣ်အလါပှၢ်ထီၣ်အကတီၢ်, ပျဲကစၢ်ယ့ၣ်ရှူးကကပီၤထီၣ်ဝဲဒၣ်တလီၢ်လီၢ်, ခီဖျိလၢအဝဲသ့ၣ်အတၢ်အိၣ်မူလၢအလီၢ်လံၤဟးဂီၤ, အိၣ်လီၤဖျဲၣ်လီၤဟိအပူၤ, လၢတၢ်ထုးန့ၣ်သူၣ်သး အကျိၤကျဲတဖၣ်န့ၣ်လီၤ. အဂ့ၢ်ဒ်အံၤ, “တၢ်အစိအကမီၤဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်” (၂ ကရံၣ် ၄:၇) အဃိ, ကၠိနံၣ် သ့ၣ်ညါနၢ်ပၢၢ်ဝဲဒၣ် စီၤပီလူး အတၢ်ကတိၤ ဘၣ်ဃးဒီးတၢ်ထူးတၢ်တီၤလၢ “သပၢၤဟီၣ်ခိၣ်အပူၤ” အဂ့ၢ်န့ၣ်လီၤ. ဖဲလၢ စီၤပီလူး “ဘၣ်တၢ်ဆီၣ်အံၣ်ဆီၣ်သနံး,” ဒီး “တၢ်မၤသဘံၣ်ဘုၣ်, မၤကိၢ်မၤဂီၤအသး” ဘၣ်ဆၣ်, တၢ်လၢအတူၢ်ဘၣ်ခီၣ်ဘၣ်ဝဲတဖၣ်အဃိ, အဝဲ “တလီၤဃံၤ” (မ့) “တဟးဂီၤ” (:၈-၉) ဝဲဒၣ်ဘၣ်. စီၤပီလူး သ့ၣ်ညါဝဲဒၣ်လၢ ကစၢ်ခရံာ် အတၢ်မူန့ၣ် ကလီၣ်ဖျါထီၣ်အသး, ခီဖျိလၢအနီၢ်ခိ တူၢ်ဘၣ်ခီၣ်ဘၣ်တၢ်အဃိန့ၣ်လီၤ.

တၢ်အိၣ်အသးလၢ နစးခိအတလါတီၣ်တီၣ်တဖျၢၣ်န့ၣ် ကမ့ၢ်တၢ်ဒ်လဲၣ်. နတၢ်နးတၢ်ဖှီၣ်, နတၢ်တမုာ်တလၤ (မ့) နတၢ်ဆူးတၢ်ဆါအဃိ, ဖဲနကအုကစွါဝဲဒၣ်အကတီၢ်, နကတူၢ်ဘၣ်နဲလၢ နနီၣ်ခိနီၢ်ကစၢ်န့ၣ် လီၢ်လံၤ, ဟးဂီၤဒိၣ်ထီၣ်အါထီၣ်ဝဲဒၣ်န့ၣ်လီၤ. ဘၣ်ဆၣ်, သ့ၣ်ညါနဲလၢ ကစၢ်ယ့ၣ်ရှူး ကအိၣ်ဖျါထီၣ်အသးလၢ နနီၢ်ခိအပူၤ (:၁၀) န့ၣ်လီၤ. ဖဲနဟ့ၣ်လီၤအးလီၤနသးဆူ ကစၢ်ယ့ၣ်ရှူး အစုပူၤန့ၣ်ဒီး, အဝဲကဒုးကပီၤခီဖျိအတၢ်ကပီၤလၢနၤ, ဒ်သိးဒီးပှၤအိၣ်လၢ တၢ်ခံးတၢ်နၤတဖၣ် ကဒိးန့ၢ် ကစၢ်ယ့ၣ်ရှူး အတၢ်အဲၣ်တၢ်ကွံ, ဒီးအတၢ်မူအဂီၢ်န့ၣ်လီၤ.