လၢအပူၤကွံာ်နံၣ်တဖၣ်န့ၣ် ယပၢ်ဒီးယၤ, ပလဲၤတုၤဆူ အံၣ်ကွ့ၣ်ဒီ အကီၢ်, အမ့ၣ်စိၣ်သ့ၣ်ပှၢ်ဖးဒိၣ် အလီၢ်ကဝီၤန့ၣ်ဒီး, ဒ်သိးပကလဲၤဟးကွၢ်ကီတၢ်, ဒီးမၤလိန့ၢ် လီၢ်ကဝီၤပှၤကလုာ်ဒူၣ်တဖၣ်အဂ့ၢ်န့ၣ် ပဒိး စပံးဘိး (speed boat), ဒီးလဲၤဆူသဝီဆံးဆံးဖိတဖျၢၣ်န့ၣ်လီၤ. ယပၢ်သးဘိန့ၣ် ပှ့ၤန့ၢ်ယၤ စုသ့အတၢ်ကယၢကယဲ လၢအအိၣ်ဒီးလၢၢ် လုၢ်ဒိၣ်ပှ့ၤဒိၣ်ဃုာ်ဒီး,နၢ်ဒံးဖိတစူၣ်န့ၣ်လီၤ. ယသိးထီၣ် ယနၢ်ဒံးဖိအံၤ, ထဲဒၣ်မူးလီၤဆီ တဖၣ်, ဒီးဖဲယလဲၤအိၣ်သကိးယဝဲၢ်ပိာ်မုၣ်, ဖဲလၢယနံၤအိၣ်ဖျဲၣ်ဆၢက့ၤအကတီၢ်ဧိၤန့ၣ်လီၤ. ဖဲယဟဲက့ၤလၢ ယတၢ်လဲၤဟးဆူ ယဝဲၢ်ပိာ်မုၣ်အအိၣ်န့ၣ်ဒီး, ယသ့ၣ်ညါလၢ ယနၢ်ဒံးဖိတစူၣ်အကျါ တခီန့ၣ် ဟါမၢ်ဝဲဒၣ်အဃိ, ယဖုးသံပျီၢ်သံဘၣ်ယသးန့ၣ်လီၤ. ယလူၤကွၢ်ဃုယဲလၢ တၢ်လီၢ်ကိးပူၤဒဲးန့ၣ်လီၤ.

တၢ်အံၤ, မ့ၢ်ဒၣ်နၢ်ဒံးဖိတစူၣ်ဧိၤဘၣ်ဆၣ်, ဒ်သိးယကမၤပှဲၤက့ၤ နၢ်ဒံးဖိလၢအလီၤမၢ်တခီအဂီၢ်န့ၣ် ယလဲၤကဒါက့ၤဆူ အမ့ၣ်စိၣ် ပှၢ်လၢ်ကျါန့ၣ်လီၤ. လၢတၢ်လီၤကမၢကမၣ်အပူၤန့ၣ် ယဝဲၢ်ပိာ်မုၣ် က့ၤကဒါဆူ တၢ်အီၣ်ကျးလၢ ပလဲၤအီၣ်သကိးတၢ် ဖဲယနံၤ အိၣ်ဖျဲၣ်ဆၢန့ၣ်ဒီး, မၤန့ၢ်က့ၤ ယနၢ်ဒံးဖိလၢအလီၤမၢ်တခီန့ၣ် ဖဲ “တၢ်လီၤမၢ်, ဒီးတၢ်ဃုထံၣ်န့ၢ်က့ၤတၢ်” (lost and found) ဝဲၤကျိၤန့ၣ်လီၤ. ယသူၣ်ခုသးခုယဲဒိၣ်မးန့ၣ်လီၤ.

ကစၢ်ယ့ၣ်ရှူး အတၢ်ကတိၤဟ့ၣ်ဒိ ဘၣ်ဃးဒီးပိာ်မုၣ်တဂၤ အစ့ဒြးမူးတဘ့ၣ်ဟါမၢ်အဂ့ၢ်န့ၣ်လီၤ. ဖဲအစ့တၢ်လုၢ်ဒိၣ်ပှ့ၤဒိၣ် လီၤမၢ်အဆၢကတီၢ်, လူၤကွၢ်ဃုဝဲအစ့န့ၣ် တဆိကတီၢ်ဝဲဒၣ်ဘၣ်. ကစၢ်ယ့ၣ်ရှူး သံကွၢ်ဝဲဒၣ်လၢ “တဒွဲၣ်ထီၣ်ဘၣ် အမ့ၣ်အူဒၢ, ဒီးတခွဲဘၣ်အဟံၣ်သပှၢ်ပှၢ် တုၤအထံၣ်န့ၢ်က့ၤဝဲဘၣ်ဧါ.” (လူၤ ၁၅:၈) န့ၣ်လီၤ. ဒီး
ဖဲအဝဲဃုထံၣ်န့ၢ်က့ၤအစ့န့ၣ်ဒီး, သူၣ်ခုသးခုဝဲဒၣ်ဒိၣ်မး (:၉) န့ၣ်လီၤ.

ကစၢ်ယ့ၣ်ရှူး ပာ်ဖျါထီၣ် တၢ်တဲပူဖိအံၤ ဒ်သိးကဒုးနဲၣ်ပာ်ဖျါဝဲ ပမ့ၢ်ပှၤလုၢ်ဒိၣ်ပှ့ၤဒိၣ် လၢကစၢ်ယွၤအဂီၢ်ဒ်လဲၣ်အဂ့ၢ်န့ၣ်လီၤ. “အဂ့ၢ်ဒ်အံၤ, ပှၤကညီဖိခွါအံၤ ဟဲလီၤဝဲ ဒ်သိးအကဃုန့ၢ်, ဒီးအုၣ်က့ၤခီၣ်က့ၤ ပှၤလၢအဟါမၢ်တဖၣ်” (၁၉:၁၀) န့ၣ်လီၤ. တဘျီပမ့ၢ်တ့ၢ်လံ ပှၤလၢအဟါမၢ်ဘၣ်ဆၣ်, ခဲကနံၣ်အံၤ, ပဘၣ်တၢ်ဃုထံၣ်န့ၢ်က့ၤပှၤလံအဃိ, မူခိၣ်ဘီမုၢ်ဖိတဖၣ် အသူၣ်ခုအသးခုဒိၣ်ဒိၣ်ကလဲာ်န့ၣ်လီၤ.