ဖဲ ၂၀၂၁ နံၣ်န့ၣ် တၣ်လံၣ်ဘၤ(န) (Taliban) ဂုာ်ဟံးန့ၢ်ဆူၣ် အၣ်ဖကၣ်န့း(စ)တၣ် အတၢ်ပၢတၢ်ပြၢး ချ့သဒံးအတီၢ်ပူၤန့ၣ် ပှၤကညီလၢ အကလးတဖၣ် အိၣ်ကတာ်ထီဃာ် အသးလၢကီၢ်ပူၤ, ဒီးကထူၣ်ဖျဲးထီၣ်ဝဲအဂီၢ်, ကျိၤကျဲတအိၣ်ဘၣ်. ပှၤအါဂၤန့ၣ် တၢ်ဘၣ်ထွဲ လိာ်သးတအိၣ်, ဒီးတၢ်မုၢ်လၢ်တဖၣ်လီၤမၢ်ဝဲဒၣ်န့ၣ်လီၤ. ပှၤပတီၢ်မုၢ်လၢ ထံကီၢ်အပူၤ တဖၣ် စးထီၣ်ဟူးဂဲၤချ့သဒံး, ပၣ်ဃုာ်ဒီးပိာ်ခွါသးစၢ်တဂၤ အိးထီၣ် အ့ၣ်စတၣ်ကြဲၢ်(မ) အတၢ်ဟူးတၢ်ဂဲၤ (Instagram campaign), လၢအထုးန့ၢ်ပှၤသး, ဒီးဒိးန့ၢ် ကျိၣ်စ့ပာ်ဖှိၣ် ဒီလၣ် ၇ ကကွဲၢ်, ဒ်သိးကဟ့ၣ် ကဘီယူၤလဲ, ဒီးကဟးထီၣ်လၢ ထံကီၢ်ပူၤအဂီၢ်န့ၣ်လီၤ. အဝဲစံးဘၣ် ပှၤဟံးန့ၢ်တၢ်ကစီၣ်တဖၣ်လၢ “လၢထံဂ့ၢ်ကီၢ်ဂ့ၢ် အတၢ်ထံၣ်တလီၤပလိာ်အသး ဒ်သိးအံၤအပူၤန့ၣ် ပှၤအိၣ်မူအိၣ်ဂဲၤလၢ တၢ်အိၣ်မူအပတီၢ်အါကလုာ်တဖၣ် အဂီၢ်, ပကပာ်ဖှိၣ်ထီၣ်ပသး, ဒီးဂုာ်ကျဲးစၢးမၤပူၤမၤဖျဲးအဝဲသ့ၣ်န့ၣ်တက့ၢ်.” အဝဲသ့ၣ် ဃုထၢဝဲဒၣ်လၢ ကနုာ်လီၤမၤသကိးတၢ် လၢတၢ်ဟးဂုာ်ဟးဂီၤဖးဒိၣ်အံၤအပူၤန့ၣ်လီၤ.
တၢ်အိၣ်အသးဒ်သိးအံၤန့ၣ် တမ့ၢ်ဝဲဒၣ်ထဲ အၣ်ဖကၢ်န့း(စ)တၣ် အထံကီၢ်ဘၣ်. ပှၤကညီတဖၣ် လၢဟီၣ်ခိၣ်ဒီဘ့ၣ်န့ၣ် စးထီၣ်လၢ တၢ်သူၣ်ထီၣ်ဖးထီတဖၣ် တုၤဒၣ်လဲာ်, ဒူသဝီအဆံးတဖၣ် ဘၣ်အိၣ်သယုၢ်, အသူၣ်ကၢ်အသးလီၤဘှါ, တူၢ်ဘၣ်ခီၣ်ဘၣ်သးအတၢ်ဆီၣ်သနံးတဖၣ်န့ၣ်လီၤ. တၢ်ဂ့ၢ်အံၤ မၤလီၤကတုၤပှၤသးဘၣ်ဆၣ်, ကစၢ်ယွၤ အသူၣ်အိၣ်သးအိၣ်တၢ်န့ၣ် ပကထံၣ်ဘၣ် ဖဲတၢ်နးတၢ်ဖှီၣ်, ဒီးတၢ်မုၢ်လၢ်တအိၣ်ဘၣ် အလီၢ်အကျဲတဖၣ်အံၤန့ၣ်လီၤ. ဒ်လဲၣ်ဂ့ၤ, ဒ်လဲၣ်ဂ့ၤ, အကတၢၢ်န့ၣ် လၢကစၢ်ယွၤအကျဲ, ဒီးအဆၢကတီၢ်ဒၣ်ဝဲအပူၤန့ၣ် “ကမၤပူၤမၤဖျဲးပှၤဖှီၣ်ဖိယာ်ဖိလၢ အဃ့ကညးတၢ်ဒီး, ပှၤဘၣ်နးဘၣ်ဖှီၣ်, ဒီးပှၤလၢတၢ်မၤစၢၤအီၤတအိၣ်ဘၣ်” (စံး ၇၂:၁၂) န့ၣ်လီၤ. ဒီးယွၤအတၢ်မၤစၢၤအကျဲတထံၣ် ကဟဲခီဖျိလၢပှၤန့ၣ် မ့ၢ်တၢ်လၢအလီၤဆီနီၢ်နီၢ်န့ၣ်လီၤ. ထါစံးထီၣ်ပတြၢၤ ၇၂ ပာ်ဖျါထီၣ် စီၤပၤရှလိၤမိၤအတၢ်မၤ, ဒီးယွၤအတၢ်မၤ ခံမံၤလိာ်, ဒီးတၢ်ကဃုသ့ၣ်ညါနီၤဖးအဂီၢ်, တမ့ၢ်တၢ်အညီထီဘိဘၣ်န့ၣ်လီၤ. ကစၢ်ယွၤ မ့ၢ်ပှၤလၢ အကမၤပူၤမၤဖျဲးတၢ်တဂၤဘၣ်ဆၣ်, ဒ်သိးပကမၤသကိးတၢ်ဒီးအီၤအဂီၢ်, ကိးပှၤန့ၣ်လီၤ.
ဖဲပဘၣ်ကွၢ်ဆၢၣ်မဲာ်ဒီး တၢ်တတီတလိၤ, (မ့) တၢ်နးတၢ်ဖှီၣ်အကတီၢ်, ပလဲၤပာ်ဖှိၣ်မၤသကိးတၢ်ဒီးကစၢ်ယွၤ, လဲၤနုာ်လီၤဆူ တၢ်ဟးဂူာ်ဟးဂီၤ အသးကံၢ်ပူၤသ့ဝဲဒၣ်န့ၣ်လီၤ. ပလူၤပိာ် ကစၢ်ယွၤ အခံ, ဒီးလဲၤနုာ်ဆူ ပှၤကမၤဂ့ၤမၤစၢၤတၢ်တအိၣ်ဝဲဒၣ်နီတဂၤဘၣ် အတၢ်လီၢ်တၢ်ကျဲတဖၣ်အပူၤသ့ဝဲဒၣ်န့ၣ်လီၤ.