လၢတၢ်ဟးကွၢ်ကီအတၢ်လဲၤဖုၣ်အဂီၢ်, ပှၤနီၣ်ကဘီယူၤတဂၤ, ဒီးအဖိမုၣ်ခံဂၤန့ၣ် အိၣ်ဟးထီၣ်ဝဲလၢ စိၣ်ဒီးနၣ်, အလဲး(စ)ကး (Soldotna, Alaska) န့ၣ်လီၤ. ဘၣ်ဆၣ်, ဒ်အဝဲသ့ၣ် ပညိၣ်ဝဲအသိး, ကဘီယူၤဖိန့ၣ် လဲၤဝဲတတုၤဆူ တၢ်လီၢ်လၢအပာ်ပနီၣ်ဝဲဘၣ်. ပှၤနီၣ်ကဘီယူၤအါဒံအါဂၤလၢ လီၢ်ကဝီၤပူၤတဖၣ် စးထီၣ်ဝဲဒၣ် တၢ်လူၤကွၢ်ဃု ကဘီယူၤ ဟးဂီၤဖိအံၤ, ဒီးအကတၢၢ်န့ၣ် ပှၤအမံၤလၢအမ့ၢ် ထဲရံၣ် ကိးဒဲး(စ) (Terry Godes) တဂၤ, ဃုထံၣ်န့ၢ်ဝဲ ကဘီယူၤ အဟးဂီၤဖိလၢ ကလီၤဘျၢဃၣ်ဃၣ်န့ၣ် အိၣ်ဝဲလၢ ကမါလၢထံလီၤသကၤအပူၤန့ၣ်လီၤ. ပှၤဟံၣ်ဖိဃီဖိသၢဂၤ အိၣ်ဆၢထၢၣ်လၢအကဘီယူၤ အဒံးဆ့လိၤန့ၣ် လၢအါနၣ်ရံၣ်အတီၢ်ပူၤလီၤ. မ့ၢ်လၢယွၤအဘျုးအဖှိၣ်အဃိ, ပှၤသၢဂၤအံၤ ဘၣ်တၢ်မၤပူၤဖျဲးအီၤလၢ ထံလီၢ်ကီၢ်ပူၤ ပှၤခိးကွၢ်မၤစၢၤတၢ် (National Guard) တဖၣ်န့ၣ်လီၤ. လၢတၢ်ဆီၣ်လီၤသးအပူၤန့ၣ် ကိးဒဲး(စ) ဟ့ၣ်လီၤ အတၢ်ဆၢကတီၢ်, ဒီးအတၢ်သ့တၢ်ဘၣ်လၢပှၤဂုၤပှၤဂၤအဂီၢ်, မၤပူၤမၤဖျဲးဝဲဒၣ် သးသမူတဖၣ်န့ၣ်လီၤ. လၢတၢ်ဆီၣ်လီၤသးအပူၤ, တဲဖျါအတၢ်မၤတဖၣ်လၢ, “ယမ့ၢ်ယဲဒၣ် ပှၤအဆိကတၢၢ်ထဲတဂၤဧိၤ, လၢအထံၣ်ကဘီယူၤဖိ”…န့ၣ်လီၤ.

စီၤပၤ စီၤဒၤဝံး ဟ့ၣ်လီၤအသးလၢ အပှၤအံၣ်စရ့လးဖိတဖၣ်အဂီၢ်အါမး,ဃုာ်ဒီး တၢ်ဒုးတၢ်ယၤလၢ ကအုၣ်ခီၣ်က့ၤပှၤဂီၢ်မုၢ်လၢ ဒုၣ်ဒါတဖၣ်အစုပူၤ (၁ ကွဲး ၁၄:၈-၁၇) န့ၣ်လီၤ. ဝံၤန့ၣ်ဒီး, စီၤဒၤဝံး နၢ်ဟူဝဲဒၣ် ဝံနၤသၣ် စံးဘၣ်အီၤ, ခီဖျိလၢအချံအသၣ်န့ၣ် “အလီၢ်ပစိာ် ကအိၣ်လီၤစိၤလီၤထီ,” ဒီး “လၢထီၣ်ပှဲၤထီၣ်ဝဲလၢ ကစၢ်ခရံာ်” (၁၇:၁၄, ကွၢ် လူၤ၁:၃၀-၃၃) န့ၣ်လီၤ. လၢတၢ်ဆီၣ်လီၤသးအပူၤန့ၣ် စီၤဒၤဝံး စံးဆၢဝဲဒၣ် “ယမ့ၢ်မတၤတဂၤလဲၣ်, ကစၢ်ယွၤဧၢ, ဒီးယပှၤဟံၣ်ဖိလၢ နဆှၢယၤတုၤခဲကနံၣ်အံၤ မ့ၢ်မနုၤတဖၣ်လဲၣ်” (၁ ကွဲး ၁၇:၁၆) န့ၣ်လီၤ. ဒ်ကစၢ်ယွၤ အသးအိၣ်ဝဲအသိး, ကစၢ်ယွၤ တ့ဒုးအိၣ်ထီၣ် အတၢ်အိၣ်မူ (:၁၉), ဒီးအဒိၣ်အထီကတၢၢ်န့ၣ် ကစၢ်ယွၤ မၤပူၤမၤဖျဲး, ဒီးအုၣ်က့ၤခီၣ်က့ၤ စီၤဒၤဝံးဒီးအပှၤဂီၢ်မုၢ်တဖၣ် (:၂၀-၂၂) န့ၣ် စီၤဒၤဝံး သ့ၣ်ညါဝဲဒၣ်န့ၣ်လီၤ.

ကစၢ်ယ့ၣ်ရှူး “ဆီၣ်လီၤအသး,” ဒီးအဒိၣ်အထီကတၢၢ်န့ၣ် လုၢ်ထီၣ်အသးသမူ လၢပဂီၢ် (ဖံ ၂:၈) န့ၣ်လီၤ. ဒ် ကစၢ်ယ့ၣ်ရှူး မၤစၢၤပှၤအသိး, လၢတၢ်ဆီၣ်လီၤသးအပူၤန့ၣ် မ်ပကလုၢ်ထီၣ် ပတၢ်အိၣ်မူတဖၣ်လၢ ပှၤဂုၤပှၤဂၤအဂီၢ်န့ၣ်တက့ၢ်.