တၢ်ကိၢ်ခါဒီးတၢ်ခုၣ်ခါ ဟီၣ်ခိၣ်ဒီဘ့ၣ် အိၣ်လဲပ့းတၢ်လိာ်ကွဲသတြီၤတဖၣ် (Summer and Winter Olympic) အခါ, ဒ်ပှၤကွဲးတၢ်ကစီၣ် (young reporter) တဂၤအသိး, ယဘၣ်လဲၤဟံးန့ၢ်တၢ်ကစီၣ်န့ၣ်, ယတၢ်မံမီၣ်လၢ တၢ်ကွၢ်ကီတၢ်လိၣ်ကွဲသတြီၤတဖၣ်, ဒီးတၢ်ထံၣ်လိာ်သးဒီးပှၤလိာ်ကွဲတၢ်ဖိတဖၣ်န့ၣ် လၢပှဲၤထီၣ်ဝဲနီၢ်နီၢ်န့ၣ်လီၤ. ဖဲယနၢ်ဟူပှၤလိာ်ကွဲသတြီၤတၢ်ဖိတဖၣ်အိၣ်ဟဲလၢ ဟီၣ်ခိၣ်ဒီဘ့ၣ်န့ၣ် စံးကတိၤ ကျိာ်တၢ်ကတိၤ အကလုာ်ကလုာ်, ဒီးမၤလၤကပီၤအထံအကီၢ်န့ၣ် ယသူၣ်ခုသးခုယဲဒိၣ်မးန့ၣ်လီၤ.
လၢယသးစၢ်လံလံန့ၣ် အိၣ်လဲပ့းတၢ်လိာ်ကွဲသတြီၤအံၤ ထုးန့ၢ်သူၣ်န့ၢ်သးယၤ, ဒီးကဲထီၣ် ယတၢ်သးစဲဖးဒိၣ်တမံၤန့ၣ်လီၤ. ဖဲတၢ်ကိၢ်ခါ အိၣ်လဲပ့းအဆၢကတီၢ်, ယအၢၣ်လီၤယသးလၢ ယကပိာ် ကစၢ်ယွၤအခံန့ၣ်ဒီး, ယသးကလၢၢ်ဘၣ်ယဲ ဒ်ကစၢ်ယွၤ မၢယစူးကွံာ်ညိကွံာ် တၢ်သးစဲထီတၢ်လိာ်ကွဲသတြီၤအံၤန့ၣ်လီၤ. ဘၣ်ဆၣ်, လၢယသးကံၢ်ပူၤန့ၣ် ယအဲၣ်ထံကီၢ်သ့ၣ်တဖၣ်အဖၢမုၢ်န့ၣ်လီၤ. အိၣ်လဲပ့းတၢ်လိာ်ကွဲသတြီၤစ့ၢ်ကီး, ယကွၢ်ကီမုာ်ဘၣ်ယၤအဖၢမုၢ်ဘၣ်ဆၣ်, ဖဲပှၤအါဒံအါဂၤ, လၢလုၢ်လၢ်ဆဲးလၤလီၤဆီလိာ်အသး, ဒီးအကျိာ်တၢ်ကတိၤလီၤဆီလိာ်သးတဖၣ် ဟဲဘူၣ်သကိးဘါသကိးတၢ် လၢသရိာ်အကတီၢ်, (မ့) လၢတၢ်ဃ့ဘါထုကဖၣ်တၢ်, ဒီးဘူၣ်ထီၣ်ဘါထီၣ် စီၤပၤတဖၣ်အစီၤပၤအဂီၢ်, ဟဲပာ်ဖှိၣ်ထီၣ်အသးအကတီၢ်, ယသူၣ်ဟူးသးဂဲၤဘၣ်ယဲဒၣ်န့ၣ်လီၤ. လၢဟီၣ်ခိၣ်ချၢန့ၣ် ပလဲၤခီဖျိကလၢၢ်ဘၣ် မူခိၣ်ဘီမုၢ်အတၢ်ဃံတၢ်လၤ (လီၣ်ဖျါ ၇:၉) န့ၣ်လီၤ.
ဖဲပသ့ၣ်ညါလီၤက့ၤပသးလၢ ပမ့ၢ်တၢ်တမံၤဃီ, လၢကစၢ်ခရံာ်အပူၤန့ၣ်ဒီး, ပကသ့ၣ်နီၣ်ဝဲဒၣ်လၢ ပမ့ၢ်ပှၤလၢ အဘၣ်ဃးဒီးကစၢ်ယွၤ အဟံၣ်ဖိဃီဖိ, ဒီးကစၢ်ယွၤ အဟံၣ်ဒူၣ်ဃီထၢစံးတၢ်န့ၣ် မ့ၢ်ဝဲဒၣ် ထံကီၢ်တဖၣ်လၢ ဟီၣ်ခိၣ်ဒီဘ့ၣ်န့ၣ်လီၤ.
လၢဝ့ၢ် ကလၤတံ, ပှၤစူၢ်က့ၤနာ်က့ၤတၢ်ဖိတဖၣ်အဂီၢ်, စီၤပီလူး ဒုးသ့ၣ်ညါဝဲဒၣ်လၢ “အဂ့ၢ်ဒ်အံၤ, သုဝဲခဲလၢာ်, သုမ့ၢ်ယွၤအဖိ လၢတၢ်နာ်ယ့ၣ်ရှူးခရံာ်အဃိ” (ကလၤ ၃:၂၆) န့ၣ်လီၤ. “ပှၤယူၤဒၤဖိတအိၣ်, ပှၤဟ့းလ့ၣ်ဖိတအိၣ်, ပှၤကုၢ်ဖိတအိၣ်, ပှၤသဘျ့ဖိတအိၣ်, ပှၤပိာ်မုၣ်တအိၣ်, ပှၤပိာ်ခွါတအိၣ်ဘၣ်. အဂ့ၢ်ဒ်အံၤ, သုမ့ၢ်တၢ်တမံၤဃီလၢ ယ့ၣ်ရှူးခရံာ်အပူၤ” (:၂၈) န့ၣ်လီၤ.
ပကအိၣ်ဟဲဝဲဒၣ် ဖဲတၢ်လီၢ်တတီၤဂ့ၤတတီၤဂ့ၤ, ပကအိၣ်ဆိးဝဲဒၣ် ဖဲလဲၣ်ဂ့ၤ, လၢခရံာ်အပူၤန့ၣ် ဒ်ပှၤစူၢ်က့ၤနာ်က့ၤတၢ်တမံၤဃီဒီးပဒီပုၢ်ဝဲၢ်မုၣ်-ခွါတဖၣ် လၢဟီၣ်ခိၣ်ဒီဘ့ၣ်အသိး, မ်ပကမုာ်လၤသးခုသကိးန့ၣ်တက့ၢ်.