ဖဲလါမၢ်ရှး ၂၀၂၄ အပူၤန့ၣ်, ထံကီၢ်ပဒိၣ် ကဘီယူၤ ပၢဆှၢတၢ်ကရၢကရိ (Federal Aviation Administration) မၤဝဲ တၢ်ဘံၣ်တၢ်ဘၢအတၢ်သမံသမိးအကတီၢ်, ကီၢ်အမဲရံကၤ ကဘီယူၤ အတၢ်ကရၢကရိဖးဒိၣ် (US aerospace corporation) န့ၣ် လီၤတုာ်လီၤကာ်ဝဲဒၣ်န့ၣ်လီၤ. မ့ၢ်လၢတၢ်တဘၣ်လိာ်ဘၣ်စးတဖၣ် မၤအသးတဘျီဘၣ်တဘျီ, ဒီးဘၣ်ဖဲ ကဘီယူၤ လဲၤတၢ်အကတီၢ်တဘျီန့ၣ် ကလံၤအတယၢၢ်လၢ ကဘီယူၤအကိပူၤန့ၣ် စှၤလီၤဝဲ ဒီးကဘီယူၤ အတြဲၤဆံးဖိန့ၣ် ကၢ်ဖျိးကွံာ်ဝဲအဃိ, တၢ်သမံသမိးတၢ်ဘံၣ်တၢ်ဘၢအတၢ်မၤတဖၣ်ပိာ်ထွဲထီၣ်အခံန့ၣ်လီၤ. ခီပနံၣ် အပှၤဘၣ်မူဘၣ်ဒါလၢ ကဘၣ်စံးကတိၤပာ်ဖျါတၢ်တဂၤ, ပာ်ဖျါဝဲဒၣ် ပှၤမၤတၢ်ဖိသ့ၣ်တဖၣ် ကဘၣ်မၤပိာ်ထွဲအဂီၢ်, မ့ၢ်လၢတၢ်ကနၢ်ပၢၢ် တၢ်သိၣ်တၢ်ဘျၢတဖၣ်န့ၣ် ကီဝဲခဲဝဲ, ဒီးတၢ်ဆီတလဲတၢ်သိၣ်တၢ်ဘျၢတဖၣ် တကလုာ်ဘၣ်တကလုာ်, ဒီးတဘျီဝံၤတဘျီ, ဒီးတၢ်အစၢဟဲအိၣ်ထီၣ်ဝဲ, ဒ်တၢ်သိၣ်တၢ်ဘျၢတဖၣ်လၢ အဘၣ်တၢ်တူၢ်လိာ်တ့ၢ်လံအသိး, ပှၤမၤတၢ်ဖိသ့ၣ်တဖၣ် လူၤပိာ်ထွဲလီၤတံၢ်လီၤဆဲး တသ့ဝဲဒၣ်ခဲလၢာ်အဃိ, တၢ်လီၤတုာ်လီၤကာ်တဖၣ်အံၤကဲထီၣ်အသးန့ၣ်လီၤ.

စီၤပီလူး စံးဘၣ်တဲဘၣ် ကရံၣ်သူးတၢ်အိၣ်ဖှိၣ်ဖိတဖၣ် ကြၢးထံၣ်အီၤ,ဃုာ်ဒီးခိၣ်နၢ်အဂုၤအဂၤတဖၣ် ဒ်အမ့ၢ်ပှၤအတီအလိၤတဖၣ်, ဒီးဘၣ်တၢ်ပာ်ဂၢၢ်ပာ်ကျၢၤအဝဲသ့ၣ်တဖၣ် ဒ်ကစၢ်ခရံာ် အခ့အပှၤ, လၢအကလုၢ်တီ, ဒီးဘိးဘၣ်သ့ၣ်ညါ
ဝဲဒၣ်လၢ “အဘၣ်တၢ်နာ်န့ၢ်အီၤ” ဒ်ပှၤကွၢ်ထွဲသုးကျဲၤတၢ်တဂၤ (၁ ကရံၣ် ၄:၁-၂), လၢကစၢ်ယွၤအဂီၢ်န့ၣ်လီၤ. စီၤပီလူး အစိၤအဆၢကတီၢ်, ပှၤကွၢ်ထွဲသုးကျဲၤတၢ်န့ၣ် ဘၣ်နာ်န့ၢ်အီၤ ဒ်သိးကပၢဆှၢကွၢ်ထွဲသုးကျဲၤ ဟံၣ်ဃီအတၢ်ဖိတၢ်လံၤသ့ၣ်တဖၣ်န့ၣ်လီၤ. ပှၤလၢအဘၣ်တၢ်ဟ့ၣ်မူဟ့ၣ်ဒါအီၤတဖၣ်အဂီၢ်, တၢ်လိၣ်ဘၣ်ဝဲ အခီၣ်ထံး တမံၤန့ၣ် မ့ၢ်တၢ်သူၣ်တီသးလိၤန့ၣ်လီၤ. စီၤပီလူး စံးလီၤအသး, ဒ်ပှၤကွၢ်ထွဲသုးကျဲၤတၢ်တဂၤ, “ပလီၤဘှံးလီၤတီၤလၢ ပဖံးတၢ်မၤတၢ်ဆူၣ်အဃိ” (:၁၂) လၢတၢ်မၤလၢပှဲၤ မူဒါတဖၣ်အဂီၢ်န့ၣ်လီၤ. တၢ်လၢ ကစၢ်ယွၤ ဟ့ၣ်လီၤတ့ၢ်အီၤတဖၣ်, လီၤဆီဒၣ်တၢ် တၢ်ကူၣ်သ့လၢ ယွၤဟ့ၣ်လီၤအီၤ, ဒီးတၢ်သးခုကစီၣ်အတၢ်လီၤလိၢ်လီၤလးန့ၣ် စီၤပီလူး စူးကါဝဲဒၣ် လၢတၢ်ပလီၢ်သူၣ်ပလီၢ်သးအပူၤန့ၣ်လီၤ.

ဒ် ကစၢ်ယ့ၣ်ရှူး ကတဲာ်ကတီၤန့ၢ်ပှၤအသိး, လၢအိၣ်မူလူၤပိာ်ထွဲ တၢ်လၢကစၢ်ယွၤ ပာ်ဂၢၢ်ပာ်ကျၢၤတ့ၢ်ဝဲတဖၣ်, ဒီးနီၢ်သးအလုၢ်လၢ်, မူဒါတၢ်မၤတဖၣ်, ဒီးနီၢ်ကစၢ်အတၢ်ရ့လိာ်ဘၣ်ထွဲလိာ်သးတဖၣ်အပူၤန့ၣ် မ်ပကဂုာ်ကျဲးစၢး ကဲထီၣ် ပှၤကွၢ်ထွဲ
သုးကျဲၤတၢ် အတီအလိၤတဂၤန့ၣ်တက့ၢ်.