အမံၣ်နၣ် (Amina) တဂၤ စူၢ်က့ၤနာ်က့ၤ ကစၢ်ခရံာ် ဖဲထံကီၢ်တဘ့ၣ်လၢ တတူၢ်လိာ် ပှၤခရံာ်ဖိအတၢ်ဘူၣ်တၢ်ဘါန့ၣ်လီၤ. အဝဲစးထီၣ်ဟ့ၣ်ခီနီၤ အတၢ်စူၢ်တၢ်နာ်အသီဆူ အဒ့ခွါအအိၣ်ဘၣ်ဆၣ် အဒ့ခွါန့ၣ် တတူၢ်လိာ်ဝဲဘၣ်. လၢခံန့ၣ် အဒ့ခွါဒိးန့ၢ် ပသိၣ်တၢ်ဆါလၢ အလီၤဘၣ်ယိၣ်န့ၣ်လီၤ. အဒ့ခွါန့ၣ် ဘၣ်အိၣ်ဝဲထဲတဂၤဧိၤ လၢတၢ်ဆါဟံၣ်အဒၢး တၢ်ခံးကျါ, ဒီးသါထီၣ်သါလီၤကီကီခဲခဲန့ၣ်လီၤ. အဝဲကတူၢ်လိာ် ကစၢ်ယ့ၣ်ရှူး ဒ်အမ့ၢ် ယွၤအဖိခွါအဂီၢ်န့ၣ် တကတဲာ်ကတီၤဘၣ်အသးဒံးဘၣ်. ဒီးပျံၤဝဲဒၣ်လၢ ကကိးထီၣ် ကစၢ်ခရံာ်အမံၤဒိၣ်ဒိၣ်န့ၣ်လီၤ. (ပှၤတဂၤဂၤ ကနၢ်ဟူဝဲဒၣ် အတၢ်ကတိၤသ့ၣ်သ့ၣ်န့ၣ်လီၤ). လၢတၢ်န့ၣ်အဃိ, အဒ့ခွါန့ၣ် ကိးထီၣ်ဝဲဒၣ် “ခဲကနံၣ်အံၤ, ယဝဲၢ်မုၣ် အကစၢ်ယွၤဧၢ, ဝံသးစူၤ မၤစၢၤလၢ်ဘၣ်ယၤတက့ၢ်” န့ၣ်လီၤ. သါထီၣ်သါလီၤဖှံထီၣ်ညီထီၣ် တကီၢ်ခါ, ဒီးလၢတၢ်နၢ်ပၢၢ်အီၤတသ့ဘၣ်အပူၤန့ၣ် အဒၢးန့ၣ် ကပီၤထီၣ်ဝဲဒၣ်န့ၣ်လီၤ.အဒ့ခွါ အတၢ်စူၢ်တၢ်နာ်လၢ ကစၢ်ယ့ၣ်ရှူးအပူၤန့ၣ် စးထီၣ်ဝဲဒၣ်လၢ မုၢ်တနံၤအံၤန့ၣ်လီၤ.
လၢလံာ် ၁ မိၤရှ့အပူၤန့ၣ် စီၤအၤဘြၤဟၣ် အကုၢ်တဂၤ ဘၣ်လဲၤကွၢ်ဃု အကစၢ် စီၤအၤဘြၤဟၣ် အဖိခွါအဂီၢ်, အမါတဂၤန့ၣ်လီၤ. အဆိကတၢၢ်, ကုၢ်တဂၤအံၤ ဃ့ထုကဖၣ်ဝဲဒၣ် “ယွၤ, ယကစၢ်စီၤအၤဘြၤဟၣ်အကစၢ်ဧၢ” (၂၄:၁၂) န့ၣ်လီၤ. ဘၣ်မနုၤအဃိလဲၣ်. ကစၢ်ယွၤ စံးဘၣ်တဲဘၣ် စီၤအၤဘြၤဟၣ်လၢ “ယကဒုးကဲထီၣ်နၤလၢပှၤတကလုာ် ဖးဒိၣ် (၁၂:၂) န့ၣ် ကုၢ်တဂၤအံၤသ့ၣ်ညါဝဲအဃိန့ၣ်လီၤ. ကစၢ်ယွၤ ပာ်ဖျါထီၣ်က့ၤဝဲဒၣ် အတၢ်အၢၣ်လီၤ (၁၅:၂-၅), ဒီး “အၤဘြၣ်နာ်ယွၤ, ဒီးတၢ်ပးကဲအတၢ်နာ်လၢတၢ်တီတၢ်လိၤ” (:၆) န့ၣ်လီၤ. မ့ၢ်လၢအၤဘြၤဟၣ်အကုၢ်တဂၤအံၤ ထံၣ်ဘၣ်ဝဲ စီၤအၤဘြၤဟၣ် အတၢ်စူၢ်တၢ်နာ်နီၢ်နီၢ်အဃိ, နာ်သန့ၤအသးလၢ “ယွၤ, ယကစၢ်စီၤအၤဘြၤဟၣ်အကစၢ်” တဂၤ (၂၄:၂၆,၄၂,၄၈) သ့ဝဲလီၤ.
ဒ်သိးပှၤဂုၤပှၤဂၤ ကလူၤပိာ် ကစၢ်ယ့ၣ်ရှူးအခံအဂီၢ်, ပကွဲမုာ်အဝဲသ့ၣ် ခီဖျိလၢ ပတၢ်စံးတၢ်ကတိၤတဖၣ်န့ၣ်လီၤ. ဘၣ်ဆၣ်, တၢ်အကါဒိၣ်တမံၤန့ၣ် မ့ၢ်ဝဲဒၣ် ပတၢ်အိၣ်မူအိၣ်ဂဲၤကျိၤကျဲလၢ အဝဲသ့ၣ် အမဲာ်ညါန့ၣ်လီၤ. တၢ်စူၢ်တၢ်နာ် ကစၢ်ယွၤ အမ့ၢ်အတီနီၢ်နီၢ်ထဲ တဂၤဧိၤန့ၣ် စံးကတိၤပာ်ဖျါတၢ် အိၣ်ပှဲၤဒီးအခီပညီတဖၣ်န့ၣ်လီၤ.
ဒ်သိးကထုးန့ၢ်ပှၤဂုၤပှၤဂၤဆူ အအိၣ်အဂီၢ်, မ် ယွၤ, စီၤအၤဘြၤဟၣ် အကစၢ်, ဒီးအမံၣ်နၣ်အကစၢ်တဂၤ, ကစူးကါပသးသမူန့ၣ်တက့ၢ်.