နီၢ်ပၤမုၣ်ဘံးထိရံယၤအစိၤ ပှၤကွဲးထါ, ခရံးစတံနါ ရိၣ်စဲးထံၣ် (Christina Rosetti) တဂၤ, လၢ “တၢ်ဂဲၤဆၢထၢၣ်သမူထီၣ်က့ၤ လၢအဂ့ၤဒိၣ်တမံၤ” (A Better Resurrection) အထါတယုၢ်အပူၤန့ၣ် ကွဲးဝဲဒၣ် “ယစိာ်ထီၣ်ယမဲာ်ချံ, ဒီးယကွၢ်ထီၣ်ယဲဘၣ်ဆၣ်, လၢတၢ်သးအုးအပူၤ, တၢ်လၢယထံၣ်န့ၣ် တဖျါဆှံအဃိ, ကစၢၢ်လၢ အိၣ်ဂၢၢ်ဆိးကျၢၤထီဘိန့ၣ် ယတထံၣ်န့ၢ်ယဲဘၣ်” န့ၣ်လီၤ. ရိၣ်စဲးထံၣ် အထါဖိအံၤ ပာ်ဖျါဝဲ တၢ်လူၤဃုထံၣ်န့ၢ် တၢ်မုၢ်လၢ်, ဖဲလၢအသးကလၢၢ်ဘၣ်တၢ်မုၢ်လၢ်တအိၣ်ဘၣ်အကတီၢ်, ဒီးစံးဝဲဒၣ် “တၢ်မုၢ်လၢ်တဖၣ်, ဒီးတၢ်ပျံၤတၢ်ဖုးသ့ၣ်တဖၣ်န့ၣ် ယတသ့ၣ်ညါလၢၤဘၣ်. ဘၣ်ဆၣ်, ရိၣ်စဲးထံၣ် အိၣ်ဂၢၢ်ဆိးကျၢၤဝဲဒၣ် တၢ်မုၢ်လၢ်တမံၤန့ၣ် ဒိၣ်န့ၢ်ယိာ်န့ၢ်ဒံး အတၢ်သးဟးဂီၤတဖၣ်န့ၣ်လီၤ. တၢ်ဖီထီၣ်ဖးထီၣ်သီ, ဒီးတၢ်လီၢ်လါဟ့တဖၣ် လၢအပာ်ဖျါထီၣ် ကစၢ်ခရံာ်ဂဲၤဆၢထၢၣ်သမူထီၣ်က့ၤ အဂ့ၢ်, တၢ်လၢအမၤသီထီၣ်အတၢ်အိၣ်မူန့ၣ် အဝဲထံၣ်န့ၢ်တသ့ဘၣ်ဆၣ်, အၢၣ်လီၤ ဝဲဒၣ်လၢ, “ကစၢ် ကဂဲၤဆၢထၢၣ်သမူထီၣ်က့ၤ,” ဒီးဃ့ဘါထုကဖၣ်ဝဲဒၣ်လၢ “ကစၢ်ဧၢ, ဂဲၤဆၢထၢၣ်သမူထီၣ်က့ၤလၢယပူၤတက့ၢ်” န့ၣ်လီၤ.
စီၤပီလူး ဘၣ်ကွၢ်ဆၢၣ်မဲာ်တၢ်နးတၢ်ဖှီၣ်အဂ့ၢ်န့ၣ် ပာ်ဖျါစ့ၢ်ကီးဝဲလၢ ၂ ကရံၣ်သူးအပူၤ, ဒီးစံးဝဲဒၣ် “လၢပဘၣ်တၢ်နးကဲၣ်ဆိး တုၤပဒိးတကဲဘၣ်. တုၤဒၣ်လဲာ်ပတမုၢ်လၢ် လၢၤဘၣ် လၢပကမူဘၣ်” (၁:၈) န့ၣ်လီၤ. ဘၣ်ဆၣ်, တၢ်သးဟးဂီၤအံၤန့ၣ် သိၣ်လိနဲၣ်လိအီၤ “ဒ်သိးကထံၣ်ဘၣ် အတၢ်မုၢ်လၢ်လၢ ယွၤလၢမၤမူထီၣ်က့ၤပှၤသံ” (:၉) အဂ့ၢ်န့ၣ် အဝဲဃုထံၣ်သ့ၣ်ညါက့ၤဝဲဒၣ်န့ၣ်လီၤ.
ဖဲပဟံးဃာ် တၢ်သးခုကစီၣ် အတၢ်မုၢ်လၢ် လၢပနီၢ်ခိသပၢၤဟီၣ်ခိၣ်, လၢအတလၢတပှဲၤအပူၤန့ၣ်ဒီး, ကစၢ်ခရံာ် အသးသမူလၢ ဂဲၤဆၢထၢၣ်သမူထီၣ်က့ၤ, ဒီးအတၢ်မုၢ်လၢ်န့ၣ် ကအိၣ်ဖျါထီၣ်လၢပပူၤ, ဒီးကဒုးနဲၣ်ဖျါဝဲဒၣ်လၢ “အစိအကမီၤဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်” (၄:၇) န့ၣ် စီၤပီလူး မၤလိန့ၢ်ဝဲဒၣ်န့ၣ်လီၤ.
တၢ်ဆီတလဲအသးအံၤ, ပကထံၣ်ဘၣ်လၢ ရိၣ်စဲးထံၣ် အထါပူၤန့ၣ်လီၤ. ဖဲအဝဲ စိာ်ဆှၢထီၣ် အသးလၢအသ့ၣ်ဖးဆူ ကစၢ်ယွၤအအိၣ်, ဒီးထုကဖၣ်ဝဲဒၣ် အသးလၢ အသ့ၣ်ဖးအက့အခီတဖၣ်န့ၣ် “ကဘၣ်တၢ်ပာ်အီၤလၢ မ့ၣ်အူအပူၤ,” လၢတၢ်ဘှီဂ့ၤထီၣ်က့ၤ, ဒီးဆီတလဲက့ၤ, ဒ်တၢ်ဟ့ၣ်မၤဘူၣ် “လၢယကစၢ်စီၤပၤအဂီၢ်” န့ၣ်လီၤ. ဒီးအဝဲ မၤကတၢၢ် အထါဖိလၢ “အိ, ယ့ၣ်ရှူးဧၢ, ယကွၢ်ထီၣ်ယဲနၤ” န့ၣ်လီၤ.
