ပှၤအၣ်ဖရံးကၤ-အမဲရံကၤဖိ အဟံၣ်ဒူၣ်ဃီထၢလၢ အလုၢ်ဒိၣ်ထီၣ်ယၤန့ၣ်, တၢ်အီၣ်တၢ်အီတဖၣ်အကျါ, “နီၢ်သးအတၢ်အီၣ်” အဝံၣ်အဘဲတဖၣ် ပာ်ဃုာ်ဝဲဒၣ်တလီၢ်လီၢ်န့ၣ်လီၤ. လၢတၢ်ပာ်ဖျါ အၣ်ဖရံးကၤ-အမဲရံကၤ အလုၢ်လၢ်ဆဲးလၤအဂီၢ်, “နီၢ်သး” မ့ၢ်တၢ်ကတိၤတထံၣ်လၢ ပှၤညီနုၢ်စူးကါအီၤ, စးထီၣ် ဖဲ ၁၉၆၀ နံၣ် တဖၣ် အကတီၢ်န့ၣ်လီၤ. နီၢ်သးအတၢ်အီၣ် အမံၤအသၣ်အစရီအပူၤန့ၣ် ပာ်ဃုာ်ဒီးဆီညၣ်ဆဲးသိ, မးခရိနံး(စ), ဒီးတၢ်နုၢ်ထံလီၤသကၤ, တၢ်ဒိးတၢ်လၣ်, နွဲၣ်သီဖီတံၢ်, ဘုခ့ ကိၣ်ဘၢ, ဒီးတၢ်အီၣ်အဂုၤအဂၤတဖၣ်န့ၣ်လီၤ. တၢ်ကတဲာ်ကတီၤအါထီၣ် တၢ်အီၣ်အဆၢတဖၣ်အကျါ, ကိၣ်ဘီနီၢ်ဆၢသၣ်လၢ အဝံၣ်သိအဆၢန့ၣ် မ့ၢ်တၢ်ဘၣ်သူၣ်ဘၣ်သးယၤအဒိၣ်ကတၢၢ်န့ၣ်လီၤ. မ့ၢ်တၢ်အီၣ်အမူးဖးဒိၣ်တမံၤန့ၣ်လီၤ.
လုၢ်လၢ်ဆဲးလၤလၢ အတဒ်သိးလိာ်အသးတဖၣ် အတၢ်အီၣ်အမူးန့ၣ် ကဖျါလီၤဆီလိာ်အသးဘၣ်ဆၣ်, လၢတၢ်သးသမူအဂီၢ်, တၢ်အီၣ်တၢ်အီ မ့ၢ်တၢ်လၢအလိၣ်သပှၢ်တၢၢ်တမံၤန့ၣ်လီၤ. လၢ ယိၤ ၆:၃၅ အပူၤန့ၣ် ကစၢ်ယ့ၣ်ရှူး အတၢ်ကတိၤ “ယဲဒၣ်အံၤယမ့ၢ်ကိၣ်မူန့ၣ်လီၤ. ပှၤလၢအဟဲဆူယအိၣ်န့ၣ် တၢ်တသၣ်ဝံၤလၢၤဘၣ် အသးဘၣ်. ဒီးပှၤလၢအစူၢ်က့ၤနာ်က့ၤယၤန့ၣ် တၢ်တသူလၢၤဘၣ်အသးလၢထံဘၣ်” န့ၣ်, မ့ၢ်တၢ်အခီပညီအိၣ်လီၤဆီဝဲဒၣ် လၢပှၤကိးဂၤဒဲးအဂီၢ်န့ၣ်လီၤ.
ဒ်ပှၤကညီတဂၤဧိၤအသိး, ပှၤမ့ၢ်စံးကတိၤဘၣ်တၢ်ဒ်သိးအံၤန့ၣ်ဒီး, တမ့ၢ်လၢပှၤတူၢ်လိာ်အီၤကသ့ဘၣ်န့ၣ်လီၤ. ဘၣ်ဆၣ်, ကစၢ်ယ့ၣ်ရှူးခရံာ်န့ၣ် မ့ၢ်ဝဲဒၣ် ကစၢ်ယွၤ အဖိခွါအဃိ, စံးကတိၤဝဲလၢ တၢ်လီၤကမၢကမၣ်ဒိၣ်ဒိၣ်ကလဲာ်အပူၤသ့ဝဲဒၣ် န့ၣ်လီၤ. ကစၢ်ယ့ၣ်ရှူး ပာ်ဖျါဝဲဒၣ် “ပှၤဃုတၢ်ပနီၣ်လီၤလးတဖၣ်,” ပှၤလၢအဃု တၢ်န့ၢ်ဘျုးန့ၢ်ဖှိၣ်တကီၢ်ခါ, လၢတၢ်ဆၢကတီၢ်ဖုၣ်ကိာ်အပူၤ (ကွၢ် ၂:၁၄, ၂၆, ၃၀), တၢ်လၢအမၤမံသူၣ်မံသး နီၢ်ခိအတၢ်သးသူန့ၣ် တမ့ၢ်တၢ်လၢတၢ်ပှဲၤဘၣ်အဂ့ၢ်န့ၣ်လီၤ. ဒ်အမ့ၢ်ယွၤအဖိခွါ, ကစၢ်ယ့ၣ်ရှူးမ့ၢ် တၢ်အိၣ်မူအဂံၢ်ထံးနီၢ်နီၢ် (၁၄:၆), ဒီးဟံးဃာ်
မၤဂၢၢ်မၤကျၢၤပတၢ်အိၣ်မူန့ၣ်လီၤ. ပှၤစူၢ်က့ၤနာ်က့ၤ ကစၢ်ယ့ၣ်ရှူး ပျၢ်ပတၢ်ဒဲးဘး, ခီဖျိတူၢ်သံအသး, ဒီးအတၢ်ဂဲၤဆၢထၢၣ်သမူထီၣ်က့ၤအဂ့ၢ် (၁၁:၂၅-၂၆), တဂၤ လၢ်လၢ်န့ၣ် ကဒိးန့ၢ် တၢ်မူလၢအအိၣ်န့ၣ်လီၤ. လၢနီၢ်သးအဂီၢ်, ကစၢ်ယ့ၣ်ရှူး မ့ၢ်ဝဲ တၢ်အီၣ်အကါဒိၣ်ကတၢၢ်န့ၣ်လီၤ. ပဃုထံၣ်န့ၢ် တၢ်မူ, တၢ်န့ၢ်ဂံၢ်န့ၢ်ဘါ, ဒီးတၢ်သးမံသးမုာ်နီၢ်နီၢ်တဖၣ် သ့ဝဲဒၣ်ထဲလၢ ကစၢ်ယ့ၣ်ရှူးအအိၣ်န့ၣ်လီၤ.