ဖဲ ကိၣ်ရိၣ်နၣ် တၢ်ဆါအဃၢ်, တၢ်ဆါသံသတြိာ်အကတီၢ်, လၢတၢ်အိၣ်ဆူၣ်အိၣ်ချ့, ဒီးတၢ်ဘံၣ်တၢ်ဘၢအဂီၢ်, ကၠိတဖၣ် လၢဟီၣ်ခိၣ်ဒီဘ့ၣ်န့ၣ် ဘၣ်ဆှၢက့ၤအကၠိဖိတဖၣ်ဆူဟံၣ်အဃိ, ကၠိအတၢ်သူၣ်ထီၣ်တဖၣ်, ဒီးတၢ်လိာ်ကွဲအပျီတဖၣ် အိၣ်သယုၢ်အိၣ်ကလီဝဲဒၣ်န့ၣ်လီၤ. တၢ်ဆူးတၢ်ဆါအဃၢ်အံၤအဃိ, ပှၤအါဂၤဘၣ်ကီဘၣ်ခဲ ဝဲဒၣ်န့ၣ် သရၣ်ဒီးသရၣ်မုၣ်တဖၣ် အၢၣ်လီၤတူၢ်လိာ်ဝဲ, ဒီးဃုဝဲဒၣ်ကျိၤကျဲတဖၣ် ဒ်သိးကဒုးနဲၣ်အပှၤကၠိဖိတဖၣ်လၢ အဝဲသ့ၣ် သ့ၣ်နီၣ်ဝဲဒၣ် အပှၤကၠိဖိတဖၣ်, ဒီး ဟ့ၣ်ဂံၢ်ဟ့ၣ်ဘါ ကၠိဖိတဖၣ်လၢ ကမၤဒံးတၢ်ဆူညါသပှၢ်ပှၢ်, ဒ်သိးကလဲၤခီဖျိန့ၢ်ဝဲတၢ်ကီတၢ်ခဲအကတီၢ်န့ၣ်လီၤ. ကၠိအါဖျၢၣ် စးထီၣ်ဝဲ တၢ်ရဲၣ်တၢ်ကျဲၤ အတၢ်တၤတမံၤ လၢအမ့ၢ်, “ကဲထီၣ်တၢ်ကပီၤ,” ဒီးဒွဲၣ်ကပီၤထီၣ် ကၠိအတၢ်လိာ်ကွဲအပျီ အိၣ်လီၤဟိတဖၣ်လၢမ့ၣ်အူ ကိးမုၢ်နၤဒဲးန့ၣ်လီၤ.
ဖဲ ကစၢ်ယ့ၣ်ရှူး အိၣ်မူအိၣ်ဂဲၤဝဲလၢ ဟီၣ်ခိၣ်ချၢအကတီၢ်, ဟ့ၣ်လီၤဝဲ အနီၢ်ကစၢ် အတၢ်တၤတမံၤလၢ “ကဲထီၣ်တၢ်ကပီၤ” အဂ့ၢ်န့ၣ်, စံးဘၣ်တဲဘၣ်အပျဲၢ်အဘီၣ်, လၢအလူၤပိာ်အခံတဖၣ်လၢ “သုတၢ်ကပီၤန့ၣ် ဒုးကပီၤထီၣ်အီၤလၢပှၤကညီအမဲာ်ညါ” (မး ၅:၁၆) န့ၣ်လီၤ. ကစၢ်အတၢ်ကတိၤတထံၣ်အံၤ, အိၣ်ဒီးဖီတၢၣ်လၢအထီန့ၢ်ဒံး တၢ်ဟ့ၣ်ဂံၢ်ဟ့ၣ်ဘါ (မ့) တၢ်ဟ့ၣ်သဆၣ်ထီၣ် တၢ်ဒီသူၣ်ပာ်သးလၢအဂ့ၤန့ၣ်လီၤ. ပတၢ်သးအိၣ်ပာ်ဖျါထီၣ်တၢ်ကပီၤလၢ ယွၤဟ့ၣ်လီၤပှၤန့ၣ် ကဒုးသ့ၣ်ညါဟီၣ်ခိၣ်လၢအခိးကွၢ်ပှၤတဖၣ်လၢ ကစၢ်ယွၤမ့ၢ်မတၤတဂၤလဲၣ်န့ၣ်လီၤ. ပအိၣ်မူအိၣ်ဂဲၤပတၢ်အိၣ်မူအကျိၤအကျဲ ခီဖျိလၢပတၢ်ကတိၤ, ဒီးပတၢ်ဖံးတၢ်မၤခံမံၤလိာ်န့ၣ်ကလီၣ်ဖျါထီၣ် တၢ်မုၢ်လၢ်လၢ ကစၢ်ယ့ၣ်ရှူးဟ့ၣ်ပှၤ, ဒီးဒ်မ့ၣ်အူဒၢ အိၣ်ဝဲဒၣ်လၢတၢ်လီၢ်အထီအသိး, ကဟ့ၣ်ထီၣ်တၢ်ကပီၤဆူ ပှၤအိၣ်ဆိးလၢပခိၣ်ပဃၢၤတဖၣ်အဂီၢ်န့ၣ်လီၤ.
ကစၢ်ယ့ၣ်ရှူးကိးပှၤလၢ “ဟီၣ်ခိၣ်အတၢ်ကပီၤ,” ဒီးအဲၣ်ဒိးဝဲလၢ ပကမၤ ကပီၤထီၣ် ပှၤဂၤအတၢ်လဲၤကျဲ, လၢအတၢ်ကပီၤခီဖျိလၢပှၤ, ဖဲအဝဲသ့ၣ်လဲၤဝဲလၢ ကျဲခံးသူအကတီၢ်န့ၣ်လီၤ. ပှၤသ့ၣ်တဖၣ်လၢတသ့ၣ်ညါဒံးဘၣ် တၢ်မုၢ်လၢ်လၢ
ကစၢ်ယ့ၣ်ရှူးဟ့ၣ်ဝဲအဂီၢ်, တၢ်နီၤဟ့ၣ်ခီ ကစၢ်အတၢ်ကပီၤ, ခီဖျိပတၢ်အိၣ်မူ အကျိၤအကျဲန့ၣ် ကနဲၣ်ဆှၢအဝဲသ့ၣ်ဆူ ကစၢ်ယွၤ, လၢအမ့ၢ်တၢ်မုၢ်လၢ်ခဲလၢာ်အဂံၢ်ထံး အအိၣ်သ့ဝဲန့ၣ်လီၤ.