“ပါပၢ်ဧၢ, ယခိၣ်ဆါ. ပါပၢ်ဧၢ, တၢ်ဂိၢ်ယသး. ပါပၢ်ဧၢ, မ့ၢ်နဖူးလဲးဒံးဒူး ယခီၣ်တဖၣ်ကသ့ဧါ.” တၢ်တယံာ်ဒံးဘၣ်န့ၣ် ယဖိမုၣ်လိၣ်ဘိဖိတဂၤ, အတၢ်ကိၢ်ထီၣ်ဒိၣ်မး, တၢ်ဂိၢ်ကနိးအသး, ဒီးနီၢ်ဒီတဂၤန့ၣ် တၢ်တကံပဝံတဖၣ် ဟဲမၤဘၣ်ဒိဆါအီၤနးနးကျံးကျံးန့ၣ်လီၤ. အဝဲအဲၣ်ဒိးလၢ ယကမၤဂ့ၤမၤမုာ်ထီၣ်က့ၤအီၤန့ၣ်လီၤ. ဘၣ်ဆၣ်, အါတက့ၢ်န့ၣ် အဝဲအဲၣ်ဒိးယကအိၣ်ဆိးလၢအကပၤန့ၣ်လီၤ. အကတၢၢ်န့ၣ် ယဘၣ်လဲၤစိာ်အီၤဆူ တၢ်အံးထွဲ ကွၢ်ထွဲတၢ်တကီၢ်ခါအလီၢ်န့ၣ်လီၤ. တၢ်ဒုးသ့ၣ်ညါပှၤလၢ “တၢ်ဆါဃၢ်” (Virus) အဃိန့ၣ်လီၤ. ပမၤတၢ်မနုၤမးတသ့ဘၣ်. အိၣ်ဒၣ်ထဲပကဘၣ်ကူစါယါဘျါအီၤန့ၣ်လီၤ.

မုၢ်တနံၤအံၤ, လၢအါနၣ်ရံၣ်အတီၢ်ပူၤ, ယဆ့ၣ်နီၤအိၣ်သကိးဒီးယဖိမုၣ်လၢအဆါ တဂၤန့ၣ်လီၤ. ယဖူးလဲးဒံးဒူးအခီၣ်တဖၣ်, ဒုးအီကသံၣ်ကသီန့ၣ်လီၤ. ယအဲၣ်ဒိးယဲလၢယဖိမုၣ်ကအိၣ်မုာ်ထီၣ်က့ၤ ဒိၣ်ဒိၣ်ကလဲာ်န့ၣ်လီၤ. ဘၣ်တဘျီဘျီ, ယသးလၢအဲၣ်လီၤ အကစၢ်အသးဒၣ်ဝဲန့ၣ် ကအုကစွါထီၣ်ဝဲလၢ, တၢ်ကီဒိၣ်မးန့ၣ်လီၤ. တၢ်ဆ့ၣ်နီၤအိၣ် သကိးဒီးပှၤတူၢ်ဘၣ်တၢ်ဆူးတၢ်ဆါတဖၣ်, ဒီးတၢ်ထံၣ်ဘၣ် အဝဲသ့ၣ်အတၢ်နးတၢ်ဖှီၣ်ဘူးဘူးတံၢ်တံၢ်န့ၣ် မ့ၢ်တၢ်ကီတၢ်ခဲနီၢ်နီၢ်န့ၣ်လီၤ.

စီၤယိၤဘး ဘၣ်နးဘၣ်ဖှီၣ်တၢ်န့ၣ် အတံၤသကိးတဖၣ် ထံၣ်ဝဲ ဘူးဘူးတံၢ်တံၢ် စ့ၢ်ကီးန့ၣ်လီၤ. ပှၤသၢဂၤအံၤ ပဲာ်ထံနီၤဖးတၢ်အါစူအါဘျီန့ၣ် ကြၢးဝဲဘၣ်ဝဲဘၣ်ဆၣ်, လၢခံန့ၣ်, ပဲာ်ထံနီၤဖးဝဲဒၣ် စီၤယိၤဘး အၢအၢသီသီန့ၣ်လီၤ. ဘၣ်ဆၣ်, ပကသးပ့ၤနီၣ်အီၤန့ၣ် ညီဝဲဒၣ်, အခီၣ်ထံးန့ၣ် အတံၤသကိးတဖၣ် ဆ့ၣ်နီၤသကိးဒီးအီၤ- “ဒီးဆ့ၣ်နီၤဝဲဒီးအီၤလၢ ဟီၣ်ခိၣ်လိၤနွံနံၤ, ဒီးနွံနၤ, ဒီးပှၤတကတိၤဘၣ်တၢ်ဒီးအီၤ နီတဂၤနီတမံၤဘၣ်. အဂ့ၢ်ဒ်အံၤ, ထံၣ်ဘၣ်ဝဲလၢအသူၣ်အုးသးအုးဒိၣ်မး” (ယိၤဘး ၂:၁၃) န့ၣ်လီၤ.

စီၤယိၤဘး အတံၤသကိးတဖၣ်န့ၣ် ဒုးသ့ၣ်နီၣ်ပှၤတၢ်လၢ ဖဲပှၤလၢပအဲၣ်ဘၣ်အီၤတဖၣ် မ့ၢ်တူၢ်ဘၣ်တၢ်ဆူးတၢ်ဆါအကတီၢ်, ပကတိၤတၢ်မ့ၢ်ဂ့ၤ, ပတကတိၤတၢ်မ့ၢ်ဂ့ၤ, ပလဲၤအိၣ်ဆိးဒီးအဝဲသ့ၣ်န့ၣ် မ့ၢ်တၢ်အကါဒိၣ်ကတၢၢ်န့ၣ်လီၤ. အဝဲသ့ၣ်အတၢ်အိၣ်မူ ဟ့ၣ်ဒိန့ၣ် ဒုးသ့ၣ်နီၣ်ထီၣ်ပှၤလၢ ပကဘၣ်စံးကတိၤတၢ်မနုၤလဲၣ်န့ၣ် ပမ့ၢ်တသ့ၣ်ညါဒၣ်လဲာ်, တၢ်ဆ့ၣ်နီၤသကိးဒီးပှၤတဂၤဂၤ, လၢအဝဲသ့ၣ်အတၢ်နးတၢ်ဖှီၣ်အပူၤန့ၣ် မ့ၢ် တၢ်ဟ့ၣ်အဂ့ၤကတၢၢ်လၢ ပဟ့ၣ်သ့ဝဲဒၣ်တမံၤန့ၣ်လီၤ.