“The Wild One” မ့ၢ် ၁၉၅၃ နံၣ် တၢ်ဂီၤမူလၢ မၣ်လိၣ် ဘရၣ်(န)ဒိၣ် (Marlon Brando) ဂဲၤဒိဝဲဒၣ် ဒ် ကၠီ(န)နံၣ် စတ့ၣ်ဘၢၣ် (Johnny Strabler) လၢအမ့ၢ် ပှၤဒိး လ့ၣ်မ့ၣ်ပီၤ (motorcycle) ကရၢကရိအခိၣ်, လၢအသးဘၣ်တံာ်တာ်, ဒီးဆိကမိၣ်သူၣ်ကိၢ်သးဂီၤတၢ်တဂၤအသိးန့ၣ်လီၤ. ဖဲတၢ်ဒုးနဲၣ်တကတီၢ်န့ၣ်, ကရၢဖိတဂၤ အဆ့ ကၠဲးကဲးအလိၤန့ၣ် အိၣ်ဒီးတၢ်ကွဲးလံာ်ဖျၢၣ် B.R.M.C န့ၣ် ပိာ်မုၣ်သးစၢ်တဂၤ ပာ်သူၣ်ပာ်သးဝဲဒၣ်န့ၣ်လီၤ. ဖဲ အဝဲသ့ၣ်ညါ R မ့ၢ် “Rebels”- တၢ်ပူထီၣ်တၢ်န့ၣ်ဒီး, နံၤဝဲဒၣ်, ဒီးဖဲ ဘရၣ်(န)ဒိၣ် တီၢ်လိာ်ကွဲ တၢ်သံကျံပိးလီ (drum) အကတီၢ်, ဖီၣ်ဝဲအစုဒုၣ်, ဒီးသံကွၢ်ဝဲဒၣ်လၢ “ကၠီ(န)နံၣ် ဧၢ, နပူထီၣ်ထီဒါတၢ်မနုၤလဲၣ်” န့ၣ်ဒီး, စံးဆၢဝဲဒၣ်လၢ, “နဆိကမိၣ်လၢယပူထီၣ်ထီဒါတၢ်မနုၤလဲၣ်” န့ၣ်လီၤ.

လၢပတၢ်ဂ့ၢ်ကီတဖၣ်အဂီၢ်, တၢ်ပာ်ဖျါအံၤ မ့ၢ်တၢ်အကြၢးအဘၣ်တမံၤန့ၣ်လီၤ. ပဟဲအိၣ်ဖျဲၣ်ထီၣ်ဝဲဒၣ်ဒီး တၢ်န့ၢ်စိန့ၢ်ကမီၤလၢ တၢ်ပာ်ဖျါဆှဲမၤလီၤတံၢ်ပတၢ်မ့ၢ်တၢ်န့ၣ်လီၤ. ပအဲၣ်ဒိးပၢဆှၢနဲၣ်လိၤ ပတၢ်အိၣ်မူ လၢပကျဲဧိၤပကပူၤဧိၤအပူၤန့ၣ်လီၤ. တၢ်လၢပအဲၣ်ဒိးမၤတဖၣ်န့ၣ် ပမ့ၢ်တမၤဘၣ်ဝဲန့ၣ်ဒီး, တၢ်လၢပကြၢးမၤတဖၣ်န့ၣ် ပတမၤလၢၤဘၣ်. ပတၢ်ပညိၣ်န့ၣ် မ့ၢ်ဝဲဒၣ် တၢ်ပူထီၣ်ထီဒါတၢ်န့ၣ်လီၤ.

ပှၤအံၣ်စရ့လးဖိတဖၣ် ဘၣ်မနုၤအဃိ, မၤဘၣ်အၢကီၢ်ဒီဘ့ၣ်ညါ, ဒီးဘူၣ်ဘါဝဲဒၣ် “လၢၢ်ဧိၤလ့ဧိၤ, ဒီးသ့ၣ်ဧိၤဝၣ်ဧိၤ” (ယံး ၃:၉) န့ၣ်လဲၣ်. ဒီးပှၤအံၣ်စရ့လးဖိ “အဒီပုၢ်ဝဲၢ်မုၣ်ယူဒၤ” လၢအကလုၢ်တတီဘၣ်န့ၣ် ဘၣ်မနုၤအဃိ, တဟဲက့ၤဆူယွၤအအိၣ် (:၁ဝ) န့ၣ်လဲၣ်. မ့ၢ်လၢအဝဲသ့ၣ်ပာ်ဖျါထီၣ် တၢ်သဘျ့, “အသးအၢအနၢ်က့ၣ်” (:၁၇) အဂ့ၢ်န့ၣ်လီၤ. တၢ်ပညိၣ်န့ၣ် မ့ၢ်ဝဲဒၣ် တၢ်ပူထီၣ်ထီဒါတၢ်န့ၣ်လီၤ.

ဘၣ်ဆၣ်, ယွၤအတၢ်အဲၣ်န့ၣ် အဂံၢ်ဆူၣ်န့ၢ်ဒံးကယဲၢ်တၢ်ခဲလၢာ်န့ၣ်လီၤ. ကစၢ် ယ့ၣ်ရှူး သံဝဲဒၣ်လၢ ပှၤပူထီၣ်ထီဒါတၢ်တဖၣ်အဂီၢ်, ဒီးဒ်သိးအဝဲသ့ၣ်ကဟဲက့ၤကဒါက့ၤအဂီၢ်, အိးထီၣ်န့ၢ်ဝဲ တြဲၤန့ၣ်လီၤ. “အံၣ်စရ့လးလၢအသးဟးဂီၤဧၢ, ဟဲက့ၤတက့ၢ်. ဒီးယတလံထီၣ်လၢၤဘၣ်ယမဲာ်လၢသုဘၣ်, ယွၤစံးဝဲဒၣ်. အဂ့ၢ်ဒ်အံၤ, ယအိၣ်ဒီးဘျုးဒီး ဖှိၣ်ဒီး ယသးတထီၣ်ဘၣ်တထံၣ်ဃီဘၣ်န့ၣ်ယွၤစံးဝဲဒၣ်. မၤထဲအံၤ, တဲလီၤကျဲၤလီၤ နတၢ်ဒဲးဘးလၢ နမၤကမၣ်ဘၣ်လံယွၤနကစၢ်…န့ၣ်တက့ၢ်” (:၁၂-၁၃) န့ၣ်လီၤ.

ပကဟဲအိၣ်ဖျဲၣ်ထီၣ်သ့ၣ်သ့ၣ်, ဒ်ပှၤပူထီၣ်ထီဒါတၢ်တဖၣ်အသိးဘၣ်ဆၣ်, ပဟဲက့ၤဆူယွၤအအိၣ်သ့ဝဲန့ၣ်လီၤ. မ်ပကဃ့ၢ်ဆူဟံၣ်, ဆူပပၢ်အအိၣ်, ဒ်သိးပကဃုထံၣ်န့ၢ် ကစၢ်ယွၤ ပျၢ်ပတၢ်ဒဲးဘး, အတၢ်အဲၣ်, ဒီးအတၢ်မၤစၢၤန့ၣ်တက့ၢ်.