ဖဲ ၁၉၀၇ နံၣ်, လါယနူၤအါရံၤအပူၤ, ဝ့နံၣ်ခီနံၣ် (Winneconne) အဝ့ၢ်န့ၣ်, တၢ်သးပ့ၤနီၣ်တ့နုာ်အီၤလၢ ကီၢ်စဲၣ် ဝ့း(စ) ခီစဲ(န) (Wisconsin) ဟီၣ်ခီၣ်ဂီၤအပူၤ, ဒီးကဲထီၣ် ကျိၣ်စ့အတၢ်ဟဲနုာ် တၢ်ဂ့ၢ်ကီလၢဝ့ၢ်အဂီၢ်, ခီဖျိပှၤလဲၤတၢ်က့ၤတၢ်အတၢ်မၤန့ၣ်လီၤ. လၢတၢ်န့ၣ်အဃိ, ဖဲလါယူၤလံ ၂၁ သီန့ၣ် ပှၤဝ့ၢ်ဖိတဖၣ် ဆၢတဲာ်ဝဲလၢ ကထုးဖးအသးဒီး ဝ့း(စ) ခီစဲ(န) ကီၢ်စဲၣ်, ဒီးကအိၣ်ဆၢထၢၣ် ဒ်ကီၢ်စဲၣ်လၢ အပၢလီၤက့ၤ အသးဒၣ်ဝဲန့ၣ်လီၤ. ပှၤတနီၤန့ၣ် စံးဝဲလၢ တၢ်ထုးဖးအသးအံၤ မ့ၢ်တၢ်လၢအမၤမဲာ်ဆှး ကီၢ်စဲၣ် အပဒိၣ်ပပှၢ်တဖၣ်, ဒီးပှၤတနီၤန့ၣ် စံးဝဲလၢ အမ့ၢ်တၢ်မၤလီၤနံၤတမံၤန့ၣ်လီၤ. တၢ်ကမၤအသးတမံၤဂ့ၤတမံၤဂ့ၤန့ၣ် တၢ်စံးကတိၤကူၣ်လိာ်သုးကျဲၤသကိးတၢ် တဘျုးလါလၢ ပှၤခံခီအဘၢၣ်စၢၤန့ၣ် တၢ်အစၢဟဲထီၣ်လၢ ဝ့ၢ် ဝ့နံၣ်ခီနံၣ်, ဒီးကီၢ်စဲၣ် ဝ့း(စ) ခီစဲ(န) ပာ်ဖှိၣ်က့ၤတပူၤဃီ, ဖဲလါယူလံၤ ၂၂ သီ, ၁၉၆၇ နံၣ်န့ၣ်လီၤ.

တၢ်လီၤမုၢ်လီၤဖး အါတက့ၢ်န့ၣ် တမ့ၢ်တၢ်မၤအသး လၢအဂ့ၤ (မ့) တမ့ၢ်လၢ တၢ်ဘှါဆှဲန့ၢ်အီၤ ညီညီဘၣ်လီၤ. တၢ်လီၤမုၢ်လီၤဖးန့ၣ် မ့ၢ်တၢ်လၢအလီၤဘၣ်ယိၣ်, ဒ်လံာ်ကတိၤဒိ ပာ်ဖျါဝဲ “ပှၤလၢအထိၣ်အ့ၣ်လိာ်ဆိးက့လိာ်တၢ်” (ကတိၤ ၆:၁၉),
လၢအမ့ၢ် “တၢ်ဃုမံၤ (လၢ) ယွၤသးဟ့အီၤ” (၆:၁၆) အကျါတမံၤန့ၣ်လီၤ.

တၢ်လီၤမုၢ်လီၤဖးန့ၣ် တမ့ၢ်ဝဲထဲ အဒုးအိၣ်ထီၣ် တၢ်ဂ့ၢ်ကီတဖၣ်ဘၣ်. မ့မ့ၢ် ဒုးကဲထီၣ် တၢ်ထံၣ်ကမၣ် ကစၢ်ယ့ၣ်ရှူးဒီးပၢ်ကစၢ်ယွၤစ့ၢ်ကီးန့ၣ်လီၤ. တချုးတၢ်ပျၤထီ ကစၢ်ယ့ၣ်ရှူးခရံာ် လၢထူၣ်စုညါအလိၤ, အမုၢ်တနၤန့ၣ် ဒ်သိးအပျဲၢ်အဘီၣ်တဖၣ်ကမ့ၢ်တၢ်တမံၤဃီဒီးအီၤအဂီၢ်, ဃ့ထုကဖၣ်ဝဲလၢ “ဒ်သိးဟီၣ်ခိၣ်ကစူၢ်က့ၤနာ်က့ၤလၢနမၢလီၤယၤ” (ယိၤ ၁၇:၂၁) န့ၣ်လီၤ.

ကစၢ်ယ့ၣ်ရှူး ပာ်ဖျါထီၣ်ဖျိဖျိဖျါဖျါလၢ ပမ့ၢ်တၢ်တမံၤဃီ, (မ့) ပတမ့ၢ်တၢ်တမံၤဃီ, ဒ်ဒီပုၢ်ဝဲၢ်မုၣ်ခွါလၢ ကစၢ်ခရံာ်အပူၤန့ၣ် မ့ၢ်တၢ်သဟီၣ် ဒ်သိးပှၤဟီၣ်ခိၣ်ဖိကစူၢ်က့ၤ နာ်က့ၤအီၤအဂီၢ်န့ၣ်လီၤ. လၢတၢ်န့ၣ်အဃိ, စီၤပီလူး စံးဘၣ်တဲဘၣ် ပှၤအ့ဖ့းစူးဖိတဖၣ်လၢ “ဂုာ်ဟံးဃာ်သုသးတဖျၢၣ်ဃီလၢ တၢ်ဃူတၢ်ဖိးအတၢ်စၢဃာ် အပူၤတက့ၢ်” (အ့း ၄:၃) န့ၣ်လီၤ. မ်ပကပျဲ ခရံာ်အသးစီဆှံ ကမၤစၢၤပှၤလၢ ပကမ့ၢ်တၢ်တမံၤဃီ-
ဒ်သိးပှၤဟီၣ်ခိၣ်ဖိတဖၣ် ကဟဲဆူ ယွၤအအိၣ်န့ၣ်လီၤ.