ဖဲ ရှံ(လ)ယၣ် (Shelia) ထွါစီကွံာ် စီၤနီၢ်ခိၣ်တဖၣ်လၢ ကသံၣ်မၤသံတၢ်ဖိဃၢ်တဖၣ်ဝံၤ, သကူးလီၤအသး, ဒီးစၢတံၢ်တၢ်ကမှံၤအထၢၣ်လၢ, အိၣ်ပှဲၤဒီးလီခီ, ဒီးထံခွးဖိတဖၣ်လၢ ပှၤစူးကါဝံၤတ့ၢ်လံတဖၣ်န့ၣ်လီၤ. အဝဲယိးထီၣ် တၢ်ကမှံၤအထၢၣ်လၢ အဖံထံခိၣ်, ဒီး ဃၣ်တရံးကွၢ်ကဒါက့ၤဆူ ဘျီၣ်ရိဖှိၣ်ဖးဒိၣ်အဒၢး, လၢအဘၣ်တၢ်စူးကါအီၤကျိၤကျဲအကလုာ်ကလုာ်န့ၣ်လီၤ. လၢတၢ်ရဲၣ်တၢ်ကျဲၤလၢခံတဘျီအဂီၢ်, အဝဲဟ့ၣ်လီၤအသးလၢ တၢ်မၤကဆှဲကဆှီ တၢ်လီၢ်တၢ်ကျဲအံၤအဃိ, အဲၣ်ဒိးမၤလီၤတံၢ်ဝဲဒၣ်လၢ တၢ်စူးကါဘျီၣ်ရိဖှိၣ်ကသ့ဝဲအဂီၢ်န့ၣ်လီၤ. လၢအသးပူၤန့ၣ် တၢ်ဆိကမိၣ်ဟဲအိၣ်ဖျါထီၣ်သတူာ်ကလာ်, “တၢ်လၢယမၤတၢ်အံၤ မ့ၢ်ပှၤတဂၤဂၤ ဘၣ်ကပာ်သူၣ်ပာ်သးယဲဧၣ်” န့ၣ်လီၤ.
လၢယွၤအဘီမုၢ်အဂီၢ်, ပဖံးတၢ်မၤတၢ် ကိးမုၢ်နံၤဒဲးန့ၣ် မ့ၢ်ပှၤပာ်လုၢ်ပာ်ပှ့ၤဧါ, တပာ်လုၢ်ပာ်ပှ့ၤဧၣ်န့ၣ် ပမ့ၢ်ဆိကမိၣ်ကွၢ်န့ၣ်ဒီး, ကညီဒိၣ်မးန့ၣ်လီၤ. ပမၤကဆှဲကဆှီတၢ်မ့ၢ်ဂ့ၤ, ကွၢ်ထွဲမၤစၢၤကျိၣ်စ့အစရီမ့ၢ်ဂ့ၤ, ဟ့ၣ်လံာ်စီဆှံ အတၢ်သိၣ်လိမ့ၢ်ဂ့ၤ, (မ့) ဟ့ၣ်ကျိၣ်စ့တၢ်မၤဘူၣ်မ့ၢ်ဂ့ၤ, ဖဲပမၤတၢ်ခ့တၢ်ပှၤအတၢ်မၤန့ၣ်, ပှၤတထံၣ်ပှၤဘၣ်. ဒီးလၢကမျၢၢ်တၢ်စံးထီၣ်ပတြၢၤအပူၤ တၢ်တပာ်ဖျါပမံၤတဖၣ်န့ၣ် အိၣ်ဝဲအါမးန့ၣ်လီၤ.
လံာ်လူၤကၣ် ၈:၁-၂ အပူၤန့ၣ်, ပှၤကွဲးတၢ်စံၣ်စိၤတဲစိၤ ပာ်ဖျါထီၣ် ပိာ်မုၣ်လၢ ဟ့ၣ်လီၤအသးတီတီလိၤလိၤတဖၣ်အမံၤ, ဖဲကစၢ်ယ့ၣ်ရှူး မၤတၢ်သးခုကစီၣ်အကတီၢ်န့ၣ်လီၤ. ပိာ်မုၣ်အါဂၤလၢ အပူၤဖျဲးထီၣ်ဒီး သးအၢ, ဒီးတၢ်ဆူးတၢ်ဆါတဖၣ်အကျါ, အဝဲပာ်ဖျါထီၣ် ပိာ်မုၣ်သၢဂၤအမံၤ, ပှၤမၤကဒၤလ့ၣ်ဖိ နီၢ်မၤရံ, စီၤပၤဟ့ရိာ် အပှၤကွၢ်တၢ်ဖိ စီၤဃူၤစါအမါ နီၢ်ယိၤအၣ်နၣ်, ဒီးနီၢ်စူၤစၣ်နၤန့ၣ်လီၤ. စီၤလူၤကၣ် ပာ်ဖျါထီၣ် ဝဲလၢ, “ပိာ်မုာ်အဂၤအါဂၤလၢ အလုၢ်အီၣ်လုၢ်အီအီၤ (ကစၢ်ယ့ၣ်ရှူး) လၢအစုလီၢ်ခီၣ်ခိၣ်” (:၃) အိၣ်စ့ၢ်ကီးန့ၣ်လီၤ. လၢတၢ်ဆီၣ်ထွဲမၤစၢၤ တၢ်သးခုကစီၣ်အဂီၢ်, ပိာ်မုၣ်လၢ ဟ့ၣ်လီၤအသး, ဒီးတၢ်တပာ်ဖျါထီၣ် အမံၤတဖၣ်န့ၣ်, စီၤလူၤကၣ် ပာ်လုၢ်ပာ်ပှ့ၤ ကွဲးပာ်ဖျါထီၣ်ဝဲဒၣ်လီၤလီၤဆီဆီန့ၣ်လီၤ.
ပိာ်မုၣ်လၢ ဟ့ၣ်လီၤအသး, ဒီးတၢ်တပာ်ဖျါထီၣ်အမံၤတဖၣ်န့ၣ် မ့ၢ်ပှၤအကါဒိၣ်တဖၣ်လၢ အဘီမုၢ်တၢ်ဖံးတၢ်မၤအဂီၢ်အဃိ, ဒ်ကစၢ်ယွၤ ဒုးပာ်ဃုာ် အဝဲသ့ၣ်လၢ လံာ်စီၤဆှံအတၢ်ကွဲးအသိး, ကစၢ်ယွၤ ထံၣ်သ့ၣ်ညါ ပတၢ်ဂုာ်ကျဲးစၢးတဖၣ်န့ၣ်လီၤ. ကစၢ်ယွၤ သ့ၣ်ညါပမံၤ (ယိၤ ၁၀:၃), ဒီးပဟ့ၣ်လီၤသးလၢ ယွၤအတၢ်ဖံးတၢ်မၤအပူၤ (ဧ့ၤဘြံၤ ၆:၁၀) စ့ၢ်ကီး ကစၢ်ယွၤထံၣ်ဝဲဒၣ်န့ၣ်လီၤ.
