ဒ်သိးပကစံးကတိၤသကိး တၢ်ဂ့ၢ်ကီတမံၤအဂီၢ်, ယပှၤမၤသကိးတၢ်တဂၤ ကိးဃီၤဝဲဒၣ် ကွဲၤဒီနၢ် ချ့ချ့န့ၣ်လီၤ. အဝဲသံကွၢ်ယၤ မ့ၢ်ယတၢ်အိၣ်အသးန့ၣ် မၤအသးဒ်လဲၣ်န့ၣ်ဒီး, ယစံးဘၣ်အီၤလၢ ယခိၣ်ဆါ, ဒီးအ့ၣ်ထုးဝဲဒၣ်ဒိၣ်ဒိၣ်ကလဲာ်, ဒီးကသံၣ်ဖီၣ်န့ၣ် တမၤတၢ်လၢၤဘၣ်န့ၣ်လီၤ. ယပှၤမၤသကိးတၢ် သံကွၢ်ယၤကဆှီဒီဖိ, “ယဃ့ထုကဖၣ်တၢ်လၢနဂီၢ် မ့ၢ်ကသ့ဧၣ်” န့ၣ်လီၤ. ယအၢၣ်လီၤတူၢ်လိာ်ဝံၤန့ၣ်ဒီး, ဒ်သိးယတၢ်အိၣ်ဆူၣ်အိၣ်ချ့ ကဂ့ၤထီၣ်က့ၤအဂီၢ်, ဃ့ထုကဖၣ်န့ၢ်ယၤ စဲးကီးသၢဆံလၢကစၢ်ယွၤအအိၣ်န့ၣ်လီၤ. ယအၢၣ်လီၤယသးလၢ “ဘၣ်တဘျီဘျီ, ယသးပ့ၤနီၣ်ဃ့ထုကဖၣ်တၢ်န့ၣ်လီၤ. ယသးစၢၢ်ဆၢနီၢ်နီၢ် ထဲဒၣ်လၢယတၢ်ဆါ, ဒီးယတဃၣ်ယသးဆူ ကစၢ်ယွၤအအိၣ်” ဘၣ်န့ၣ်လီၤ.
ယတၢ်အၢၣ်လီၤက့ၤသးန့ၣ် ဒုးဆိကမိၣ်ထီၣ်က့ၤယၤလၢ မ့ၢ်ယပညိၣ်ပာ်ဖှိၣ်ယသး ဖဲလဲၣ်န့ၣ်လီၤ. မ့ၢ်ယပညိၣ်ပာ်ဖှီၣ်ယသးလၢ ယတၢ်ဂုာ်ကျဲးစၢးဂဲၤလိာ်တဖၣ်, ဒီးယတၢ်ကီတၢ်ခဲတဖၣ်အလိၤန့ၣ်ဧၣ်, (မ့) လၢကစၢ်ယွၤအလိၤန့ၣ်ဧၣ်လီၤ. တၢ်တနံၤအံၤန့ၣ်, မ့ၢ်လၢ ယတူၢ်ဘၣ်တၢ်ဆါ နးဒိၣ်မးအဃိ, ယသးအတၢ်ဆိကမိၣ်တဖၣ် အိၣ်ဝဲလၢယတၢ်ဆါအလိၤန့ၣ်လီၤ. ဘၣ်ဆၣ်, ဖဲဒၣ်ပပညိၣ်ပာ်ဖှိၣ်ပသးလဲလၢကစၢ်ယွၤ, ပကစၢ်လၢအမၤဘျါက့ၤတၢ်, ဒီးအဟံးဃာ်ဂၢၢ်ကျၢၤတၢ်တဂၤအလိၤန့ၣ်ဒီး, ယရှါ ၂၆:၃ ဒုးသ့ၣ်နီၣ်ပှၤလၢ “ပှၤအသးလၢ အသန့ၤအသးလၢနၤန့ၣ် နကပၢၤအီၤလၢ တၢ်ဃူတၢ်ဖိးအလၢအပှဲၤန့ၣ်လီၤ. အဂ့ၢ်ဒ်အံၤ, သန့ၤအသးလၢနၤ” န့ၣ်လီၤ. လၢတၢ်န့ၣ်အဃိ, ပကဃုထံၣ်န့ၢ် သးအတၢ်ဃူတၢ်ဖိးသ့ဝဲဒၣ်န့ၣ်လီၤ. လၢပတၢ်အိၣ်မူခ့ခါအကတီၢ်ဒၣ်လဲာ်, တၢ်ဆါန့ၣ် တဟါမၢ်ဝဲဒၣ် တကီၢ်ခါဘၣ်ဆၣ်, ဝံ ဒုးသ့ၣ်နီၣ်က့ၤပှၤလၢ ပကပာ် ပတၢ်နာ်သန့ၤသးလၢ ကစၢ်ယွၤ, လၢအတီဝဲလိၤဝဲ, ဒီးတၢ်လၢပလိၣ်တဖၣ်န့ၣ် ဟ့ၣ်ပှၤသ့ဝဲဒၣ်တဂၤအလိၤ (:၄) န့ၣ်လီၤ.
ဖဲပှၤအံၣ်စရ့လးဖိတဖၣ် ဘၣ်အိၣ်ဆိးဝဲလၢ တၢ်စိာ်မၢကဲကုၢ်အကတီၢ်အပူၤမ့ၢ်ဂ့ၤ, လၢတၢ်ဟဲက့ၤကဒါက့ၤလၢ တၢ်စိာ်မၢကဲကုၢ်ဝံၤအကတီၢ်မ့ၢ်ဂ့ၤန့ၣ် ဝံယရှါယၤ ဒုးနဲၣ်ဝဲဒၣ် ပှၤဂီၢ်မုၢ်တဖၣ်လၢ ယွၤအတၢ်အၢၣ်လီၤအဂ့ၢ်, လၢလံာ်စီဆှံတတီၤအံၤန့ၣ်လီၤ. တၢ်လၢယွၤကဟ့ၣ်လီၤတၢ်တဖၣ်အလိၤ, ပှၤဂီၢ်မုၢ်တဖၣ် ကဟံးဃာ် တၢ်မုၢ်လၢ်, ဒီးအတၢ်နာ် (:၁-၂), ဝံၤန့ၣ်ဒီး, အဝဲသ့ၣ် ကသးဝံၣ်ကဒီး ထါစံးထီၣ်ပတြၢၤယွၤန့ၣ်လီၤ. ဝံ အတၢ်ကတိၤတဖၣ် ဒုးသ့ၣ်နီၣ်စ့ၢ်ကီးပှၤလၢ ပမ့ၢ်တူၢ်ဘၣ်တၢ်ဆါတမံၤဂ့ၤတမံၤဂ့ၤ, ဖဲပပညိၣ်ပာ်ဖှိၣ်ပသးလၢ တၢ်နာ်သန့ၤယွၤ, ဒီးကိးထီၣ်အီၤန့ၣ်ဒီး, ပဝဲစ့ၢ်ကီး ပဃုထံၣ်န့ၢ် တၢ်မၤမုာ်ထီၣ်က့ၤပှၤလၢ ယွၤအအိၣ်သ့ဝဲဒၣ်န့ၣ်လီၤ.