တၢ်တယံာ်ဒံးဘၣ်န့ၣ်, ယမိၢ်ဆှၢလီၤန့ၢ်ယၤ တၢ်ဂီၤမူလၢ အဃုထံၣ်န့ၢ်ဝဲလၢ အ့ထၢၣ်နဲး, ဘၣ်တၢ်ဒိန့ၢ်ရၤလီၤအီၤ ဖဲတၢ်မၤအသးအကတီၢ်, လၢ ကီၢ်အၤဖြံၤကၤ, ထံထီၣ်ပၢၢ်အလီၢ် န့ၣ်လီၤ. “ကၠဲ(န)(စ)ဘိး” (Gemsbok) တၤဖးဖးဒိၣ်တဒု, အနၢၤန့ၣ် ကထီန့ၢ်ဒံး ၂ ခီၣ်ယီၢ်, ဒီးဒုးကဲထီၣ် ဆၣ်ဖိကီၢ်ဖိလၢ အလီၤပျံၤဒိၣ်မးတဒု, ဖျါလၢနကမၤပျံၤမၤဖုးအီၤတညီဘၣ်န့ၣ်လီၤ. အတၢ်အိၣ်အသးန့ၣ်, တချုးလၢ ထိၣ်ကီၤလၤအူး အဒူအဃိၤ တဖၣ် ဟဲဃ့ၢ်လီၤ, သီၣ်တထူၣ်ဘးလီဒံးဘၣ်အကတီၢ်န့ၣ်လီၤ.

ထိၣ်ကီၤလၤအူးအခိၣ်တဒု, လၢအကစီၤထီၣ်ထီန့ၢ်ဒံး အဒုၣ်ဒါတဖၣ်န့ၣ်, မၤဟူးဝးဆှဲးဆှိးအဆူၣ်တဖၣ်, ကိးပသူမၤသီၣ်အကလုၢ်, ဒီးဟဲဃ့ၢ်ဆဲးထူခီၣ်ဆူတၤဖးသၢဒုအအိၣ်, ဒီးနီၣ်ဟးထီၣ်ကွံာ်ဝဲဒၣ်န့ၣ်လီၤ. ယတဲဘၣ်ယမိၢ်လၢ “ယဆိကမိၣ် အဝဲသ့ၣ်အနၢၤတဖၣ် အဂံၢ်အဘါဆူၣ်ထဲလဲၣ်န့ၣ် တသ့ၣ်ညါဝဲအဃိ” န့ၣ်လီၤ.

ဖဲပဘၣ်ကွၢ်ဆၢၣ်မဲာ် ပနီၢ်သးအဒုၣ်ဒါ, မုၢ်ကီၤလံၢ် အတၢ်ဟဲဒုးပှၤအကတီၢ်, တၢ်စိတၢ်ကမီၤလၢ အအိၣ်ဒီးပှၤန့ၣ် ပဝဲပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်, ပသးပ့ၤနီၣ်သ့ဝဲဒၣ်န့ၣ်လီၤ. ပအိၣ်ဒီးသးစီဆှံကစၢ်, လၢအအိၣ်ဆိးဝဲလၢပပူၤ (ရိမ့ၤ ၈:၁၁), ဒီးကစၢ်ယွၤ အစုကဝဲၤလၢကမၤစၢၤပှၤ, “သိးထီၣ်ယွၤအစုကဝဲၤခဲလၢာ်, ဒ်သိးသုတြီမုၣ်ကီၤလံၢ် အတၢ်လီတၢ်ဝ့ၤကသ့န့ၣ်တက့ၢ်” (အ့းဖ့း ၆:၁၁). မုၣ်ကီၤလံၢ် အဲၣ်ဒိးဟဲတၤ ပတၢ်စူၢ်တၢ်နာ် ကစၢ်ယွၤအကလုၢ်ကထါ, မၤဒံဝ့ၤဒံဝီၤ ပတၢ်မ့ၢ်တၢ်လၢ ကစၢ်ခရံာ်အပူၤ, ဒီးအဲၣ်ဒိးလ့ပစီပှၤ, ဒ်သိးပကမၤတၢ်ဒဲးဘးအဂီၢ်န့ၣ်လီၤ.

ဘၣ်ဆၣ်, မ့ၢ်လၢကစၢ်ယွၤ အစုကဝဲၤတဖၣ်န့ၣ် ပၣ်ဃုာ်ဒီး “တၢ်မ့ၢ်တၢ်တီအယီၢ်တကိး,… တၢ်တီတၢ်လိၤအသဃိး, တၢ်နာ်အကတီၤ, တၢ်အုၣ်က့ၤခီၣ်က့ၤ အခိၣ်ကုာ်သုး, ဒီးသးအနးလၢ အမ့ၢ်ယွၤအကလုၢ်အကထါ” (:၁၄-၁၇) အဃိ, ပဆၢထၢၣ်အိၣ်ဂၢၢ်ဆိးကျၢၤသ့ဝဲဒၣ်န့ၣ်လီၤ.

ဖဲဒုၣ်ဒါဟဲဒုးပှၤလၢ တၢ်မၤပျံၤမၤဖုးပှၤ, ပသးကတူၢ်ဘၣ်ခီၣ်ဘၣ်ဒ်သိး တၢ်စံၣ်ညီၣ်ဃၣ်လီၤဘၣ်ပှၤ, (မ့) တၢ်သူၣ်ဟးဂီၤသးဂီၤအကတီၢ်, မ်ပကသ့ၣ်နီၣ် ထီၣ်က့ၤတၢ်လၢ ပမ့ၢ်ယွၤဖိယွၤလံၤ, ဒီးပအိၣ်ဒီး တၢ်စုကဝဲၤလၢလၢပှဲၤပှဲၤ ဒ်သိး ပကဆၢထၢၣ်အိၣ်ဂၢၢ်ဆိးကျၢၤအဂီၢ်န့ၣ်လီၤ.