ခရ့း(စ)ထ့ (Kristin) အဖိခွါ, ဖဲအသးဖိအိၣ် (၇) နံၣ်ဒံးအကတီၢ်န့ၣ် သံဝဲဒၣ်လၢ ခဲစၢၣ်အတၢ်ဆါအဃိန့ၣ်လီၤ. ခဲကနံၣ်အံၤ, သၢနံၣ်လဲၤပူၤကွံာ်ဝံၤန့ၣ်ဒီး, အဖိခွါအဒိၣ်ကတၢၢ်တဂၤ ဆိးက့နးနးကျံးကျံး တုၤဒၣ်လဲာ်တၢ်ပျၢ်စုပျၢ်ခီၣ်အီၤလံန့ၣ်လီၤ. အတံၤသကိး လၢအတမ့ၢ်ပှၤစူၢ်က့ၤနာ်က့ၤတၢ်တဖၣ် သူၣ်ကိၢ်သးဂီၤဃုာ်ဒီးအီၤ, ဘၣ်ဆၣ်, ဘၣ်မနုၤအဃိ, ခရ့း(စ)ထ့ နာ်န့ၢ်ဒံး ကစၢ်ခရံာ်အဖၢမုၢ်လဲၣ်န့ၣ် အဝဲသ့ၣ်တနၢ်ပၢၢ်ဝဲဒၣ်ဘၣ်. အဝဲသ့ၣ်သံကွၢ်အီၤလၢ “ဘၣ်မနုၤအဃိ, နကစၢ်ယွၤ ပျဲဝဲဒၣ်တၢ်ကမၤအသးဒ်သိးအံၤန့ၣ်လဲၣ်. ဘၣ်မနုၤအဃိ, နနာ်သန့ၤအီၤအဖၢမုၢ်လဲၣ်”န့ၣ်လီၤ.
ဘၣ်ဆၣ်, လၢခရ့း(စ)ထ့အဂီၢ်, တၢ်မၤအသးတဖၣ်န့ၣ် အိၣ်ဒီးတၢ်အဂ့ၢ်အဂၢၢ်အကျၢၤလၢ ဆူညါကစူၢ်က့ၤနာ်က့ၤယွၤထီဘိန့ၣ်လီၤ. ခရ့း(စ)ထ့ စံးဝဲဒၣ်လၢ “ဘၣ်မနုၤအဃိ, တၢ်မၤအသးဒ်သိးအံၤတဖၣ် ကဲထီၣ်အသးလဲၣ်န့ၣ် ယတနၢ်ပၢၢ်ယဲဘၣ်. ဘၣ်ဆၣ်, တၢ်မၤအသးဒ်သိးအံၤတဖၣ်အပူၤန့ၣ် ယသ့ၣ်ညါလၢ ကစၢ်ယွၤ ကမၤစၢၤပှၤန့ၣ်လီၤ. ဒ်သိးယကအိၣ်မူအိၣ်ဂဲၤဆူညါအဂီၢ်, ထဲဒၣ်ကစၢ်ယွၤတဂၤဧိၤ ဟ့ၣ်ယၤတၢ်မုၢ်လၢ်သ့ဝဲဒၣ်” န့ၣ်လီၤ.
ဖဲစီၤဒၤဝံး ဘၣ်ကွၢ်ဆၢၣ်မဲာ် အတၢ်အိၣ်မူတၢ်ဂ့ၢ်ကီတဖၣ်အပူၤအကတီၢ်, တၢ်မုၢ်လၢ်, ဒီးတၢ်နာ်ဒ်သိးအံၤန့ၣ် ပျဲအကလဲၤတၢ်ဆူညါန့ၣ်လီၤ. ဖဲဒုၣ်ဒါတဖၣ် ဃုမၤဟးဂီၤအီၤ, ဒီးကဝီၤဃာ်အီၤအကတီၢ်န့ၣ် ဘၣ်မနုၤအဃိ, တၢ်မၤအသးတဖၣ်အံၤ ကဲထီၣ်အသးလဲၣ်န့ၣ် တမ့ၢ်လၢ စီၤဒၤဝံး ကနၢ်ပၢၢ်ဝဲဘၣ်န့ၣ်လီၤ. ဘၣ်ဆၣ်, အဝဲလူၤပိာ်ကစၢ်ယွၤ လၢအနာ်န့ၢ်ဝဲသ့တဂၤ, လၢအဆၢကတီၢ်ဒၣ်ဝဲန့ၣ် ကမၤပူၤဖျဲးအီၤ, ဒီးကဆိၣ်ဂ့ၤအီၤန့ၣ် စီၤဒၤဝံး သ့ၣ်ညါဝဲ (စံး ၃၁:၁၄-၁၆) န့ၣ်လီၤ. မ့ၢ်လၢတၢ်မုၢ်လၢ်လီၤတံၢ်လီၤဆဲးဒ်သိးအံၤအဃိ, အဝဲဟ့ၣ်လီၤအးလီၤအသးဆူ ယွၤအအိၣ်ဆူညါသ့ဝဲဒၣ်, ဒီးစံးဝဲဒၣ်လၢ “ယဆၢကတီၢ်တဖၣ် အိၣ်ဝဲလၢနစုပူၤ” (:၁၅) န့ၣ်လီၤ. ဒီးဒ်သိးကစံးစ့ၢ်ကီးဝဲလၢ “ကယဲၢ်ပှၤလၢအမုၢ်လၢ်တၢ်လၢ ယွၤခဲလၢာ်သ့ၣ်ဧၢ, ပာ်ဆူၣ်သုဂံၢ်သုဘါတက့ၢ်” (:၂၄) အဂီၢ်, တၢ်မၤအသးဒီးအီၤတဖၣ်န့ၣ်ထိၣ်ဟူးထိၣ်ဂဲၤထီၣ်အီၤန့ၣ်လီၤ.
ဖဲပသူၣ်ကၢ်သးလီၤဘှံး, ဒီးပတၢ်လဲၤခါဆူညါအဂီၢ်, တၢ်မုၢ်လၢ်ကအိၣ်ဖျါဝဲဒၣ်ထဲ တၢ်အဆံးအစှၤအကတီၢ်, ပသ့ၣ်ညါလၢ ပကမၤအါထီၣ် တၢ်ဟံးဃာ်ဂၢၢ်ကျၢၤ ကစၢ်ယွၤ, ဒီးတၢ်မုၢ်လၢ်လၢအဟ့ၣ်တၢ်မူ ထဲဒၣ်ယွၤတဂၤဧိၤ ဟ့ၣ်ပှၤသ့ဝဲဒၣ်န့ၣ်လီၤ.